¹ To Ikonium, ofwo oho Paul ko Barnabas orute lotubare lo Judeahin iya langun. Tija ititim icieng tenya lo Lobanga otoc na licio Judeahin becek ko misiok iruk. ² Ati Judeahin kuna loberu kiruk ko kiwala taulo kulo misiok kenite kulo recera. ³ Oto Paul ko Barnabas itong ijia faritin becek ititimati tenya na loru ko riri to ken lo Yesu oto Lobanga itigol layomit neicieng to kitiyo tanguhin ko kitotorita. ⁴ Cio kulo na kang ko kora, isisio kude Judeahin kude isisio jayona. ⁵ Orumu ongon tenya na livitarihin kitigema ko caha icieng to morutok kiji lo Judeahin, misiok ko kabolorok kuneicieng. ⁶ Ati ofwonu icieng oning, ko rwaroti iya kangite kulo Laikonia iya Listra ko Derbe ko kofi kofi kuna lirit kuna kangite. ⁷ Osodoro icieng ko kititima layomit na ijir ⁸ To Listra orumu ongon lobo tungani na lonyia ikwele kejuha fad iwasihi kikunana many to lotomonunore ida otem lotita to kejuha. ⁹ Oningo ene tungani kolotenya Paul. Oto Paul iriri deya inyi oyen jimitan ongon inyi ko kiruk lo furioro. ¹⁰ ko rihohino inyi ojo, “towoju iwoita to kejuha kunino”. Tona, na tungani ko kifirioro ko kiciaha lotita. ¹¹ Kolodeu ilulung tohi na litii Paul, oto igorori to tenya lo Laikonia ojo, “loluluoro lobangahin ara cio lofwonuno kiji niyang. ¹² Icio icieng karaneco kulo lobangahin kuneicieng diho jayona. Ojimi Barnabas Zeus ojo Paul ojimi Ermes tonyio inyi lara katenyani. ¹³ Oto ibwoni lo Zeus na longon kaji na liworarihin inyi oleng ko cio fad kulo na kang iyauno mongo na liticiefi katurahak ojo ojir opulohini icieng ara kikumi. ¹⁴ Koloning jayona Barnabas ko Paul jii ko cirati kyelani kuneicieng ifejari iya kiji lo ilulung igoritati ojo, ¹⁵ Luak, nyio itiyo ite jii? Kira manyu ohoi cio iya ite. Kiyauno ohoi layomit na ijir diho ite lo rihohino ite jimitan ibeloti to kuna ticitici irohori ifwonu diho Lobanga lo dede na iwar na loduk kai ko kof ko nami nami ko sangite pili kuna longoni. ¹⁶ Afa berien ongerihi afa inyi kofi kofi fad ofwo kikohin kuneicieng. ¹⁷ Kileng ngara jii, ida afa inyi omon ken nenge, itotoru inyi jiran nenge to kicwara ite kuju to kai ko daha na lodo to ofahin kuneicieng. Kicio inyi ite daha na itum manyu itifut taulo kuningi to kwama. ¹⁸ Kileng to kuno tenyi tenyi, ida otanga diho icieng kitiho cio pulohino icieng kikumi. ¹⁹ Oto kude Judeahin ofwonu to Antiok ko Ikonium ko kisusua ilulung. Ko cahati Paul to morutok ipihori to kanghatwa oleng ojimi kode lowei. ²⁰ Ati olofwonu karuhok irit inyi, owoju ko itoro iya kanghatwa. Kiwanyi nenge owoju icieng ko Barnabas ofwori iya Derbe. ²¹ Ititim icieng layomit na ijir katwa lo na kang orumu cio kuna iborengi. Ko kibeloroti iya Listra, Ikonium ko Antiok. ²² Kitigolo kajifitak manyu tana icieng ojir owoitati to golun iyo kiruk neicieng. Ojimi diho icieng, “ojir ohoi kifwo to katwa lo kidak na hitok kirutorore okabwe lo Lobanga. ²³ Onyumohi Paul ko Barnabas icieng lohitwaha kulo kanisa, langun lilifa icieng ko faranun ko kinga icio Jayona icieng kana lo Lobanga na lofik icieng kigeno diho inyi. ²⁴ Kolofwo icieng ara katwa to Pisidia ofwonu icieng ogoru Pampilia. ²⁵ manyu langun lititim icieng tenya Perga ko fworoti iya Atalia. ²⁶ To Atalia oite icieng to Babur iya Antiok lafa faji licwarahinorihin icieng kana lo Lobanga tone tic lokeru icieng kitiyo. ²⁷ Kologoru icieng ijia, otubahi icieng kanisa ara lobito ko kititimahino icieng ticitici kuna litii Lobanga ara diho icieng ko koditi na longajare inyi agwala lo kiruk diho misiok. ²⁸ Itong icieng ijia faritin becek ko karuhok. Lokiho lo karuhok to Jerus