¹ Lotuno lo Okorif na Inyu to far lo Pentekost Kololotu far lo Pentekost orumu icieng fad otuba lobito faji. ² Deu deu olotu kigur na lori iya lo kiyoma nahitok to kai ko kifut kaji na lorumu itongo icieng katwa. ³ Oto icieng odeu tohi na lori iya ngadiefo kulo kima kuna lofwonu okora odohi kweci kuneicieng lobito lobito. ⁴ Icieng fad ko kifut ko Okorif na Inyu ko kicaha tenya to tenyi tenyi kuna longon ake iya na licwarare Okorif icieng. ⁵ Tona orumu ongon Jerusalem cio kulo Judea kuna lobang Lobanga kuna lofwonu to kofi kofi fad. ⁶ Koloningiti kigurita otubuno ilulung ko kipany nahitok tonyio oning icieng kuno cio otenya tenyi tenyi kuneicieng. ⁷ To kipany na hitok itifia icieng ojo, “ida re kuno cio fad lotenya ara cio kulo Galilea? ⁸ Aja hati ohoi fad kiningo icieng otenya to tenyi tenyi kuniyang? ⁹ Ongoni ene cio kulo Partia, Mede, ko cio kulo Elam, cio kulo Mesopotamia, Jude ko Kaperdokcia, Pantio ko Asia, ¹⁰ Pirgia ko Pampilia, Ijipt ko fajihit kulo Libia kuna lonyiha ko Ceiren, welo kuna lofwonu to Roma kuna lara Judaiahin ¹¹ (ko cio kude kuna libelo diho dini lo Judaia); cio kulo Kret ko Arab kiningo ohoi kuno cio otenya to tenyi tenyi kuniyang sangite kuna hitoha kuna litii Lobanga. ¹² To kipany na hitok ko bangun itifi icieng kenite ake ake ojo, “itotoro ene nyio?” ¹³ Kude kuna lokwenitare icieng ojo, “orumaha kuno cio vino” ¹⁴ Oto Petero owoju ko kuna kude tomon ko lobito ko kifura diho ilulung to ogoro na ikwat ojo, “Judaiahin kaletok kunei ko cio fad kuna longon Jerusalem. Ingohi atitimahi nan ite manyu itoning otoc tenya na latenya nan diho ite. ¹⁵ Ida kuno cio orumaha iya na lijimitare ite orihe ara saa uni lo kiwanyi. ¹⁶ Ida ene ara ruma ara ene lafa loteny kamocani Joel ojo; ¹⁷ Ojo Lobanga, ‘to faritin kulo lohicungi, ajuhohi mute nan Okorif nei diho cio pili. Imoca mute tee kilahaji ko kariok kuningi odeya ca cio kuna itwahi kuningi ingajiti itirija mute cio ngoroyok kuningi ¹⁸ Kileng diho karwaak kunei rei ko ngorwo fad, juhohi mute nan Okorif nei to kunu Faritin manyu imoca mute icieng. ¹⁹ Atotorohi ca nan sangite kuna litirima idi kai ko itotorit ene kof Okoto ko kima ko furo na irioci. ²⁰ Ibelo mute kolong ara lokimuyuk, manyu ofa ara okoto. Orihe far lo Lahitok ida lolotu far na hitok ko deyo nenge. ²¹ Manyu cio pili kuna lilolongo karana Lo Lahitok olwahuni mute” ²² Ite cio kulo Israel itining ene tenya: Yesu lo Nazaretqqq ara tungani na litotoru Lobqanga diho ite to ticitici kuna hitoha kulo golun ko twero ko tanguhin becek kuna litii Lobanga ara lobito ko inyi to kiji ningi iya na liyen ite. ²³ Icio afa Lobanga ene tungani kac kuningi iya lafa likukumare inyi to yenun ko genyun nenge ati orumu oyen tohi na ca litiihino ketemoni, ati ifwonu ite ifade inyi to gurohino iyo kuruce to kac kulo cio kuna irohori ²⁴ ati itiwaru Lobanga inyi to wei, olahe inyi to mejun lo wei tonyio ida orumu wei otum muruhuta inyi. ²⁵ Oteny afa David to inyi ojo, Adeya nan Lahitok tik tik ketemoni nei, tonyio ongon inyi ngati lo iteten nei, Ida ca kingerihini nan. ²⁶ Tona, okwama tau nei manyu otenya ngadief nei to kwama. Itongo manyu ca ken nei to kigeno. ²⁷ Tonyio ida ca isi ingerihi nan iyo kwecere ida ca isi ingerihi ken Lo tungani nino lohigeno isi omura. ²⁸ Lohitibotohi isi nan kikohin kulo warun, kitifut mute isi nan to Kwama to ketemoni nino” ²⁹ Recera ahirihohi nan ite to golun to tau jimitan lowei afa fafai niyang David manyu ongon kwecere nenge ene ko jija. ³⁰ Ati ara afa inyi kamocani manyu oyen ojo ocik afa Lobanga diho inyi to kibutia jimitan afik mute inyi lobito to kiji lo lotataha kunenge iyo seger lo okabwe nenge. ³¹ To deya iya ketemoni ko yenun tohi na mute litiihino, oteny inyi to kibuhuno lo Kristo jimitan ida ingohini inyi kwecere manyu ida ken nenge omura. ³² Litibuhu Lobanga Yesu iyo warun manyu kira ohoi sadeni kulo dede. ³³ Tona lotingororihin inyi iya ngati lo iteten lo Lobanga, lifotu inyi diho monye Okorif na Inyu lafa locik inyi oto ijuhohi diho ohoi ene tohi jija lideya ite ining manyu. ³⁴ Tonyio ida afa David irwok kai ati ojo; “Ojo lahitok diho Lahitok nei; itongo ngati lo iteten nei ³⁵ manyu atirak nan merok kunino kiteni lo kejuha kunino”. ³⁶ Tona, ingohi Israel fad toyen jimitan, lonyumu Lobanga ene Yesu afa ligurohi ite iyo kuruce ara lahitok ko Kristo. ³⁷ Koloning cio jii omeji taulo bebe, ko jimitan diho Petero ko jayona kulakude, “recera kidim ha aja?” ³⁸ Inyiahahi Petero ojo, irwoti manyu ojir kibatisi ite tolobito to karana lo Yesu Kristo lo launo kipalipali ito ca ite irumu kicwara lo Okorif na Inyu. ³⁹ Ara afa ene ciha ningi ko tee kuningi ko cio kuna ilomaha ko cio pili kuna mute lilolongu Lahitok Lobanga niyang diho inyi. ⁴⁰ To tenyi tenyi becek kuna kude, osony inyi icieng ko kilelia diho icieng ojo, “itilwahu kenite kuningi to kiji lone kofiangiti lipalaru. ⁴¹ Oto cio kuna liruk tenya nenge ibatisi tona osodohino cio kuna lotum alif uni diho icieng tona far. ⁴² Icio icieng kenite diho kitiyena lo jayona ko iyo kimora ko ngara lo daha ara lobito ko kilifa ⁴³ Oto bangun inief cio becek manyu itii jayona kititorita kulo tanguhin becek. ⁴⁴ Itongo karuhok ara lobito manyu ongarati sangite kuneicieng fad. ⁴⁵ Itilototi sangite kuneicieng ongari robia, icwarati to tungani iya idi lowak inyi. ⁴⁶ Faritin fad itiring icieng tuba kaji lo Lobanga. Ongarati daha ara lobito to kangite kuneicieng to kwama to taulo, ⁴⁷ omajati Lobanga na lokwama cio fad icieng, oto Lobanga osodohita diho icieng cio kuna lolwaharu faritin fad.