¹ Langun lohingon ohoi tode, lohifwonu kirumu jimitan obara na cula lo kof Malta. ² Kifotu cio kulo na kof ohoi to jiran nahitok. Inohahi icieng kima kilolonguni ohoi rafa tonyio orumu kuju oca irobi manyu kof noo. ³ Icohuno Paul caha ibirohi kimatare oto munu lokuruba na lifuhu nohun lo kima ititirahino kana nenge. ⁴ Kolodeu cio kulo na kof munu ililito to kana lo Paul, oto ojimi ake ake, “ojir ene tungani ifade tungani tonyio kileng ngofur inyi to nam ida ngoto lo tenya iruk inyi owar” ⁵ Ati iwate Paul munu kimatare oru lobo tohi irohoi litiihino diho inyi. ⁶ Okodomo dong cio deya inyi kolouluno ken kode ouroro kof owei, ati ojo icieng itil tektek oru lobo tohi irohoi litiihino ken nenge, ibel icieng kweci kuneicieng ojo ara inyi lobanga. ⁷ Orumu ongon kang na lonyiha na lara lo Pabilos lahitok lona cula. Kifotu inyi ohoi kitong ohoi ijia faritin uni na lohiric inyi ohoi to kibaya lo tau. ⁸ Orumu monye omwai nohun ko oyorote olo Paul deya inyi langun lilifa ko fihahino kac kunenge ken nenge, ofurie inyi. ⁹ Langun litiihino ene, ofwonu kunakude kamwayak tona cula fad itifuriori icieng. ¹⁰ Kicori ohoi sangite beciek ojo manyu lohirwok ohoi babur kiciori ohoi sangite fad kuna ngohilwak ohoi. ¹¹ Langun lohikeru ofahin uni kirwok ohoi lobo babur lo Aleksandria na lorumu itongo furat inya na cula. Ikukumi na babur ofihi ko kitiriri lo kweci kulo lobangahin turot kuna lojimi Kastor ko Poluk. ¹² Kiciak ohoi to Sira Kos langun lohitong ijia faritin uni. ¹³ Tijia kiciak ohoi kikwangaru kigoru Regium. Kiwanyi nenge olotu kiyoma to orof kigoru lobito far nenge Puteoli. ¹⁴ Kirumu ohoi kude recera ijia ojimi diho ohoi ojir kitong ko icieng sabit lobito. Ohoi ko fwonunore Roma. ¹⁵ Koloning recera tijia ojo kifwonuno ohoi ofwonuni many cuk lo Apius ko lobo faji lilolongoti ojo kajihit kulo Welo Uni kitirico ohoi. Kolodeu Paul kuno cio oto okwama Lobanga noo tau nenge manyu ko golun. ¹⁶ 16 Kolohigoru ohoi Roma iciori Paul itongo ake ko asegereni na liriria inyi. ¹⁷ To korwong lo faritin uni ilolongu Paul lohitwaha kulo Judeahin. Langun lotubuno icieng, ojo Paul diho icieng; “recera kunei, kileng lida nan atii lobo kipal diho cio kuniyang, kiniefuni nan to Jerusalem kiciorihini diho gala kulo Roma. ¹⁸ kitifi icieng nan kiwahiti lahahino nan tonyio ida orumu nan apal lobotohi na ngocam kifadarorehin. ¹⁹ Ati ojo Judeahin oberu kifudahi dong nan tilo Cesar ida ara lo jimitan angon nan ko tenya na ngadorore cio kunei. ²⁰ Tone tenya ahilolongore nan ite lo tenya ko ite. Ara to kigeno lo Israel kitorarihin nan to kuno nyororo”. ²¹ Inyiahahi icieng ojo, “ida ohoi lohirumu lobo waraga to Judea to tenya lo ken nino manyu ida lobo lo kuno recera lofwonu tijia kirihohi ohoi lobo tenya irohoi ro ken nino. ²² Ati kiwak ohoi ningo nyio kibuha nino tonyio kiyen ohoi jimitan otenya cio fajihit fad tenya lone ilulung”. ²³ Ikukum icieng kirico ko Paul lobo far ofwonuni ara kuna iborengi bebe faji na litongore inyi. Many to kiwanyi many kurou ititim inyi orihohi icieng tenya lo okabwe lo Lobanga. Manyu otem inyi kitinianga icieng to ken lo Yesu iyo kigeriti kulo Moses ko kulo kamocak. ²⁴ Iruk kude tenya na lotenya inyi ati oberu kude kiruk. ²⁵ Opeha icieng ake ake ko kisaritati langun loteny Paul diho icieng ojo, “oteny Okorif na Inyu to kutuk lo Isaia iyo fafaico kuningi ojo, ²⁶ Ilo diho kuno cio torihohi icieng ijo Ira cia ite kaningok ida iniang Ira kadeyak ida iheru ²⁷ tonyio litotiho taulo lo kuno cio Ida itweru ningoti to kiyoha kuneicieng Manyu limuhi konyeha kuneicieng Igo ca odeyati to konyeha kuneicieng Oningo to kiyoha kuneicieng Iniangiti to taulo kuneicieng Ibeloti ato nan atifurie icieng. ²⁸ Tona awak nan ite iyen jimitan licori lwaha lo Lobanga diho misiok manyu oning cia icieng! ²⁹ Langun loteny inyi jii isara Judeahin orisati noo ake ake. ³⁰ To karihin are fad itongo Paul ijia iyo kaji nenge na lipanga inyi ofwonunita cio waja inyi ijia. ³¹ To ngere manyu na loru ko riri ititima inyi Okabwe lo Lobanga manyu itiyena tenya lo Yesu Kristo