¹ Kolongon Apolos Korint, olo Paul ara kangite manyu ogoru Epeso orumu inyi kude karuhok ijia ² oto itifi icieng ojo, “lirumu afa ite Okoif na inyu lafar ko liruk ite?” Inyiahahi icieng ojo, “oru, ida kileng ohoi kining ojo ongon Okorif na inyu. ³ Itifi Paul icieng ojo, “ani kibatisa hati afa irumu ite?”Inyiahahi icieng ojo, “kibatisa lo Jon”. ⁴ Ojo Paul diho icieng, “itongo kibatisa lo Jon ara kibatisa lo kirwo lo kiruk na lobotuno to omot nenge inyi Yesu. ⁵ Koloningiti jii ibatisi icieng to karana lo Lahitok Yesu. ⁶ Kolofik Paul kac kunenge kweci kuneicieng, olotu Okorif na inyu itifut icieng iciak icieng tenya to tenyi tenyi gele gele ko kimoca. ⁷ Orumu icieng ara cio rei tomon ko are. ⁸ Orute Paul lotubare ititim tenya ijia to ofahin uni itiyena to kirobi lo tau tenya lo okabwe lo Lobanga. ⁹ Ati oberu kude itipehati ko tenya tenya lo kikoi to itikaj oto Paul ko koraru diho icieng. Odumu dong inyi karuhok itiyena icieng to kaji lo kitiyena lo Tairanus. ¹⁰ Itii inyi jii to karihin are icio Judeahin ko Girik kuna litongo kof lo Asia oning tenya lo Lobanga. ¹¹ Itii Lobanga tanguhin kuna hitoha ara diho Paul ¹² oto ko tambarahin kulo kac ko kyelani kuna lotir inyi iyari diho kamwayak itifurie mwaita kuneicieng ko kifuharu okorifi kuna irohori to kenite kulo cio. ¹³ Kude Judeahin kuna lotem kifuhita lodonyiok to kenite kulo cio, otemi kitiyore karana lo Yesu iyo cio kuna longon lodonyok kenite. Otem icieng ojo, “to karana lo Yesu na lititima Paul ahicik nan isi lo rutuno”. ¹⁴ Kude tee kilahaji mietare kulo lobo Judeani kadwarani lahitok orumu idimati jii. ¹⁵ Lobo far inyiahahi lodonyohiti icieng ojo, “Yesu ayen nan manyu ayen nan Paul adi ite oho ngai ite?” ¹⁶ Oto na tungani lodaha lodonyiok ko kifirihino icieng, olanyu icieng fad. Ko lumo icieng ocire ko kyelani to kenite kuneicieng manyu ifejari to kaji longature manyu oiji siii. ¹⁷ Koloning Judeahinko Girik kuna longoni kof lo Epeso ene tenya inief bangun icieng bebe. Oto orimati karana lo Lahitok Yesu bebe. ¹⁸ Oto ciio kuna iborengi kuna liruk fad ko fwonunoti tarany otuli kipali pali kuneicieng. ¹⁹ Becek kulo cio kuna lara ibwonok iyauno buhi ko sangite kulo kilama ocurari to ketemoni lo ilulung. Kalimori wel lo buhi kuneicieng otum robia drakmas alif keek miet. ²⁰ Tona kikoi isarahi tenya lo Lobanga na kof fad manyu osodoro golun nenge. ²¹ Langun litiihino kuno fad, oto Paul iiu loro iya Jerusalem ara Masedonia ko Akaia. Ojo inyi , “langun lalo nan ijia owak manyu awaj Roma”. ²² Ocule inyi kalihitak kunenge are Timosi ko Erastos iya Masedonia. Otong inyi kof lo Asia to faritin kude kuting. ²³ To kuna faritin iciak kituboro nahitok iyo kikoi lo Kristo. ²⁴ Lobo kadongoni lo rial na lobara Demiterios na lidongo rial lo lopidinga lo lobanga na lara ngorwani na lobara Artemis orumu iyaunita robia kuna iborengi diho kadongok. ²⁵ Ilolongu inyi kuna kadongok fad ko kude kuna litiyo sangite kuna lori ko kuna ko jimitan diho icieng, “lwak iyen ite jimitan kirumunita ohoi robia becek tone tic. ²⁶ Manyu lining ite manyu ideu jimitan lerok lojimi Paul lisusu cio becek ten to Epeso manyu kof lo Asia fad ojo lobangahin kuna likukumi to kac ida ara lobangahin. ²⁷ Dong ongon bangun na hitok ida ara tone tic niyang keken ati kaji lo lobanga niyang na hitok Artemis itifiahi cia manyu inyi lobanga to ken na liwora cio to kof lo Asia fad ko kofi kofi pili itikaji cia golun ko kwatun nenge”. ²⁸ Koloningiti jii oto ilongojitati bebe iciahi kiromita ojo, “obolo Artemis lo cio kulo Epeso! ²⁹ Deu deu igore kang fad. Iniefu cio Gaios ko Aristokas cio kuna lilihu ko Paul to Masedonia ko kiburaroti iya lohisongare. ³⁰ Owak Paul loro ijia diho ilulung ati itik kajifitak inyi. ³¹ Kileng kunahitoha kulo kof kuna lara morot kulo Paul ocular tenya diho inyi jimitan ojir inyi ida olo lohisongare. ³² Ongoyahino ilulung, iromita kude lobo tohi kude iromita lobo tohi ake. Becek kulo cio kude ida oyen tohi na lotubu icieng. ³³ Ocule Judeahin Aleksanda ketemoni igorohi kude to ilulung kisinga diho inyi. Iwat inyi ilulung to kana ojir obuhoti atenya inyi. ³⁴ Ati koloheruni jimitan ara inyi Judeani oto igorori ara lobito to tihi kuna lotum are ojo, “obolo Artemis lo cio kulo Epeso”. ³⁵ Itibuk kageroni lo kang ilulung oto ojo diho icieng , “cio kulo Epeso, ida kof fad oyen jimitan Epeso lara karicani lo kaji lo Artemis ko lopidinga nenge lafa lodou to kai? ³⁶ Dong iya na lida ene tenya opehuno ojir ite ibuho ida iruk kitiyo lobo tohi. ³⁷ Iyauno ite kuno cio ene kileng lida obeli kaji kode omori lobanga niyang. ³⁸ Kolotehita Demiterios ko kaletok kunenge loguce kolobo tungani, ongaja lokiho manyu ongoni kangotok kulo tenyi tenyi. Otum icieng fworo kidoro. ³⁹ Kolongon lobo tenya ake liwak ite kiyauno ojir okeruni to lokiho. ⁴⁰ Ati jija kingoni ohoi ko bangun tonyio kitumiti kidoro ohoi jimitan kira katuborok tone tenya litiihino ene far. Manyu ngoru diho ohoi lofere na ngohititimare fotiri lone kiromita tona lorujore fotiri nenge”.