¹ To kifwongi lo faritin uni na lolotunore Festos iyo kof na lolanyu inyi, owoju inyi to Cesaria olo Jerusalem. ² Ofwonu kadwarak kunahitoha ko Judeahin fad ketemoni nenge iyauni tenyi tenyi kuna lidorore icieng Paul. ³ Oto icieng otan Festos bebe ojo ojir inyiahuni Paul iya Jerusalem tonyio orumu icieng ikukumahino lo rauno ko kifadaru inyi to kikoi. ⁴ Inyiahahi Festos icieng ojo, “otora Paul Cesaria aloro manyu nan ijia to kuno faritin. ⁵ Ingohi kude kabolorok kuningi ofwo kifura ko inyi ijia kalitii afa inyi lobo tohi irohoi. ⁶ Langun lokeru faritin tomon ko icieng, olo inyi iya Cesaria, kiwanyi nenge ko tubahino lokiho ko kicwara iyauni Paul ketemoni nenge. ⁷ Kololotu Paul, oto Judeahin kuna lorumu ofwonu to Jerusalem owoita iriti inyi ko kiciaha kidoro inyi to tenyi tenyi beciek. ⁸ Oto Paul inyiahahi kifura ojo, “oru lobo tohi irohoi latii nan iyo cik lo Judeahin kode iyo kaji lo Lobanga kode diho Cesar”. ⁹ Iya na lowahare Festos kitikwama Judeahin ojo inyi diho Paul, “iruk isi loro Jerusalem lo loro kifura kuno tenyi tenyi ketemoni nei ijia?” ¹⁰ Inyiahahi Paul ojo, “Awoita jija nan ketemoni lo lokiho lo Cesar na locam ongoti tenya nei. Ida nan atii lobo tohi diho Judeahin iya na liyenare isi to ken nino otoc. ¹¹ Kode kalatii nan lobo kipal locam to wei, ida nan aberu wei. Ati kalara kuno tenyi tenyi lohidorore kuno Judeahin nan talerun, oru lobo tungani lotum kifotohino nan kac kuneicieng. Atil nan Cesar! ¹² Langun itiric Festos tenya to kof ko lohitwaha kulo lokiho nenge, ko jimitan diho inyi, “Litil isi Cesar. Iloro isi diho Cesar. ¹³ To faritin kude kuting to kifwongi olotu Kabu Agripa ko Berenik Cesaria kifotuno Festos ¹⁴ tona litongore icieng faritin kuna iborengi ijia, orij Festos tenya lo Paul ko Kabu. Ojo inyi, “ongon lobo tungani ene longerihi Feliks mabus. ¹⁵ Lafar kalalo nan Jerusalem ofwonu kadwarak kunahitoha ko lohitwaha kulo Judeahin iyauno tenyi tenyi kulo kidoro inyi ketemoni nei ojo ojir nan angotohi inyi wei. ¹⁶ Arihohi nan icieng ajo ida ara koditi niyang lo cio kulo Roma lo kicwara tungani ifadari na lida owoita lokiho ko kadorok kunenge ititim to kutuk nenge kiji lo cio kalara dede. ¹⁷ Kolofwonu lafar icieng ene, ida nan atirung na tenya ati alolong nan lokiho kiwanyi nenge ko rihohino iyauni na tungani. ¹⁸ Ojo kadorok kunenge owoju tenya, ida manyi icieng idor inyi to kipalipali kuna lorumu nan akodomo. ¹⁹ Ati ara kude tenyi tenyi kulo peha lo ngati lo dini neicieng ko lobo tungani afa lowei lojimi Yesu na lojo Paul owar. ²⁰ Kilanyu dong nan kingingija tenyi tenyi kuna lori iya kuna, alotu nan atifi inyi kaliruk loro woita lokiho to kuno tenyi tenyi Jerusalem. ²¹ Kolotil Paul Cesar ara kangotoni lo tenya nenge, ajo dong nan ojir itongo manyu far na ngacularore nan inyi diho Cesar”. ²² Oto Agripa ojo diho Festos, “awak nan ningo ene tungani to ken nei”. Inyiahahi inyi ojo, “ining cia isi inyi kiwanyi”. ²³ Kiwanyi nenge, ofwo oho Agripa ko Berenik to deyo nahitok ko rutoroti kaji lo lokiho ko kulahitoha kulo asegere ko kabolorok kulo na kang. To ciha lo Festos iyauni Paul. ²⁴ Ojo Festos, “kabu Agripa ko cio pili kuna lohingoni ko ohoi ene ideu ite ene tungani! Cio kulo Judea fad lohitani nan to Jerusalem ko ene Cesaria iromitati jimitan ojir ida ingohini owar. ²⁵ Arumu nan oru lobo tohi litii inyi na ngocamare inyiwei, ati to Tilo inyi kalanyunoni abuk nan cularu inyi iya Roma. ²⁶ Ati oru lobo tohi na ngagere nan diho kabu tonyi. Tona ayauno nan inyi ketemoni ningi bebe hati ketemoni nino kabu Agripa ojir to korwong lone kingingija, arumu tohi na nagger nan. ²⁷ Tonyio aii nan ida ocam to cularu mabusoni ketemoni ida ititim tohi na lidororehin ninyi.