¹ Langun licung kituboro, ocule Paul tenya diho kajifitak ojo lokeru kisinga ko kitigolo taulo kuneicieng, ocik icieng ko loro iya Masedonia. ² Olo inyi ara katwa lona kof otenya tenyi tenyi kulo kitigolo lo taulo kulo cio olo many ogoru Girik. ³ Faji na lolotu inyi itong ofahin uni. Tonyio orumu Judeahin ivita inyi kolowak inyi kirwoho babur na loloro iya Siria, oto inyi ko itoro ara Masedonia. ⁴ Ilihita orumu inyi ko Sopeta kito lo Pirrus lo nafaji lojimi Berea, Aristokas ko Sekundos to Tesolonika, Gaius to Derbe, Timosi, Tisikas ko Tropimas to kof lo Asia. ⁵ Ofwo kuno cio ketemoni kitila ohoi to Toroas ⁶ Ati kirwok ohoi babur to Pilipi to kifwongi lo karama lo mugatihin kuna loru ibula manyu to kifwongi lo faritin miet kirumu kulakude Troas kitong ija to faritin mietare. ⁷ To far lo lobito lo sabit kituba ohoi ara lobito kilifa ko daha mugati. Ititima Paul diho cio tonyio owak orumu inyi lotita kiwanyi nenge osodoro inyi tenya manyu tuk lo karwe. ⁸ Orumu oborengi lomohin kajihit icadok kuna longon kai faji na lohitubare. ⁹ Lobo kito lokilahaji lobara Yutikas orumu itongo lotupulec lo kaji ogetoro. Iya na lotenyare Paul tek tek inyi manyu odiehino jio oto ko uroro to kaji icadok lo uni many kof ofwori inumuni lowei. ¹⁰ Olo Paul kof ourohino ken nenge imaruk orihohi cio ojo, “kebang, owar inyi!” ¹¹ Oite inyi kaji kai olo obeny mugati onyia. ¹² Iyaru cio na lokilahaji kang ara na iwar itigol na tenya taulo kuneicieng bebe. ¹³ Kitem ohoi fworo kirwohoro babur iya Asos faji na lohifwo rumunore Paul. Ikukum inyi ji tonyio owak orumu inyi loro ijia to kejuha. ¹⁴ Kolohitiric inyi ohoi to Asos ko kirwohuno babur kiring iya Mityelen. ¹⁵ Kiwanyi nenge kikwangaru kigoru tode lo Kios. Kiwanyi nenge tinyia kirang kigoru Samos ojo kiwanyi nenge kigoru Meletus. ¹⁶ Orumu Paul owak ojo ojir kiring to Epeso ojir ida kipapal faritin to kof lo Asia tonyio oruharu inyi iya Jerusalem ojir agoru to far lo Pentecost. ¹⁷ To Miletus ilolong Paul lohitwaha kulo kanisa lo Epeso. ¹⁸ Kologoru icieng oto ojo diho icieng, “iyen ite koditi lafa lamanyare nan ko ite many to kiciahi lo lotuno nei kof lo Asia. ¹⁹ Arwaa nan diho Lobanga to riejun ko kifi kulo konyeha kileng larumu kidak to kitigema lo Judeahin. ²⁰ Iyen ite jimitan ida afa nan ahingony ite lobo tenya na ngohilwak ite ati ahititimahi nan ite fad to kiji lo cio manyu ahitiyen ite to kajihit ko kajihit. ²¹ Arihohi nan tarany diho Judeahin ko Girik ajo ojir ibeloti diho Lobanga to kirwo manyu ojir iruhiti Lahitok niyang Yesu Kristo. ²² Manyu jija to rihita lo Okorif na Inyu aloro nan iya Jerusalem ida ayen tohi na lolo kitiihino diho nan ijia. ²³ Tohi na layen nan inyi jimitan kicik Okorif nan jimitan to kangite fad kitila mabus ko kidak nan. ²⁴ Iya na ida warun nei ara lobo tohi diho nan na logol inyi keruno angwala ko kimumuda ene tic lohicio Lahitok Yesu nan- tic lo kicwara saden lo layomit lo kisa lo Lobanga. ²⁵ Jijia ayen nan jimitan ida cia lobo to kiji ningi kulo cio kuna latitim nan tenya lo Lobanga diho ite kideu nan ari. ²⁶ Inyi licio ahirihohi nan ite tarany jija jimitan kolorii lobo tungani to kiji ningi oru okoto nenge to kwe nei. ²⁷ Tonyio ida afa nan angony rihohino ite wahun lo Lobanga fad. ²⁸ Iririati kenite kuningi ko twoli kulo kera kuna licio Okorif na Inyu diho ite ara kaririak. Itira katibalak kulo kanisa lo Lobanga na linyang inyi to okoto lo kito nenge. ²⁹ Ayen jimitan kalalo nan ofwonu cia lowohoho kuna ingati kiji ningi kuna cia lida ongerihi kera. ³⁰ Kokileng to kiji ningi ofwonu cia cio kuna litibahasa tenya lo dede owahiti rumuno kajifitak kuneicieng. ³¹ Tona iririati otoc! Ibuhati jimitan to karihin uni ida afa nan aticung kisinga ite karwe ko far to kifi kulo konyeha. ³² Jijia ahicio nan ite diho Lobanga ko diho tenya lo kisa nenge na lotum kifaha kiruk ningi manyu kicio ite bara lolunyot kiji lo cio kuna iborengi kuna litinyuji. ³³ Ida afa nan adam dab kode rial kode kyela lo tungani. ³⁴ Iyen ite to kenite jimitan kuno kac kunei lolwak kicwara nan sangite kuna lawak nan ko kuna lowak kalihitak kunei. ³⁵ To sangite fad kuna latii nan ahitotorohi nan ite jimitan to tic na igol jii ojir kilwak kakidahak, kiiunita tenya na loteny Yesu token nenge ojo, “ongon gum iyo kicwara ilany kifotuno”. ³⁶ Langun lojo inyi jii, ogung inyi kof ko icieng fad ko kilifa ³⁷ oto icieng fad icira ofonyi inyi imaruhi. ³⁸ Tohi na litime taulo kuneicieng noo, inyi ene tenya lojo inyi, “ida cia ite irihe ideu komom nei ari”. Kokilihunoti ko inyi iya babur.