¹ Ofwonu kude cio to Judea iya Antiok manyu itiyenati cio ojo, “kalida kiliri isi iya na ligerore iyo cik lo Moses ida isi itum lwaharu”. ² Iyauno ene tenya peha ko risa na igol kiji loho Paul ko Barnabas ko icieng. Oto onyumuni Paul ko Barnabas ko kude karuhok lo fworo Jerusalem deya Jayona ko lohitwaha to na tenya. ³ Ocule kanisa icieng, ojo icieng ofwo ara Penicia ko Samaria ititim icieng koditi na liruhore misiok. Iyauno ene layomit kwama diho recera fad. ⁴ Kolofwonu icieng Jerusalem, ifotu kanisa, jayona ko lohitwaha icieng. Oto icieng ititimahi kanisa fad tohi na litii Lobanga ara diho icieng. ⁵ Oto kude karuhok lara Parisihin owoju ojo, “ojir misiok iliri manyu itiyeni icieng kijifita cik lo Moses”. ⁶ Otuba jayona ko lohitwaha lo kigigilo ene tenya. ⁷ Langun lorij icieng ene tenya tektek oto Petero owoju ko kifurahino diho icieng ojo, “recera, iyen ite jimitan afa kude faritin lonyumu Lobanga ojo ojir misiok oning layomit na ijir to kutuk nei ojir iruhiti. ⁸ Lobanga na loyen taulo, itotor jimitan afotu inyi icieng to kicwara icieng Okorif na Inyu iya lafa lohicwarare ohoi. ⁹ Na lida okor kiji neicieng ko ohoi tonyio itinyu inyi taulo kuneicieng to kiruk ¹⁰ Dong jijia nyio iwak ite tema Lobanga to kiticuna karuhok ter na lida ohoi kode monyeri kuniyang afa otum tingo? ¹¹ Ida! Kiruk ohoi jimitan ara to kisa lo Lahitok niyang Yesu 15Kristo kilwahunorehin ohoi iya na lolwahunorihin icieng”. ¹² Oto lotubare lo karuhok ko buho tik oningorihin tenya lo Barnabas ko Paul iya na lititimare icieng ticitici kulo kitotorita ko tanguhin kuna hitoha kuna litiiLobanga kiji lo misiok ara diho icing. ¹³ Langun lokeru icieng oto Jems oteny ojo, “recera kining nan, ¹⁴ lititim Saimon diho ohoi koditi na litotorore Lobanga wahun nenge lo nyumuno misiok itirak ara cio kunenge. ¹⁵ Iruhohino ene ko tenyi tenyi kulo kamocak iya na ligerorihin ojo, ¹⁶ “Koloru ene aitu ca nan kitingejuho kifaha kema lo David na louroro. Mura nenge afak ca nan manyu atigejuk ca nan inyi. ¹⁷ Ojir otonge kulo cio otahita Lahitok ko misiok fad kuna libur karana nei. Lahitok loteny na litiyo kuno sangite”. ¹⁸ Kuna loyeniti to karihin fad. ¹⁹ Angot nan ene tenya ajo, ojir ohoi ida kitigol manyu diho misiok kuna libelo diho Lobanga. ²⁰ Ilany, ojir ohoi kiger waraga diho icieng lo rihohino icieng jimitan ojir ida onyai lobo daha lo kikuma, ojir ongerihini ticitici kulo somun, ko ngerihino tyang lo tohi na logori ara goro ko ngerihino daha okoto. ²¹ Tonyio ititimati cik lo Moses kangite fad many afa to berien manyu orihe ikenati to lotubarihin fad to sabiti fad.Waraga lo lokiho diho karuhok kulo misio ²² Oto jayona ko lohitwaha ko kanisa fad onyumu kude cio to kiji neicieng oculari iya Antiok ko Paul ko Barnabas. Onyumu icieng Judas (na lobara Barsabbas) ko Sailas, cio are kuna lorumu ara karihitak to kiji lo recera. ²³ Icio icieng ene waraga diho icieng lojo, “ohoi jayona ko lohitwaha recera kuningi, diho misiok karuhok kuna longon Antiok, Siria ko Cilicia. Kifonyo ite bebe. ²⁴ Kining ohoi ojo ofwo kude cio to kiji niyang ida ko ohoi kiyen kitigema ite ko kitiudo ite to tenyi tenyi kuna loteny icieng. ²⁵ Tona kifwonu ohoi kiruk nyumuno kude cio kiculu ijia diho ite ko morot kuniyang Barnabas ko Paul. ²⁶ cio kuna licio warita kuneicieng to karana lo Lahitok Yesu Kristo. ²⁷ Iya na kiculu ohoi Judas ko Sailas lo kicwara saden to kutuhe kuneicieng lo kitigolo tohi na lohiger ohoi. ²⁸ Ori mejo ojir diho Okorif na Inyu ko diho ohoi ojir ida kitigemi ite ogal kuno sangite ligero diho ene waraga. ²⁹ Ojir ite ida inyia lobo daha likumarihin, okoto, tyang lo tohi na logori ara goro, manyu iric kenite kuningi iyo ticitici kulo samun. Itii cia ite ara na ijir kaliric ite kenite iyo kuno sangite. ³⁰ Oto ko cularoti kuna cio iya Antiok ofwo icieng otubahi kanisa ara lobito ko kicwara na waraga diho icieng. ³¹ Iken cio oto okwamati bebe to tenya lo kisinga na ligero ijia. ³² Judas ko Sailas kuna manyu lorumu ara kamocak ko tenya tenyi tenyi kulo kisinga ko kitigolo lo taulo kulo recera. ³³ Langun litong icieng kude faritin ko kanisa, oto oculari icieng to gum ko kisa lo Lobanga lo itoro diho cio kuna loculu icieng. ³⁴ Ati iruk Sailas tongun ijia Antiok. ³⁵ Ati otong Paul ko Barnabas Antiok faji na lititimare icieng ko kitiyena tenya lo Lobanga ko kuna kude cio. ³⁶ To kude faritin to kifwongi, ojo Paul diho Barnabas, “ngafi ba ngatiwaj recera to kunu afa kangite fad lohititimare tenya lo Lobanga ko deya koditi na longonore icieng”. ³⁷ Owak Barnabas ojo ojir kilik ko Jon na manyu lobara Mark ³⁸ ati ida Paul iruk kiyaru Mark tonyio ingohi afa inyi icieng to Pampilia ida osodoro kitiyo ko icieng ³⁹ Oto icieng orisa bebe ko korati, odumu Barnabas Mark ko rangaru to Babur iya Saipras. ⁴⁰ Ati onyumu Paul Sailas ko loro ilegahi kanisa inyi kisa lo Lobanga. ⁴¹ Olo inyi ara Siria ko Cilicia kitigolo kanisahin kuna longoni ijia.