¹ Langun lohiruju ohoi kenite diho icieng, ohoi ko kirwohoro babur ko kikwangaru tiribiny iya Kos. Kiwanyi nenge kifwo Rodes tijia iya Patara. ² Kirumu babur na longotoro iya Poenika ohoi ko kirwoho ko kikwangaru. ³ Langun lohideu Saipras kikwangaru iya orof nenge kifwo iya Siria. Kiwoita Taya faji na liticulohinore babur niyang sangite kuna lotinguno. ⁴ Ojo ohoi kirumu karuhok ijia kitong ohoi faritin mietare. To sonya lo Okorif orihohi icieng Paul ojo ojir ida olo Jerusalem. ⁵ Ati kolotuba faritin kuniyang, kisodoro ohoi ko owele niyang. Kinieme karuhok ko ngorwo ko tee kuneicieng ohoi to katwa lo kang, ojo ogoru kutuk lo nam kigung fad kilifa. 6 ⁶ Langun lohikeru ciha, kirwok ohoi babur oite icieng iya kang ⁷ Kisodoro ohoi ko owele niyang to Taya ko kiculohino Tolemis kifony recera kuna longoni ijia kitong ko icieng far lobito. ⁸ Kolohiwoju tinya kiwanyi nenge kigoru Cesaria. Kifwo kitongo kolo Pilip katitimani lo jiri, lobito to kiji lo kulafa mietare lonyumuni. ⁹ Ongon orumu inyi ko tee kariok kunenge ongon kuna lorihe ida oyemi kuna limoca. ¹⁰ Langun lohitong ohoi ijia kude faritin, olotu lobo kamocani lobara Agabus to Judea. ¹¹ Kololotu inyi diho ohoi oto odumu gas lo Paul otorare kac ko kejuha kunenge ake ake ko jimitan, “oteny Okorif na Inyu ojo, ‘iya ene otor cia Judeahin kulo Jerusalem monye lone gas icori diho misiok’” ¹² Kolohining ohoi jii ito ohoi ko cio fad kuna longoni na faji kitan Paul jimitan ojir ida olo iya Jerusalem. ¹³ Oto Paul ifotu ojo, “nyio icira ite igila tau nei? Akukumahino nan ida ara to tora keken ati to wei katwa lo Jerusalem to karana lo Lahitok Yesu. ¹⁴ Koloberu inyi ningo sonya kingerihi dono ohoi kijo, “ingohi wahun lo Lobanga itiihino”. ¹⁵ To kifwongi lone tenya, kikukumahino ohoi kifwo iya Jerusalem. ¹⁶ Kilihu ohoi ko karuhok kude to Cesaria kiyauni ohoi many kolo Nason faji na lohitongore ohoi, ara orumu inyi tungani lo Saipras manyu lobito to kiji lo karuhok katemok. ¹⁷ Kolohigoru ohoi Jerusalem kifotu recera ohoi to kwama. ¹⁸ Kiwanyi nenge Paul ko ohoi kulakude cio ko fworo deya Jems manyu orumu otuba lohitwaha fad. ¹⁹ Ofony Paul icieng manyu ititimahi ticitici pili kuna litii Lobanga to kiji lo misiok ara diho inyi. ²⁰ Koloningiti jii, omaj icieng Lobanga. Oto ojimi diho Paul; “ideu isi rece, Judeahin kuna lotum alifi liruk Lobanga, oto hati icieng fad oriciti cik. ²¹ Loning icieng ojo itiyena isi Judeahin fad kuna longon misiok jimitan ojir ida ijifitati Moses, ojir ida iliri tee kuneicieng kode ida ijifitati itidwari kuniyang. ²² Kidim cia ohoi aja? Ida cia icieng itifur ningo jimitan lilotu isi ²³ tona itiyo tohi na lohirihohi ohoi isi. Ongoni cio ongon ene diho ohoi kuna libuti. ²⁴ Yaru kulo leroha ifwo ko icieng imorihino iyo na kitinyujo neicieng manyu todum kuna sangite lowahiti diho icieng ojir ogitarihin. Oto cia cio fad oyen jimitan ara kuno tenyi tenyi lotenya cio to ken nino talerun, tonyio isi to ken nino ijifita isi cik. ²⁵ Ojo to misiok karuhok lohikeru afa ohoi kigerihino icieng waraga jimitan ojir ida onyai dahidahi kuna likumarihin, ida onyai tyang lo tohi na logori ara doro, ida onyai okoto manyu ongerihini ticitici kulo lomuna”. ²⁶ Kiwanyi nenge iyaru Paul kuna cio ofwo itinyuji kenite ara lobito ko icieng. Oto ko loro kaji lo Lobanga ciha faritin kuna licungore kitinyujo ko kicwara kikumi to icieng tolobito tolobito. ²⁷ Langun lofworo kuna faritin mietare rujon, ofwonu kude Judeahin lofwonu to kof lo Asia odeu Paul to kaji lo Lobanga. Ikarut icieng ilulung fad ko kiniefuno inyi ²⁸ Igoritati ojo, “cio kulo Israel kilwak ohoi. Ene tungani ene litiyena cio to kofi kofi fad beruno cio kuniyang ko beruno cik kone faji. Manyu liyauno inyi Girik kaji lo Lobanga kitibota ene faji inyu”. ²⁹ (orumu icieng odeu Tropimus lo Epeso ilihita ko Paul to kanghatwa ko koboti jimitan liyauno Paul inyi kaji lo Lobanga). ³⁰ Oto kang fad owoju, manyu ifeju cio to fajihit fad. Kiniefunoti Paul jii ko kipihoro inyi oleng to kaji lo Lobanga, manyu deu deu ko kigenoti lokolihin. ³¹ Orihe otemati kifadaru inyi, ogoru tenya diho lahitok lo asegere kulo Roma jimitan ituboro kang lo Jerusalem fad. ³² Inyi ko dumuno kude hitoha kulo asegere ko asegere ko kifejaru diho ilulung. Kolodeu katuborok lahitok ko asegere kunenge ko ngerihinoti lumo Paul. ³³ Olotu lahitok lo asegere inief inyi manyu ocik ojo ojir otori inyi to nyororohin are. Oto ko kitifia jimitan ara inyi ngai ko nyio itii inyi. ³⁴ Igore kude to ilulung lobito tohi kude lobo ake manyu tona lida lahitok lo asegere otum rumahinore tenya lo dede to kigorita, ocik inyi ojo ojir iyari Paul kanghatwa lo asegere. ³⁵ Kologoru Paul lohirwohi, obolo kituboro lo ilulung noo ico asegere otinge Paul ara tingoro. ³⁶ Igorita ilulung kuna lijifuno inyi ojo, “ifadeti inyi”. ³⁷ Kaliyaru asegere Paul lowahiti rutorore katwa lo kang neicieng, itifi inyi lahitok lo asegere ojo, “ngatum nan tenya lobo tohi diho isi?” ³⁸ Inyiahahi lahitok lo asegere inyi ojo, “itenya isi Ogirihe? Ida isi ira lafa Ijiptoni lititube kof orihei kasasuok alif ongon katwa lo kuny kude faritin afa?” ³⁹ Ojo Paul, “Ara nan Judeani to Tarsas to kof lo Cilicia tungani lo kof na igol. Lahitok kicio nan atenya ko kuno cio”. ⁴⁰ Kalorumu inyi kiruk lo lahitok lo asegere, owoita Paul kai lo lohirwohi ko kiwata to kana itibuk ilulung. Langun lobuhoro icieng fad, oto ojo diho icieng to Aramaic,