¹ Kadwarak kulo imanit lo Levi - Oto hati cio kulo imanit lobito Levi fad - o jir ida i ciahini lobo kof kode o jir ida o ngoni ko lobo lolunyot neicieng ko cio kulo Israel. O war cia icieng to daha na li cori Lahitok tonyio tohi lolunyot neicieng na. ² Ida cia icieng o ngon ko lolunyot kiji lo cio kulo Israel kaletok: Lahitok lara tohi lolunyot neicieng iya na lo cihare Inyi icieng. ³ Tohi na lara kicait lo kadwarak iyo cio kuna li fotohita mongo kode ker inyi ene: Okoko, sangite kulo kocehe ko tyang lo kue. ⁴ O jir ite i co icieng ketemok kulo ngamang kuningi, vino ngejuk ko ngoroni lo olif ko fofi ketemok iyo gita lo kera kunino ⁵ tonyio lo nyumu Lahitok Lobanga ningi icieng ko lotataha kuneicieng iyo imaniti kuningi fad lo woita ko ki tiyo to karana lo Lahitok faritin fad. ⁶ Ka lo lotu tungani lo imanit lo Levi to lobo iyo kangite kuningi to lobo faji to kof lo Israel faji na lo manyare inyi oto hati o lotu to tau fad faji na lo nyumu Lahitok, ⁷ o tum inyi ki tiyo to karana lo Lahitok Lobanga nenge iya cio kulo imanit lo Levi kulakude kuna li tiyo ijia ketemoni lo Lahitok. ⁸ O jir inyi o ngar sangite ko icieng ara lobito kileng ngo romu inyi robia iyo ki iti loto lo sangite kulo kaji. ⁹ Ka li rute ite nu kof lohi cwara Lahitok Lobanga ningi ite, ke fwo ki tetema ikoditi kuna i rohori kulo misihi kulo ijia. ¹⁰ Ke co lobo tungani o rumuno to kiji ningi na li fotohi kito nenge retoni kode ngorwani iyo kimatare, na li tetema ki yeha kode ki lama, na lo loha kitiriji kode i tiyo ticitici kulo ki bwana, ¹¹ kode o cula kificiti, kode kakotunitani lo okorifi; kode katitenyani lo mininga kode tungani na li iti tenyita okorifi kulo cio kuna i weiha. ¹² Lobo tungani li tiyo kuno sangite i bot inyi iyo Lahitok: to kuno ticitici i boti i fuharu Lahitok Lobanga ningi kunu misihi to ketemoni ningi. ¹³ O jir ite i tongo o ru kipal to ketemoni lo Lahitok Lobanga ningi. ¹⁴ Kunu misihi li fworo ite ki taluno kof diho icieng, o ningoti kalalamitak ko kabohok kulo kamuha. Ati to ite ida Lahitok Lobanga ningi i ruk ite i tiyo kuna ticitici. ¹⁵ Iti woju cia Lahitok Lobanga ningi kamocani na lohi ri ko nan to kiji ningi iyo Israel kaletok kuningi, o jir ite i ningo inyi. ¹⁶ Tonyio lafa tohi ene li tifia ite iyo Lahitok Lobanga ningi to Horeb lafar lo tuba i jimitare, 'Ke co ohoi ki rihe ki ningo ogoro lo Lahitok Lobanga niyang kode ki deya ene kima li tirima, i co cia ki weiha.' ¹⁷ O joo Lahitok diho nan, 'O jir na tenya lo teny icieng, ¹⁸ ati woju cia Nan kamocani diho icieng to kiji lo cio kulo Israel kaletok na lohi riworo ko isi manyu a fik cia nan tenya Nei kutuk nenge. O rihohi cia inyi icieng sangite fad kuna la cik Nan inyi. ¹⁹ Nan token Nei cia la tifia tungani na lida o ning tenya Nei na lo tenya komocani to karana Nei. ²⁰ Ati kamocani na lo gulia tenya lobo tohi to karana Nei lida Nan a cik kode kamocani na lo tenya to karanecio kulo lobangahin kude ake o jir i fadari. ²¹ I tum ite jimitan iyo kenite kuningi ake ake, 'Aja ki tum ohoi yenun ka lida ara Lahitok lo teny na tenya?' ²² Ka lida tohi na lo teny kamocani to karana lo Lahitok i tiyihino kode o lotu ara dede, ara na tenya na lida ara Lahitok lo teny. Lo guli na komocani tenya tona ke ryenya.'