¹ Naha lobo tungani lobara Ananias ko ngorwani nenge Sappira ko kitilotoro tohi neicieng. ² Oto inyi itong robia kude iduhahi oyen manyu ngorwani nenge ko kiyauno otonge icio jayona. ³ Oto Petero ojo diho inyi, “Ananias, nyio icio isi sitan ifut tau nino icio isi itinonong Okorif na Inyu to kitonga robia kuna linyiangarihin kof nino? ⁴ Ida orumu kof ara nino orihe ida isi litilote? Ojo manyu litilote isi ida orumu robia ongon diho lanyuno nino? Nyio licio isi iiu kitiyo tohi na lori jii? Ida isi italer diho cio ati diho Lobanga. ⁵ Koloning Ananias jii, ouroro kof ko weyaru. Oto bangun inief cio pili kuna loning tohi na litiihino. ⁶ Oto kilahaji ko fwonuno ko bubura ken nenge ko kililingoroti ofwori onuhahini. ⁷ Kolorang tihi uni olotu ngorwani nenge, ida oyen tohi na litiihino. ⁸ Itifi Petero inyi ojo, “kirihohi nan, robia kuna litilotore ite ko Ananias kof ningi icieng kuno fad?” Iruhohi inyi ojo, “ibo icieng kuna”. ⁹ Ojo Petero diho inyi, “aja iruk isi tema Okorif lo Lahitok? Tode ongon kejuha kulo cio kuna lonuk retoni nino agwala, kitingori manyu ca isi”. ¹⁰ Tona tik inyi ko urohino kejuha kulo Petero ko weyaru. Ofwonu kilahaji ojo orumuni inyi lowei ko kililingoroti inyi ofwori onuhahini diho retoni nenge to angati. ¹¹ Inief bangun na hitok kanisa fad koloningiti kuno tenyi tenyi. ¹² Oto jayona itii kitotorita ko tanguhin becek to kiji lo cio manyu ifuririta karuhok fad kaji lo Lobanga iyo faraja lo Solomon. ¹³ Oru lobo tungani lo teharu loro kimora ko icieng kileng lofik cio rima na hitok kenite kuneicieng. ¹⁴ Ati cio becek ngorwo ko rei iruhiti Lahitok manyu osodoro wel neicieng to faritin, ¹⁵ inyi licio cio iyauno kamwayak itigetohini opar kikoi ojir kololot Petero okorif nenge imuk icieng. ¹⁶ Ofwonu manyu ilulung lo cio to kangite kuna lirit Jerusalem iyauni kamwayak ko kuna litigema lodonyok manyu itifuriori icieng fad. ¹⁷ Oto kadwarani na hitok ko kalihitak kunenge kuna lara saducihin inief okaine bebe. ¹⁸ Inief icieng jayona ofihahini mabus ¹⁹ ati karwe olotu malaika lo Lobanga onga agwalahin kulo mabus iyauno icieng oleng ²⁰ ojo diho icieng, “ifwo kaji lo Lobanga ititimahi cio tenyi tenyi kulo ene warun ngejuk pili. ²¹ Kolowang kof ofwo icieng kaji lo Lobanga kitiyena cio iya na lociharihin icieng. Kololotu kadwarani na hitok ko kalihitak kunenge ilolong icieng lokiho na lotubu lohitwaha kulo Israel fad ko cularoti cio iya mabus kiyauno jayona. ²² Ati kologoruni mabus, orumu asegere icieng oru tijia. Oto icieng inyiahe tenya ojo, ²³ “kirumu ohoi mabus ipunga otoc ko kaririak owoita agwalahin ati ojo ohoi kinga kirumu oru tungani to katwa”. ²⁴ Koloningiti ene tenya ipany lahitok lo kaririak kulo kaji lo Lobanga ko kadwarak kuna hitoha iiyoti nyio ba liyauno kuno. ²⁵ Tinyia olotu lobo tungani ojo, “tode kulangole cio litorahi ite mabus kunu lowoita kaji lo Lobanga itiyenati cio”. ²⁶ Tona lahitok lo kaririak ko fworo ko asegere kunenge ko kiyauno jayona. Ida icieng itii to golun tonyio obang icieng ojo kicak ca cio to morutok. ²⁷ Kaliyauni jayona , itiwoitahini icieng ketemoni lo lokiho ojir kadwarani na hitok itifi icieng. ²⁸ Ojo kadwarani na hitok diho icieng, “kicik afa ohoi ite bebe kijo ketiyena cio tone karana ati litifut ite Jerusalem to kitiyena ningi many kifik ohoi ara kapalak to okoto lo ene tungani”. ²⁹ Inyiahahi Petero ko kuna cio kude ojo, “ocam ohoi ningo Lobanga ida cio! ³⁰ Lobanga lo fafaico kuniyang litibuhu Yesu to wei lafa lifade ite to gurohino iyo kete. ³¹ Otinge Lobanga inyi ngati lo iteten nenge ara kabu ko kalwahani ojir inyi icio kirwo ko laa lo kipal diho Israel. ³² Ohoi sadeni kulo kuno sangite, ara manyu Okorif na Inyu saden na licio Lobanga diho cio kuna loningo inyi”. ³³ Koloningiti ji oto ilongoho bebe owahiti kifadaru jayona. ³⁴ Ati owoju lobo parisini lorima cio bebe ara manyu katiyenani lo cik na lobara karana nengeGamaliel ketemoni lo lokiho ko jimitan ingohi iyari kuno cio oleng to ketemoni lo lokiho to tik lobo sidi. ³⁵ Oto ifurahi icieng ojo, “cio kulo Israel, iiyoto re otoc tohi na liwak ite kitiyo iyo kuno cio. ³⁶ Kude faritin afa owoju Teudas ojo ara inyi lobo tungani, oto cio mia ongon ijif inyi, ofwonu ifadari inyi isara kajifitak kunenge olotu tenya nenge fad ida ara lobo tohi. ³⁷ To kifwongi nenge olotu Judas lo Galilea kuna faritin likenarihin ciokitiremo imiri, ofwonuni manyu ifadari inyi isara kajifitak kunenge fad. ³⁸ Dong tone tenya lo jija ajo nan diho ite ingohiti kuno cio. Ingohi to fwori! Tonyio kalara ene tenya ko tic na litiyo icieng lo cio, icung ca. ³⁹ Ati kalara lo Lobanga ida ca ite itum kitiho kuno cio, irumu ca ite jimitan itiremo ite Lobanga”. ⁴⁰ Otaf tenya nenge icieng. Icieng ko kilolonguno jayona kaji, itilumi, kocihati icieng ojir ida itiyenati to karana lo Yesu ko lahahino icieng. ⁴¹ Ofwo jayona to lokiho to kwama tonyio kikeni icieng ara cio kuna locam rumuno riri to karana lo Yesu. ⁴² Faritin ko faritin to kaji lo Lobanga manyu to kajihit ko kajihit ida icieng icung kititima ko kitiyena layomit na ijir jimitan Yesu inyi Kristo.