¹ Iyo book nei ketemoni, Teopilo, lager nan sangite pili kulafa litii Yesu manyu itiyen. ² many far na liyarorihin inyi kai langun lokeru ciha to golun lo Okorif na Inyu jayona kunenge kulafa lonyumu inyi. ³ to kifwongi lo wei nenge itotor inyi ken nenge diho kuno cio kakeny beciek lo kitotoro jimitan awar inyi. oboto diho icieng to faritin keek ongon ititima diho icieng tenyi tenyi kulo okabwe lo kai. ⁴ To lobo far lodahare inyi ko icieng, icorihi icieng ene cik ojo, “kengohi Jerusalem ati itilati kicwara na locik Apa nei lafa lahirihohi nan ite. ⁵ Tonyio ibatisa afa Jon to kifi ati to faritin kude kuting kibatisi ca ite to Okorif na inyu". ⁶ Tinya kolotuba icieng ara lobito, itifi icieng inyi ojo, “Lahitok, ara kuno faritin kuna linyiahahinore isi okabwe iyo Israel?” ⁷ Ojo inyi diho icieng, “ida ara ningi yenun tik ko far na lofik Lobanga Apa to twero nenge. ⁸ Ati irumu ca ite golun kololotu Okorif na Inyu diho ite manyu ira ca ite sadeni kunei to Jerusalem, to Judea fad ko Samaria many lohicungi lo kof”. ⁹ Langun lo teny inyi jii, otingori inyi to komoma kuneicieng oto idis iduhe inyi to konyeha kuneicieng. ¹⁰ Kolorihe icieng ilomo odeyaru loro nenge oto cio are kuna liciefita kyelani kuna ikweri ofwonu owoita ko icieng. ¹¹ Oto ojo diho icieng, “cio kulo Galilea, nyio iwoita ite ene ilomo kai? Yesu ene lotingori iya kai oitu mute tona kikoi bito ideunore ite inyi olo iya kai. ¹² Tinya oite icieng iya Jerusalem to donge lo oliv na lara lotita lo sabit to Jerusalem. ¹³ Kologoruni ofwo icieng kaji lo kai na orumu litongore icieng. Ara kuna longoni Petero, Jon, Jems, ko Andru, Pilip ko Tomas, Batulomayo ko Matiu, Jems kito lo Alipaio ko Saimon kasisioni lo kof nenge ko Judas kito lo Jems. ¹⁴ Oto icieng fad osodoro ko kilifa ara lobito ko ngorwo ko Meri ngoto Yesu ko recera kulo Yesu. ¹⁵ To kunu faritin, owoita Petero kiji lo karuhok (ilulung na lotum cio mia ko keek are) ¹⁶ ko jimitan, “recera, ojir itifuti igerit na loteny afa Okorif na Inyu to kutuk lo David to ken lo Judas na lara karihitani lo kaniefak kulo Yesu- ¹⁷ ara afa inyi lobito to kiji niyang manyu kingar ko ohoi iyo ene tic. ¹⁸ (to duma na lorumu inyi to rohojun nenge, inyangu Judas mana, ija ouroro inyi locirlili, otwaja ken nenge ibiruno monyi oleng. ¹⁹ Cio fad to Jerusalem oningi na tenya inyi na itibarahinorihin na mana to tenya neicieng ojo Akeldama jimitan mana lo okoto). ²⁰ Ojo Petero, “tonyio igero iyo book lo Zabur ojo, Ingohi faji nenge tara mura Keco lobo tungani omanya ija ko Ingohi lobo tunganiake oluny Faji lo obolore nenge. ²¹ Tona ojir diho ohoi nyumuno tungani lobito to kiji lo kuno cio afa lohingon ko ohoi manyu to lohicahi lo lotita lo Yesu oleng ko katwa to kiji niyang. ²² Kicaha manyu to kibatisa lo Jon many far na liyarorihin Yesu to kiji niyang. Tonyio ojir lobito to kiji lo kuno cio ara saden ko ohoi iyo kibuhuno”. ²³ Oto icieng onyumu cio are; Josep na lilolongoti ojo Barsabbas (na manyu lobara Justo) ko Matia. ²⁴ Tinya ilifa icieng ojo, “Lahitok. Iyen isi taulo kulo cio fad. Kitotorohi ohoi lobito na linyumu isi to kiji lo kuno cio ²⁵ lunyon ene tic lo kijayo tenya nino, na longerihi Judas to loro faji na locam to inyi. ²⁶ Oto icieng ibir gumar, onyumu gumar Matia na losodohini iyo kuna tomon ko lobito.