¹ To kifwongi ongerihi Paul Asens olo iya Korins. ² Tijia orumu inyi lobo Judeani lobara Akuila tungani lo Pontius, na lorihe olotu to Itali ko ngorwani nenge Priscila, tonyio orumu Kalaudio ocik jimitan ojir Judeahin fad owoju to Roma, olo Paul waja icieng ³ tonyio itoiyo icieng tic na iriworo lo kikukuma kemahin. Olo inyi itongo ko icieng itiyoti manyu ara lobito. ⁴ To sabit fad itoto inyi to lotubare lo kitiyena Judeahin ko cio kulo Girik. ⁵ Kolofwonu oho Sailas ko Timosi to Masedonia, icio Paul ken nenge iyo kititima ko kitiyena ko kicwara sadden iyo Judeahin jimitan Yesu inyi lara Kristo. ⁶ Ati kalitiris Judeahin Paul ko tenya diho inyi ara na lomoroti, irara inyi kyelani kunenge ketemoni neicieng ko jimitan diho icieng, “ingohi okoto ningi to ngon kweci kuningi. Lakeru nan tic nei. Kiciaha jija lalo dong nan diho misiok. ⁷ Oto Paul ko ngerihino lotubare ko loro kaji lobo lonyiha ijia kaji lo Tito Justo, kaworani lo Lobanga ⁸ Krispus kalanyunoni lo lotubare ko cio kulo kaji nenge ko kiruho tenya lo Lobanga ko cio kulo Korint beciek kuna loning inyi iruhi manyu ibatisi icieng. ⁹ Lobito karwe oteny Lahitok diho Paul to kitirija ojo, “kebang tosodoro tenya kebuho. ¹⁰ Tonyio angon nan ko isi manyu oru lobo tungani lotum kitibaha kode kiriafuno isi tonyio angon nan ko cio kuna iborengi katwa lone kang”. ¹¹ Tona itong Paul ijia kari lobito ko nusu itiyena icieng tenya lo Lobanga. ¹² To kuna faritin larahare Galio lahitok na lolanyu kof lo Akaia ofwonu Judeahin ara lobito kitiremo Paul ko kiyauno inyi ketemoni lo lokiho. ¹³ Ojimi, “Isusua ene tungani cio kiwora Lobanga to kikoi na lida ijifita cik”. ¹⁴ Orihe Paul ojo ngatenya, ojo Galio diho Judeahin, “ngara ene tenya lo tohi lobo irohoi kode lobo kipal liyauno ite Judeahin, ngocam diho nan to ningo ite. ¹⁵ Ati iya na larahare ngolofa lo tenyi tenyi, Karaneco ko tenya lo cik ningi, itikeru kuna to kenite kuningi. Ida nan atum rahun kangotoni lo tenyi tenyi kuna lori ko kuna. ¹⁶ Oto ko kifuharu icieng to lokiho. ¹⁷ Icieng ko kibelo diho Sosenes kalanyunoni lo Lotubare ko lumo inyi to ketemoni lo lokiho. Ati ida Galio oteny ko lobo tohi. ¹⁸ Itong Paul korint kude faritin. Ko ngerihino recera ko kirwoho babur olo iya Siria ilihari ko Priscila ko Akuila. Orihe inyi ida lirwok babur, itigit kwe nenge to Kenkre to kibutia lobo libutia inyi. ¹⁹ Ogoru icieng Epeso oto ongerihi Priscila ko Akuila inyia. Olo inyi token lotubare faji na lolorore inyi kisinga Judeahin. ²⁰ Ojo icieng ilif inyi jimitan ojir itong kude faritin ko icieng oberu inyi. ²¹ Ati kololoro inyi ocik icieng ojo, “Aitu mute nan kaliruk Lobanga”. Inyi ko kirwoho babur to Epeso. ²² Kologoru inyi Cesaria olo inyi ofony kanisa ko ringita iya Antiok. ²³ Kolokeru kude faritin to Antiok owoju Paul tija ko lotita ilor fajihit fad kulo kof lo Galatia ko Pirgia kitigolo karuhok fad. ²⁴ Tinyia lobo Judeani lobara Apolos lo kof lo Aleksandria ko lotuno Epeso. Ara orumu inyi tungani na liken manyu otehita genyun iyo igeriti. ²⁵ Orumu itiyeni inyi kikoi lo Lahitok manyu otenya inyi tenya lo Lobanga to yenun manyu itiyena tenya lo Yesu ara na ibir kileng loyen inyi kibatisa lo Jon keken. ²⁶ Iciak inyi kitiyena to golun lo tau to lotubare. Koloning oho Priscila ko Akuila inyi, ifotu icieng inyi kaji neicieng ko kititimahino inyi tenya lo Lobanga otoc. ²⁷ Langun lowak Apolos loro iya Akaia, olwak recera inyi manyu igeri waraga diho karuhok kulo ijia lo kifotuno inyi. Kologoru inyi Akaia oto inyi icio lwaha na hitok bebe diho cio kuna licio kisa lo Lobanga icieng kiruk tenya nenge. ²⁸ Tonyio ilany inyi Judeahin to risa ko peha to kiji lo cio lo kitotoruno to igeriti jimitan Yesu inyi Kristo.