1 Langun liruhiti jimitan ojir ohoi kifwo iya Itali, icori Paul ko mabusi kunakude diho lahitok lo asegere na lobara Julios na longon iyo ilulung lo asegere kuna lilolongoti ojo kulo Agusto 2 Kirutohi ohoi iyo babur na lolotu to Adaramitium na loloro lohitawarihin kulo baburi kuna longon kof lo Asia, ohoi ko kicaha lotita. Kilik ko Aristakos na lara tungani lo Tesolonika. 3 Kiwanyi nenge kigoru Sidon oto Julios to jiran nenge diho Paul iruk lahahino inyi loro diho morot kunenge lo rumuno lwaha. 4 Tijia kikwangaru nam ari kifwo to orof lo Saipras tonyio orumu kiyoma kitang ohoi. 5 Langun lohikwangaru ohoi nam na itada lohingerihi tode lo Cilicia ko Pampilia kifwonu kiwoita Miria to Licia. 6 Tinyia orumu lahitok lo asegere babur lo Aleksandria na loloro Itali ko kitirwohohino ohoi. 7 Kifwo ohoi cafi to faritin beciek kigoru Cindus to golun. Kalitik kiyoma ohoi fworo ketemoni kifwo ohoi to korwong lo Kret na lisiran ko Salmon. 8 Kitotol ohoi kutuk lo nam to golun ko fwonuno lobo faji lobara Lohikorihin kuna Ijir na lonyiha ko kang lo Lasea. 9 Lofwo faritin beciek manyu litibanga lotita to babur tonyio lara ofahin kulo kifwongi lo karama oto Paul osony icieng ojo, 10 “Rei, adeu nan jimitan loloro owele niyang rohojun na lotum kitirioro babur, sangite ko kenite kuniyang”. 11 Ati na ngoning lahitok lo asegere tenya lo Paul olo oning tenya lo kanirani ko monye lo babur. 12 Tonyio ida icieng owak kitongo na faji to furat ojo ojir kisodoro lotita many Poeniks kifwo kikeru furat ijia na lara faji na longon Kret na lodeya orof ko ngati lo kai lo lodoyorore lo kolong.Kuyama to katwa lo nam 13 Kaliciak kiyoma kuta to ngati lo orof oto icieng ibuha ojo lohirumu icieng tohi na lowak icieng, oto icieng otinge kigingi ko kiciaha kitikwanga babur ijifita kalele lo Kret 14 orihe ida iyaru tihi beciek, olotu kiyoma na igol noo to tode iya katwa lo nam. 15 Okute dong kiyoma babur to tiriginy iya katwa lo nam na itada na lida otum kibeluno iya tiriginy. Ohoi fad ko ngerihino babur isabitare kiyoma. 16 Kolohifwo ohoi to korwong lo lobo cula sidi lobara Kauda, ida dong kitum kitikwanga tigol. 17 Langun lipihu icieng tigol kai katwa lo babur, oto otori babur to kofi ojir ida isara. To bangun jimitan itang cia babur singeti lo tode Sairtis kalifeita noo olahuni kyela na longon kai lo babur ingohini dong babur olot jii. 18 Kitang kiyoma ohoi tona igol noo ojo owang iciak katiyok kibiro sangite to babur katwa lo nam. 19 Far lo uni iciak icieng kibiro sangite kulo tic lo babur katwa lo nam to kac kuneicieng. 20 Kalida kolong kode kanger oboto faritin beciek na losodoro kiyoma itijik tona irohoi kitiri dong ohoi kigeno lo lwahuno tur. 21 Langun litong cio faritin beciek na lida onyai ko lobo daha, owoju Paul owoita ketemoni neicieng ojo diho icieng, “rei ngara ining ite tenya nei ida kiwoju to Kret, jii ene kipalaru ko denyaru lo sangite oru. 22 Ati jija ahirihohi nan ite jimitan itigoloto taulo tonyio ida cia lobo tungani to kiji ningi ori, babur keken cia lipalaru. 23 Adi karwe olotu malaika lo Lobanga nei na lara nan karwaani nenge owoita ketemoni nei 24 ojo diho nan, “kebang Paul ilo cia isi iwoita lokiho ketemoni lo Cesar manyu Lobanga to kisa nenge, lohicio isi warun lo kuno cio fad lohilot ko isi!” 25 Tona itigoloti taulo rei tonyio angon nan ko kiruk diho Lobanga jimitan itiihino cia iya na lotenyare inyi diho nan. 26 Oto hati kitang cia ohoi lobo cula lo kof. 27 Karwe lo tomon ko ongon orihe orumu kiyoma kisabitare ohoi nam lo Adriatik, okobu katiyok kulo babur jimitan lohinyiha kof langun lara tuk lo karwe. 28 Kolotem icieng kiluko lo nam, orumuni ojo ongon futi miya lobito ko keek are. Ofwori manyu lobo gaa otemi ari orumuni ara keek mietangon. 29 To bangun jimitan kitang cia morutok ibirohi icieng kigingihin ongon to ngati lo kifwongi lo babur ilifati dong ojo ngowang hati. 30 Lotema rwaru to babur ibirohi katiyok kulo babur tigol katwa lo nam lo kitinononga jimitan kifworo icieng kibirohino kigingihin kuna kude to kocehe lo babur. 31 Oto Paul orihohi lahitok ko asegere kunenge ojo, “kalida kuno cio itongo katwa lo babur, oru lwaharu diho ite”. 32 Oto asegere ko nguto kofite na liniefita tigol ico tigol odoi katwa lo nam. 33 Langun logoru tomorong otan Paul icieng ojo ojir odahati, ojo diho icieng, “to faritin tomon kongon kuna loring ingoni ite ko kiudo ida ite linyia lobo daha. 34 Jijia ajo nan diho ite itonyia daha ojir iwarare oru lobo bito to kiji ningi cia litiri kileng fofiti lo kwe”. 35 Langun lojo jii kodumuno mugati ko kicwara kwama diho Lobanga to ketemoni neicieng ko benya iciak daha. 36 Itigol inyi taulo kuneicieng fad ko kiciaha manyu daha. 37 Kira orumu fad 276 to katwa lo babur. 38 Kalonyia icieng daha na lowak icieng fad oto ititawahi babur to kibiroro okodoho kulo ngamang namhatwa. 39 Langun lowang kof, ida icieng oheru na kof ati odeuni tode ko singeti faji na lowak icieng kitiwoitahinore babur. 40 Ongute icieng kigingihin fad ongerihi katwa lo nam, olahari kofi kuna lotor lohinirare lo babur ko lohahino kiela lo ketemoni ife dong babur iya tiriginy lo kof. 41 Ati itang babur dujan lo singeti ko woita. Inief locolo lo babur na lida odumuno. Oto kifi kuna locula kuyama obore babur. 42 Owak asegere kifadaru mabusi ojir ida ikwangaroti orwari. 43 Ati orumu lahitok owak kitiwara Paul oto itik icieng kitiyo iya na libuhare icieng. Orihohi inyi cio kuna loyen kikwanga ojo ojir item katwa lo nam ikwangaroti tode. 44 Ojo dong ojir otonge kulo cio odumu bauhin kuna logiluno to babur ikwangarorehin. Tona orang cio fad tode