¹ “Recera ko monyeri kunei, itining jija kifura nei”. ² Koloning icieng inyi otenya diho icieng to Aramaic oto ko buhoroti ning. Oto Paul ojo, ³ “Ara nan Judeani na lohitomonohini Tarsas kof lo Cilicia ati abolorohi nan ene Jerusalem. To lohikenare lo Gamaliel kitiyeni nan otoc iyo cik lo fafaico kuniyang manyu angon afa nan ko lakaye lo kitiyo tic lo Lobanga iya na lingonore ite jijia. ⁴ Atigema afa nan kajifitak kulo ene kikoi lo Yesu many ifadari aniefa rei ko ngorwo atorahita mabus ⁵ iya na ngitisadenare kadwarani nahitok ko cio kulo lokiho fad. Arumu manyu afa nan waraga diho icieng na lalorore Damaskas diho recera kuneicieng lo kiniefa kuno cio ko kiyauno icieng Jerusalem ara mabusi ojir itigemi. ⁶ To kil lo far langun lanyiha nan Damaskas, deu deu oto wangun na igol bebe olotu to kai kirit nan. ⁷ auroro nan kof ato ko ningo ogoro na lojo diho nan, “Saul! Saul! Nyio kitigema isi nan?” ⁸ Atifi nan ajo, isi ngai Lahitok? Inyiahu inyi ojo, “nan Yesu lo Nazaret na litigema isi”. ⁹ Odeu kalihitak kunei wangun ati ida icieng iniang ogoro lo na lohitenya ko nan. ¹⁰ Atifi nan ajo, “ngatii ha nan nyio Lahitok?” Ojo Lahitok diho nan, “towoju ilo katwa lo kang lo Damaskas. Tijia kirihohini cia isi sangite fad kuna locam isi itii”. ¹¹ Kirik kalihitak kunei nan to kana kiyari kanghatwa lo Damaskas tonyio lohitingod orumu kwerun lo nu wangun nan ¹² Olotu lobo tungani lobara Ananias diho nan. Ara orumu inyi karicani lo cik na igol na liwora Judeahin kuna longoni ijia. ¹³ Owoita inyi kirieha ko nan oto ojo, “rece Saul todeya!” Gaga tinya ato nan ko deya adeu inyi. ¹⁴ Oto ko jimitan diho nan, “lohinyumu Lobanga lo monyeri kuniyang ici lo yenun wahun nenge manyu lo deya inyi Na Ibir, ko ningo tenya to kutuk nenge. ¹⁵ Ira cia isi sadden nenge diho cio fad to tohi na lideu isi ining manyu. ¹⁶ Manyu jijia itila isi nyio? Towoju kibatisi ilalari kipalipali kunino to kilolongo karana nenge. ¹⁷ Langun laitu nan Jerusalem manyu alo kilifa kaji lo Lobanga, kinief ilulue nan. ¹⁸ ko deuno Lahitok kitenya ko nan ojo, “deu tongerihi erusalem deu tonyio ida cia iruhiti sadden nino to nan”. ¹⁹ Anyiahahi nan inyi ajo, “Lahitok oyen kuno cio ojo alot afa nan to lobito lotubare iyo lobito kiniefa ko lumo cio kuna liruk isi. ²⁰ Manyu lafar litiijarihin okoto lo sadden nino Steven awoita afa nan ijia manyu asisio wei nenge arica kyelani kulo kafadak kunenge”. ²¹ Oto Lahitok ojo diho nan, “ilo ahicule ca nan isi faji na iloma kiji lo misiok”. ²² Oning ilulung Paul many langun lojo inyi jii. Oto ko kigororoti to ogoroho kuna ikwati ojo, “itidume inyi tone kof. Ida inyi ocam to warun!” ²³ Kaligorita icieng ibiroti kyelani kuneicieng manyu orwacati feur kai. ²⁴ Ojo lahitok lo asegere ojir iyari Paul katwa lo kang lo asegere. Ocik manyu ojo ojir olumi inyi ojir otulu nyio lico kuno cio igorita diho inyi jii. ²⁵ Kalotori inyi to kiyene lowahiti lumo, ojo Paul diho lahitok na lowoita ijia, “iruk jimitan ojir olumi tungani Romani na lorihe kipal nenge ida oboto?” ²⁶ Koloning na lahitok jii ko loro rihohino kalanyunoni neicieng ojo, “nyio iloro isi kitiyo? Ara ene tungani Romani”. ²⁷ Lahitok ningon jii ko loro diho Paul itifi inyi ojo, “Kirihohi nan, ira isi Romani?” Inyiahahi Paul inyi ojo, “Ibo ara nan”. ²⁸ Oto na lahitok ojo, “Adum nan robia kuna iborengi noo lo Kiroma”. Ojo Paul diho inyi “ati kitomonuni nan ara Romani”. ²⁹ Kuna lorumu ikukumahino lo kitifia inyi ko kingadaru deu deu kileng lahitok token lorienya kololotu odeu jimitan ator inyi Paul tungani lo kof lo Roma to nyororo. ³⁰ Kiwanyi nenge iya na lowahare lahitok lo asegere kingingijuno tenya na lidorore Judeahin Paul, olak inyi manyu orihohi kadwarak kuna hitoha ko lokiho fad ojo ojir otubunoti. Oto ko kiyauno Paul itiwoitahi ketemoni neicieng.