¹ Koloring faritin miet olotu kadwarani lahitok Ananias iya Cesaria ko kude lohitwaha ko lobo katibibilani lobara Tertulus ko kiyaunoti kidoro neicieng na lidorore icieng Paul ketemoni lo gavuna. ² Kalilolonguni Paul lokiho, iciak Tertulus kiyauno kidoro nenge ketemoni lo Feliks; ojo, “lohitenu ohoi kisiliban bebe to obolore nino manyu liyauno genyun nino kibebelita kuna ijiri ene kof, ³ fajihit fad manyu to kikohin fad kiiunita ohoi tic nino to kwama lahitok Feliks. ⁴ Ati ilany kitiniama isi to tenyi tenyi becek, alifa nan jimitan kining ohoi lobo gaa. ⁵ Kirumu ohoi lerok ara katigemani na lititubo ko kitiremorita cio to kiji lo Judeahin to kofi kofi fad. Inyi lobolojohi kuno cio lojimi Nazareni, ⁶ manyu otem kitibota kaji lo Lobanga nahitok inyi licio ohoi kinief inyi [orumu ohoi kiwak ngotohino inyi tenya to cik niyang. ⁷ Ati olotu lahitok lo asegere Lasias oruje inyi to kac kuniyang to golun ⁸ manyu ocik ojo ojir kadorok kunenge ofwonu kidoro ketemoni nino]. To kitifia inyi to ken nino, itum cia isi iyen tenya lo dede lo kuno kidorita lohiyauno ohoi ken nenge. ⁹ Iruhohi Judeahin fad jimitan ara kuno tenyi tenyi kulo dede ¹⁰ Kaliwat gavuna inyi ojo ojir otenya. Inyiahahi Paul ojo, “ayen nan jimitan to karihin beciek ira isi kangotoni lo tenya ene kof inyi licio nan afura tenya nei ketemoni nino to kwama. ¹¹ Itum isi ideu jimitan to faritin tomon ko are kuna loring alo afa nan Jerusalem kiwora Lobanga. ¹² Ida kadorok kunei kirumu nan arisa ko lobo tungani to kaji lo Lobanga kode kititubo cio to lotubarehin kode lobo faji to kanghatwa. ¹³ Manyu ida icieng otum kitotoruno lobo tohi ngitigol kidoro neicieng. ¹⁴ Otohati, aruk nan jimitan awora nan Lobanga lo monyeri kuniyang to rahun kajifitani lo kikoi lo Yesu na lojo icieng ilulung. Aruk nan sangite fad kuna lijifita cik ko kuna liger kamocak ¹⁵ manyu atehita nan lobito kigeno ko kuno cio ojo ongon mute kibuhuno lo cio kuna ijiri ko kuna irohori. ¹⁶ Tona atema nan tiktik rica lo kibuha nei ara na inyu ketemoni lo Lobanga ko cio. ¹⁷ Langun latong nan oleng karihin beciek alotu nan Jerusalem kiyauno diho cio kunei sangite diho kakidahak ko kiyauno kicorita kunei ¹⁸ orumu nan latinyujoro na tik lohirumunore icieng nan kaji lo Lobanga atiyo jii. Oru orumu kude ilulung lohingon ko nan kode atigema nan kude cio. ¹⁹ Ati ongon kude Judeahin to kof lo Asia kuna locam to ngonun ene ojir ara icieng lohidoro nan kolongon ba lobo tenya kiji nei ko icieng. ²⁰ Kode kuno longon ene ingohi ititimi kipal nyio orumu icieng ken nei lafar lawoitare nan ketemoni lo lokiho. ²¹ Kalida ara tone tenya keken lagore nan ajo, “Ara tokibuhuno lo kaweyak kitiwoitarehin nan ketemoni ningi”. ²² Oto Feliks na loyen otoc tenya lo kikoi, ko kiticungo lokiho. Ojo inyi “Kololotu Lasias lahitok lo asegere, akeru cia nan tenya nino”. ²³ Ocik inyi lahitok lo asegere ojo ojir iriria Paul ati icio manyu inyi kitongo ara na ibaya manyi ida itihi morot kunenge lwaha inyi. ²⁴ Faritin beciek to kifwongi olotu Feliks ko ngorwani nenge Drusila na litongo ara Judeani. Ilolongu inyi Paul oning iya idi lotenyare inyi tenya lo kiruk diho Yesu Kristo. ²⁵ Kolotenya Paul tenya lo nyujon, rica lo ken ko ngoto lo tenya na lolotuno, obang Feliks ko jimitan, “lotum re kuna to jija. Itum isi loro, kalarumu nan tik ahilolong cia nan isi”. ²⁶ Tolobo orumu manyu inyi okodomo ojo kicio ca Paul inyi robia tona ilolongita inyi Paul kakeny becek tenya ko inyi. ²⁷ Koloru karihin are, oluny Procios Festos faji lo Feliks ati tona lowahare Feliks kitikwama Judeahin ingohi inyi Paul mabus.