¹ Ode Paul lokiho tok ko jimitan, “recera kunei, latii nan tic diho Lobanga to tau nei fad ko jija”. ² Tona arihohi kadwarani nahitok Ananias cio kuna lonyihaha diho Paul ojo ojir onangi kutuk nenge. ³ Oto Paul ojo diho inyi, “kibok cia Lobanga isi ene liri iya lohitir na ikwe. Itongo isi inya lo ngotohino tenya kwe nei to cik, isi manyu igila cik to rihohino jimitan ojir kinangi nan! ⁴ Oto kuna lowoita onyiha ko Paul ojo, “ida isi ibang moro kadwarani lahitok lo Lobanga?” ⁵ Inyiahahi Paul ojo, “recera ida orumu nan ayen jimitan ara inyi kadwarani lahitok tonyio igero ojo, “ketenya tenyi tenyi kuna irohori ken lo kalanyunoni lo cio kuningi”. ⁶ Oto Paul koloyen jimitan ara kude kuneicieng Saducihin kude Parisihin ko jimitan to ketemoni lo lokiho,”recera kunei ara nan Parisini kito lo Parisini. Kitiwoitati nan ene to kigeno na langonore nan iyo kibuhuno lo Kaweyak. ⁷ Kolojo inyi jii, iciak lohitwaha risa to lokiho kiji lo Saducihin ko Parisihin oto lokiho okora. ⁸ (ojo Saducihin oru kibuhuno manyu ojo oru malaikahin kode okorifi ati iruk Parisihin icieng fad). ⁹ Oto obolo kigorita noo, manyu kude katiyenak kulo cik kuna lara Parisihin ko wojuno opehati to golun ojo, “ida ohoi kirumu lobo kipal diho ene tungani. Adi ngara okorif kode malaika lotenya ko inyi? ¹⁰ Oto ngolofa obolo noo icio lahitok lo asegere obang ojo ocirari ca Paul arus arus. Ocule inyi asegere lo fworo rujuno inyi diho icieng ko kiyauno inyi katwa lo kang lo asegere. ¹¹ To karwe owoita Lahitok ketemoni lo Paul oto ojo diho inyi, “Itigolo tau! Iya na litisadenare isi nan ene Jerusalem, ojir many ilo isaden to Roma”. ¹² Kiwanyi nenge otor Judeahin tenya manyu ibutiati jimitan ida icieng kinyia daha kode kimat kifi many kolohifade Paul. ¹³ Cio kuna logal keek ongon limor kenite diho ene kivita . ¹⁴ Oto ofwori diho kadwarani lahitok ko lohitwaha ojimi diho icieng, “lohibuti ohoi jimitan ida kidaha many kolohifade Paul. ¹⁵ Jijia isi ko lokiho itotan lahitok lo asegere ojir iyauno inyi lo kitinononga jimitan kiwak ningo tenya nenge otoc. Kikukumahino ohoi lo kifadaru inyi orihe ida logoru ene”. ¹⁶ Ati koloning kito lo kanece lo Paul ene tenya lo kivita neicieng, olo iya kang lo asegere orihohi Paul. ¹⁷ Oto Paul ilolongu lobito to kiji lo kulahitoha kulo asegere orihohi inyi ojo, “Yaru ene kito lokilahaji diho lahitok, ongon tenya lowak rihohino inyi” ¹⁸ Oto ko kiyaru inyi diho Lahitok. Ojo na asegereni hitok diho lahitok neicieng, “kilolong mabusoni Paul nan ojo ojir ayauno ene kito lokilahaji diho isi tonyio ongon tenya na lowak inyi rihohino isi”. ¹⁹ Inief lahitok lo asegere kana lo na lokilahaji ko kingadaru kalele ko inyi, oto itifi inyi ojo, “nyio tohi iwak isi rihohino nan?” ²⁰ Ojo inyi, “liruk Judeahin tana isi lo kiyaru Paul lokiho kiwanyi lojimitan kiwak ningo tenya nenge otoc. ²¹ Keruk tenya neicieng tonyio ongoni cio kuna logal keek ongon raa inyi kikoi. Libuti icieng lo jimitan ‘ida kidaha kode kimata many kolohifade inyi’. Likukumahino icieng jija itilati kiruk nino keken”. ²² Ocik lahitok na kito lokilahaji ojo, “ilo ati kerihohi lobo tungani jimitan layen nan ene tenya”. ²³ Inyi ko kilolonguno kulahitoha kulo asegere are ko rihohino icieng ojo, “ikukumahiti asegere miya are, kafeitak lo lakwenyi keek mietare ko monyeri kulo feria mia are ojir ofwo iya Cesaria ca tik uni lo kurou ²⁴ Itirumu lakweny iyo Paul ojir iyari inyi ogoru ara na ijir iyo Feliks”. ²⁵ Iger inyi ene waraga, ²⁶ Nan Kalaudios Lasias Afonyo nan isi lahitok Gavuna Feliks. ²⁷ Inief orumu Judeahin ene tungani na lowahiti kifadaru alo dong nan ko asegere kunei ko lwahuno inyi tonyio orumu nan aning ojo ara inyi Romani. ²⁸ Awak orumu nan yenun tohi na lidorore icieng inyi, ato nan ayauno inyi diho lokiho neicieng. ²⁹ Alotu nan arumu jimitan ara na kidoro neicieng to tenya lo cik neicieng ati oru lobo tenya na ngocam to kifadaru kode tora inyi. ³⁰ Kolohirihohini nan kivita lo Judeahin lo kifadaru inyi, nan ko culuno inyi diho isi deu deu. Arihohi manyu nan kadorok kunenge jimitan ojir iyauni kidoro neicieng ketemoni nino. ³¹ Asegere ko kitiyo iya na lociharihin icieng iyari Paul to karwe ko kiyaunoti inyi many Antipatris. ³² Kiwanyi nenge, ingohini kuna lifeita to lakwenyi osodoro ko inyi oite kunakude iya katwa lo kang lo asegere. ³³ Kologoru kafeitak to lakwenyi Cesaria, ico icieng waraga diho Gavuna ko kifotohino Paul diho inyi. ³⁴ Oto gavuna iken waraga itifi inyi kof loreunore nenge. Koloning ojo ara inyi tungani lo Cilicia ³⁵ ko jimitan diho inyi, “Aning cia nan tenya nino kologoru kadorok kunino ene”. Oto ko ciha ojo ojir Paul ofihi kaji lo Erod manyu iriri inyi tijia.