¹ Kololotu inyi Derbe ko Listra koloho lobo kajifitani lojimi Timosi na lara ngotenge Judeani ati monye ara tungani lo Grik. ² omaj cio kulo Listra ko Ikonium Timosi noo. ³ Owak Paul kiyaru inyi ara lobito ko icieng ene owele oto ko kilira inyi to Judeahin kuna longon na kof fad tonyio oyeniti jimitan ara monye Girihoni. ⁴ Kololot icieng to kangite ko kangite ititimahi icieng cio tenyi tenyi kuna liger jayona ko lohitwaha to Jerusalem ojir cio oric. ⁵ Dong ogol kanisahin iyo kiruk manyu osodoroti to borengun ⁶ Ilor Paul ko kalihitak kunenge kofikofi kulo Pirgia ko Galatia iya na litihore okorif inyi kititima tenya lo Lobanga ko lo Asia. ⁷ Kolofwonu icieng lohikori lo Misia, otem icieng rutoro Bisinia ati itik Okorif lo Yesu icieng. ⁸ Oto icieng oring to Misia ko fworoti Troas. ⁹ Ojo karwe odeu Paul lobo tungani lo Masedonia iyo kitirija na lowoita ileleia diho inyi ojo, “ou iya Masedonia kilwak ohoi”. ¹⁰ Langun lodeu Paul na kitirija kikukumahino dong ohoi lo fworo iya Masedonia na lohitifut kijo owak Lobanga ohoi fworo tenya layomit na ijir diho icieng. ¹¹ To Troas kirwok ohoi Babur ko kikwangaru tiribiny iya Samosarac ojo kiwanyi nenge kiringe iya Neopolis. ¹² Tija kifwo iya Pilipi na litongo ara kof na lolanyu cio kulo Roma manyu kang na hitok na lilany to Masedonia. Manyu kitong ohoi ijia faritin beciek. ¹³ To sabit kifwo ohoi oleng to katwa lo kang iya kutuk lo kare faji na lohikodomo rumuno lohilifare. Kitongohino ohoi kof kiciak tenya diho ngorwo kuna lorumu otuba ijia. ¹⁴ Lobito to kiji lo kuna loningo tenya niyang orumu lobo ngorwani lobara Ludia katilotoni lo kyelani kuna ifurangi na lolotu to kang lo Saiatira na lara kaworani lo Lobanga. Onga Lahitok tau nenge lo kiruk tenya lo Paul. ¹⁵ Kalibatisi inyi ko cio kulo kalenge, kilolonge inyi ohoi iya kalenge ojo, “kaliyen ite nan ara karuhoni lo Lobanga, ifwonu itongoti kalitole”. Oto inyi kitiruk ohoi. ¹⁶ Lobo far orumu ohoi kifworo lohilifare, kiric ohoi ko lobo kito karioni lara opii na longon ko lobo okorif licio inyi oyen tenyi tenyi kulo mute. Iyaunita na kilama nenge robia kuna iborengi diho monyeri kunenge. ¹⁷ Iciak na karioni kijifita Paul ko ohoi fad igorita ojo, “Ara kuno cio karwaak kulo Lobanga na longon kai noo kuna lohirihohino ite kikoi lo lwaharu”. ¹⁸ Itiring inyi kijifita ohoi jii to faritin kuna iborengi. To kifwongi ome tau lo Paul ko kibelo ko rihohino na okorif ojo, “to karana lo Yesu Kristo ahirihohi nan isi torutu to ken nenge! Tona tik ingohi na okorif inyi. ¹⁹ Kolodeu monyeri kulo ene karioni opiini ojo loru langun tohi lohirumahitare icieng robia,ko kiniefati Paul ko Sailas ko rihoroti faji lo cuk ketemoni lo kalanyunok. ²⁰ Iyauno icieng icieng ketemoni lo kangotoni lo tenya ko jimitan, “ara kuno cio Judeahin ofwonu icieng kikaruto kanghatwa niyang ²¹ to kitiyena tenyi tenyi kuna lida lida ocam to ohoi cio kulo Roma kiniang ko kijifita”. ²² Imorihino ilulung kitibaha Paul ko Sailas manyu ocik kangotoni lo tenya ojo ojir opucari kyelani to kenite kuneicieng manyu olumi. ²³ Langun lolumi icieng bebe ko fihahinoti icieng mabus ocihi kaririani ojo ojir oric icieng otoc. ²⁴ Koloning kaririani ji ko kiyaru icieng kudule lo katwa ko tora kejuha kuneicieng. ²⁵ Kologoru tuk lo karwe, ilifa Paul ko Silas ko woloti woleco iyo Lobanga manyu oningo mabusi kulakude. ²⁶ Deu deu iciak otira nahitok kitijijiho kof itijijik ko guri kulo kaji lo mabus. Tinyia ongajaru agwalahinkulo mabus fad manyu olaharu nyororohin to kejuha ko kac 16 kulo mabusi fad. ²⁷ Okwenyu kaririani ojo odeu agwalahin owati, ko sutuno ngalem latubot nenge owak kifadaru ken nenge tonyio orumu inyi iiyo ojo lorwe mabusi. ²⁸ Ati igore Paul diho inyi ojo, “ketii ken nino ara na irohoi, kingoni ohoi fad ene”. ²⁹ Ilolong kaririani ojo ojir iyauni kimaco, oto ko kiburaru katwa lo mabus olo ourohino to kihihirita ketemoni lo Paul ko Sailas. ³⁰ Oto inyi iyauno icieng oleng ko kitifia icieng ojo, “kulahitoha ngatii ha ban an nyio ojir alwaharu?” ³¹ Inyiahahi icieng inyi ojo, iruho Lahitok Yesu ojir ilwaharu isi ko cio kulo kalilo fad. ³² Oto ko kititimahinoti inyi ko cio kulo kalenge tenya lo Lobanga. ³³ Tona tik lo karwe iyaru kaririani icieng ko kilala korongan kuneicieng, deu deu ko kibatisati inyi ko cio kulo kalenge fad. ³⁴ Iyauno kaririani icieng kaji nenge ko kicwara icieng daha. Ifut inyi ko kwama noo tonyio liruk inyi Lobanga ko cio kulo kalenge fad. ³⁵ Kolowang kof, ocule kangotoni lo tenya katiyok kunenge diho kaririani ojo ojir olahahi kuna cio. ³⁶ Orihohi kaririani Paul ojo, “ojo kangotoni lo tenya ojir kilahahini ite. Jija ifwo dong to kisiliban”. ³⁷ Ati ojo Paul diho katiyok, “kitilum icieng ohoi tarany oru ko lokiho kileng lohira ohoi cio kulo Roma manyu kitorihini mabus. Jija owahiti cularu ohoi lolilime? Ida ingohi icieng to kenite to fwonu kinieme ohoi oleng”. ³⁸ Ofwo katiyok orihohi kangotoni lo tenya tohi na loteny Paul, ojo icieng oning ojo ara oho Paul ko Sailas cio kulo Roma, oto orienyati noo. ³⁹ Ofwonu icieng tana oho Paul, kiniemaru icieng oleng to mabus ko rihohino icieng ojo ojir ofwori. ⁴⁰ Kolokeru oho Paul ko Sailas rutuno to mabus ofwo icieng kolo Ludia otubahi icieng karuhok fad, isingi ko ciha icieng oto ko fworoti.