¹ Kolorihe Petero ko Jon otenya ko cio ofwonu kadwarak, lahitok lo asegere kulo kaji lo Lobanga ko sadusihin diho icieng. ² Omus icieng noo tonyio itiyena jayona cio tenya lo kibuhuno lo Yesu to wei. ³ Inief icieng Petero ko Jon ofihahi icieng mabus tona lorahare kof kurou many kiwanyi nenge. ⁴ Ati cio kuna loning iruk osod wel lo cio karuhok many ogoru alif miet. ⁵ Kiwanyi nenge ofwonu kalanyunok, lohitwaha ko katiyenak kulo cik otubati Jerusalem. ⁶ Ongon orumu kadwarak Annas, Kaiapas, Jon, Alksanda ko kunakude cio to kaji lo kadwarak. ⁷ Ilolongu icieng Petero ko Jon iciahi kitifia icieng ojo, “tani golun kode karana itii ite ene tic?” ⁸ Oto Petero ko kifut ko Okorif na Inyu ko rihohino icieng ojo, “kabolorok ko lohitwaha kulo cio kuniyang. ⁹ Kolohilolongi ohoi ene far to tic lo jiran na litihino ken lo kakunanani ko jimitan itiihino aja, ¹⁰ ojir ite ko cio kulo Israel fad iyen jimitan to karana lo Yesu Kristo lo Nazaret lafa ligurohi ite iyo kuruce ati na litibuhu Lobanga to kiji lo kaweyak inyi atifuriorore ene tungani lo woita ketemoni ningi. ¹¹ Inyi, “Moru na liberu ite kaduhok lolotu ara moru 4Na igol to ogule lo kaji” ¹² Ida lwaharu orumuno diho lobo tungani ake tonyio oru lobo karana liciori ten to fotiri lo kai diho cio na ngolwahu icieng” ¹³ Kolodeu icieng golun lo taulo lo Petero ko Jon manyu oyeniti jimitan ida afa icieng iken, oto ipanyiti bebe manyu ofwonu icieng odeu jimitan ongon afa kuno cio ko Yesu. ¹⁴ Ati tona lodeyare icieng na tungani litifuriori owoita inyia ko icieng, oru dong lobo tenya na ngoteny icieng. ¹⁵ Oto icieng ko kitingadaru icieng to lokiho ojir kitenyare ake. ¹⁶ Itifi icieng kenite ojo, “kidim ohoi kulo leroha aja? Tonyio loyen cio kulo Jerusalem fad jimitan litii icieng ene tangu hitok na lida manyu ohoi kitum mona. ¹⁷ Ati lo kiticungo ene tohi ida osodoro kisarihino kiji lo cio, ojir ohoi kicik kuno cio ida osodoroti tenya diho cio to na karana”. ¹⁸ Oto icieng ko kilolonguno Petero ko Jon ko ciha icieng to na igol ojir ida otenyati ko kitiyena cio to karana lo Yesu. ¹⁹ Ati inyiahahi Petero ko Jon icieng ojo, “itingot dong ite to kenite kuningi ene tenya kolojir to komom lo Lobanga kolojir diho ohoi lo kitiyo wahun ningi kode lo Lobanga. ²⁰ Tonyio ida ohoi kitum ngerihino tenya tohi na lohideu ohoi kining manyu. ²¹ Langun lotem icieng kitibanga jayona to tenyi tenyi kuna kude olahahini icieng ofwo. Ida icieng otum kitigema icieng tonyio orumu cio fad omaja Lobanga to tohi na litiihino. ²² Tonyio na tungani liihino tangu lo furioro diho inyi orumu logal karihin kulo obolore nenge keek ongon ²³ Kololahahini icieng, ofwo Petero ko Jon diho cio kuneicieng orihohini tenyi tenyi fad kuna loteny kadwarak kuna hitoha ko lohitwaha diho icieng. ²⁴ Koloning karuhok jii oto icieng oting ogoroho kuneicieng kilifa diho Lobanga ara lobito ojo, “kabu Lahitok isi lafa liduk kai ko kof ko nami nami ko sangite fad to katwa neicieng, ²⁵ Iteny afa isi to golun lo Okorif na Inyu to kutuk lo apa niyang David ijo; “Nyio igorita misiok ara lobito manyu tonyio ivita cio arus? ²⁶ Opar kabuno kulo kofi kofi manyu itutuba kabolorok kenite kitipeha Lahitok ko na lonyumu inyi otwe manyu”. ²⁷ Dede lotuba afa Erod ko Pantio Pillato ko misiok ko cio kulo Israel fad ene kang ivitarihin tenyi tenyi ken lo Yesu na linyumu isi manyu itwe. ²⁸ Itii icieng tohi lafa likukum isi to twero ko golun nino jimitan ojir itiihino. ²⁹ Jija Lahitok niyang tode kitibanga neicieng manyu icwara karwaak kunino golun lo kititima tenya nino to golun lo taulo. ³⁰ Tofete kana nino kitifurio ko kitiyo tanguhin ko kitotorita kuna hitoha to karana lo karwaani nino na inyu Yesu”. ³¹ Kolokeru icieng kilifa, oto na lohitongore lotubare icieng ko kitinienienga manyu icieng pili ko kifut ko Okorif na Inyu ko tenya tenya lo Lobanga to golun lo taulo. ³² Itongo karuhok fad to tau ko kiiyo lobito. Oru lobo to kiji neicieng lolung sangite kunenge ati ongari sangite fad ara lobito. ³³ To golun na hitok osodoro jayona kisaden to kibuhuno lo Lahitok Yesu ko jiran lo Lobanga ko ngonun diho icieng fad. ³⁴ Oru afa lobo longoromahi lobo tohi to kiji neicieng. Tonyio to faritin kuna longon ko manatak kuneicieng kode kajihit itiloti iyauni robia kunenge ³⁵ icori diho jayona manyu okorahini diho cio fad kuna longon ko wahun. ³⁶ Josep lo Caipras na lara Levini na lilolongoti to lobo ojo Barnabas (jimitan kito katigoloni lo taulo) ³⁷ itolot mana nenge iyauno robia kunenge ofik kejuha kulo jayona.