¹ Lobo far bito orumu Petero ko Jon ofworo kaji lo Lobanga kilifa tik lo mietangon lo kurou. ² ongon orumu lobo tungani likunana many to otomone na lotingoritati lobo lokoli lo kaji lo Lobanga na lilolongoti ojo odwaru, ojo ojir itongo inyia ililifita diho cio kuna lorutoro kaji lo Lobanga. ³ Kolodeu inyi Petero ko Jon owak rutoro, itifi inyi icieng robia. ⁴ Oto Petero ko Jon ko fiha konyeha kuneicieng odeyati inyi. oto Petero ojo diho inyi, “kide ohoi”, ⁵ oto na tungani ko fihahino tau deya icieng to kodomo jimitan kicori ca lobo tohi. ⁶ oto Petero ojo, “dab ko rial ida nan atehita ati tohi na latehita nan, ahicio nan isi. To karana lo Yesu lo Nazaret, to woju ilot”. ⁷ Inief inyi to kana iteten ko kitiwojuno inyi, deu deu kejuha ko odilehin kulo kejuha kunenge ko golun. ⁸ Ko wojuno obir icak lotita. Ko kiliharu ko icieng kaji lo Lobanga olot, ivirita ko maja Lobanga. ⁹ Kolodeu cio fad inyi olot manyu omaja Lobanga, 10 ¹⁰ Oheruni inyi ara langun litongita lokoli na lojimi odwaru ililifita diho cio, oto cio ipany noo to tohi na litiihino diho inyi. ^{11 12} 1 Kolorihe inyi ogorohi diho Petero ko Jon oto cio fad ipany noo, ifejuni diho icieng na faji lilolongoti ojo Varaja lo Solomon. 12 Kolodeu Petero jii oto ojo diho icieng, “cio kulo Israel, nyio kitipany ene tenya ite? Nyio ideya ite ohoi mejo ara to golun kode to jiran niyang lico ene tungani olotita? ¹³ Lobanga lo Abraham lo Isaak ko Jakob, Lobanga lo fafaico kuniyang licio deyo diho karwaani nenge Yesu. Ipote ite inyi ifadari ifwo iberu inyi to ketemoni lo Pilato kileng orumu lowak Pilato lahahino inyi. ¹⁴ Ati iberu ite tungani na inyu na lobir manya nenge ifwonu ilifa ijo ojir kilahahini ite kasasuoni ko kafadani. ¹⁵ Ifade ite monye lo warun ati itbuhu Lobanga inyi to kiji lo kaweyak, ohoi sadeni kulo ene tenya. ¹⁶ To kiruk iyo karana lo Yesu inyi lico ene tungani lideya ite manyu iyen, orumu golun. Ara karana lo Yesu ko kiruk na lolotu to inyi licio ene tungani ofurie tur iya ene lideyare ite. ¹⁷ Jija recera ayen nan jimitan itii ite ko kabolorok kuningi kuna to lunya. ¹⁸ Ati ara ene kikoi litifutare Lobanga tenyi tenyi kuna lorihohi inyi to kutuhe kulo kamocak ojo ojir Kristo nenge olotu orumu kidak. ¹⁹ Irwoti bo dong ibeloti diho Lobanga ojir kipalipali kuningi ifufusori ojir faritin kulo kitirobia ofwonu diho ite to kai diho Lahitok. ²⁰ Ojir inyi oculo Kristo na afa lonyumuni to ite na lara inyi Yesu. ²¹ Ojir inyi iwasihi kai many olotu far na linyiahunore Lobanga sangite fad iya na lotenyare inyi afa berien to kutuhe kulo kamocak kunenge. ²² Tonyio oteny afa Moses ojo, “tonyio itiwoju mute Lahitok obanga ningi kamocani na lori ko nan to kiji lo cio kuningi ojir ite ining sangite fad kuna loteny inyi diho ite. ²³ Lobo tungani koloberu ningo inyi ojir itiriori to kiji lo cio kunenge. ²⁴ Dede kamocak fad kiciaha many diho Samuel kuna afa limoca fad otenyati afa to kuno faritin. ²⁵ Manyu ira ite kalunyok kulo kimociti ko ciharu lafa licio Lobanga diho monyeri kuningi. Ojo afa inyi diho Abraham, “to lotata nino orumu mute cio to kof fad gum”. ²⁶ Kalitiwoju afa Lobanga karwaani nenge, item oculu diho ite lo kicwara ite gum ko kitibelo ite to rohojun ningi