¹ Kolofwo icieng ara Ampipolis ko Apolonia ko gorunoti Tesolonika faji na longon lotubare lo Judeahin. ² Iya na litiitare inyi tik tik olo Paul lotubare oto ising icieng tenya lo Lobanga to sabiti uni, ³ ititima diho icieng jimitan igero ojo ocam Kristo orumu kidak ati ibuhu to kiji lo kaweyak far lo uni, ojo diho icieng, “ene Yesu latenya nan diho ite inyi lara Kristo”. ⁴ Iruk Judeahin kude iruhiti tenya lo Paul ko Sailas ko becek kulo cio kulo Girik kuna lobang Lobanga, ko kude ngorwo kuna loboroho. ⁵ Ati inief okaine Judeahin kude ko fworoti kisusua kude cio kasasuok to faji lo cuk ofwonu icieng otum ilulung ko kiciahati kigorita to kanghatwa. Ko kiburaroti kolo Jason taharu Paul ko Sailas lo kiyauno icieng diho ilulung. ⁶ Ati kalida orumuni icieng, ipihuni Jason ko recera kude iyauni ketemoni lo kabolorok kulo kang igoritati ojimi, “kuno cio litifufulinga kof fad kuno logoru ene. ⁷ manyu ifotu Jason icieng kalenge, itikaja icieng cik lo Cesar ojo ongon lobo kabu ake na lobara Yesu. ⁸ Koloning icieng jii oto ilulung ko kabolorok kulo na kang orienya. ⁹ To kifwongi icio kabolorok Jason ko kulakude odum robia kulo kitilaha ko ngerihinoti icieng ofwo. ¹⁰ 0 Langun lomutok karwe ocule recera Paul ko Sailas iya Berea. Kologoru icieng ijia ofwo icieng lotubare lo Judeahin. ¹¹ Oto cio kulo Berea ara cio kuna igenyi manyu ojiri ilany cio kulo Tesolonika tonyio ilifu icieng tenya lo Lobanga to kwerun lo taulo manyu oherati igeriti faritin fad lo deya kalara kuno tenyi tenyi lo tenya Paul dede. ¹² Judeahin becek ko kiruk ko cio kulo Girik kunahitoha ngorwo ko rei fad. ¹³ Koloning Judeahin kulo Tesolonika ojo ititima Paul tenya lo Lobanga to Berea ijifaru icieng inyi ijia kisasuo cio ko kitigorita icieng. ¹⁴ Deu deu ocule recera Paul iya kutuk lo nam ati Sailas ko Timosi Berea. ¹⁵ Iyaru kunu cio liniemaru Paul inyi Asens ko itoroti iyari tenya na locik Paul iyo Sailas ko Timosi iya Berea lo kijifuno inyi deu deu. ¹⁶ Kalitila Paul Sailas ko Timosi to Asens, oto tau nenge ome bebe to lobangahin loduhot beciek kuna longoni na kof. ¹⁷ Oto inyi oric tenya ko Judeahin ko Girik kuna lobang Lobanga to lotubare ko kaji lo cuk faritin fad ko cio kuna longoni ijia. ¹⁸ Ilulung lo kagenyak kulo Epikuria ko Stoik ko kicaha peha ko inyi. Itifia kude to kiji neicieng ojo, “otenya ene kamomodoni nyio?” ojo kude, “ori mejo ongon kitotoro tenya lo kude misiok kulo lobangahin”. Ara ene tona lititimare Paul layomit na ijir lo Yesu ko kibuhuno to loweyare. ¹⁹ Oto icieng iyaru inyi lotubare lo Aeropagas ko jimitan diho inyi, “ngida ha ba isi kitiyen ohoi kuno tenyi tenyi lititima isi? ²⁰ Ingon isi kiyauno welo kulo tenyi tenyi kiyoha kuniyang tona, kiwak ohoi yenun icieng ²¹ (cio kulo Asens fad ko misiok kuna lomanya ijia ara katongok kuna lida itiyo lobo tohi, ara tic neicieng tenya ko ningo tenyi tenyi ngejuho keken). ²² Oto Paul owoju to lotubare lo Aeropagas ko jimitan, “cio kulo Asens, adeu nan jimitan to kikohin fad ira ite cio kulo dini. ²³ Tonyio, na laloritare nan katwa lo kang ariria sangite kuna liwora ite, alotu nan arumu ciali na ligero ojo, “DIHO LOBANGA NA LIDA KIYEN”. Jija tohi na liwora ite ara na lida iyen inyi ahititimahino nan ite. ²⁴ Lobanga na loduk kof ko sangite fad kuna ingoni katwa, inyi Lahitok lo kai ko kof manyu na lida itongo kaji na loduhi to kac. ²⁵ Manyu ida irwaati inyi to kac kulo cio mejo owak inyi lobo tohi, tonyio inyi to ken licwara cio warun ko wirita ko sangite kude fad. ²⁶ To tungani lobito ofik inyi cio kulo kofi kofi fad ojo ojir icieng omanya kof fad manyu ikukumahi icieng faritin ko fajihit kuna ngomanya icieng. ²⁷ Itii Lobanga jii, ojir cio otak inyi manyu otemi rumahino ko goruno diho inyi ati kileng lida inyi oloma ko ohoi. ²⁸ Tonyio to katwa nenge kimanya ohoi, kilot manyu kitongo, iya na lotenyare kude kagerok kuningi ojo, “kira ohoi tee kunenge”. ²⁹ Iya na lohirahare ohoi tee kulo Lobanga, ojir ohoi ida kiiyo jimitan ori inyi ko lopidinga lo dab, rial, moru na likukum kode itibibil kana lo tungani to genyun nenge. ³⁰ Afa berien itikaj afa Lobanga na dataru ati jijia owak inyi cio fad irwo. ³¹ Tonyio lokeru inyi kikukumahino far na mute longotore inyi tenya lo kof to biran lo tungani na lokeru inyi nyumuno. Litotor inyi ene diho cio fad to kitibuhuno inyi to kiji lo kaweyak” ³² Koloningiti tenya lo kibuhuno lo kaweyak, iciak kude kitikaja ati ojo kude, “kiwak ohoi ningo isi mute tone tenya ari”. ³³ Tona Paul ko ngerihino lotubare. ³⁴ Ati ijif cio kude iruhiti tenya lo Lobanga na loteny Paul. To kiji neicieng ongon Dionisius na lorumu ongon iyo ilulung lo Aeropagas ko lobo ngorwani lobara Damaris ko kuna kude iborengi.