¹ Iyo kanisa lo Antiok orumu ongoni kamocak ko katiyenak; orumu ongon Barnabas, Simeon na lilolongoti ojo Naija, Lucios lo Ceiren, Manaen( na litiboloru Erod Tetrak) ko Saul. ² Kaliwora icieng Lahitok ko faranun ko kinga, ojo Okorif na Inyu,” Itingadeti Barnabas ko Saul to tic na lalolongohi nan icieng.” ³ Dong langun lofaran icieng kinga ko kilifa, ifik icieng kac kweci kuneicieng ko cularoti icieng. ⁴ Okorif na Inyu ko cularu icieng kuna are iya Seleusia tija ofwo icieng to Babur iya Saipras. ⁵ kologoru icieng Salamis, ititim icieng tenya lo Lobanga to lotubare lo Judeahin. Orumu Jon ongon ko icieng ara kalwahani neicieng. ⁶ Ilor icieng na cula fad many ofwonuni Papos. Orumu icieng ijia lobo Judeani lara ibwoni ara manyu kamocani na italer na lobara karana nenge Bar Yesu. ⁷ na lara karwaani lo kaboloroni Sergios Paulos. Ene kaboloroni ara tungani na igeny ocule inyi cio kilolongo Barnabas ko Saul tonyio owak inyi ningo tenya lo Lobanga. ⁸ Ati Eliamas na lara ibwoni( tonyio fotiri lo karana nenge na) itirisa icieng owak kitigeraru na kalanyunoni to kiruk tenya lo Lobanga. ⁹ Oto Saul na manyu lilolongoti ojo Paul ifut ko Okorif na Inyu ko deya Eliamas konyeha ko jimitan, ¹⁰ “ira isi kito lo sitan, meroni lo sangite kuna ibiri fad. Ifut isi ko koditi lo talerun fad ko kitinononga, anu mute iticung isi kitigerita kikohin kuna ibiri kulo Lobanga? ¹¹ Jija ongon kana lo Lobanga ken nino. Ingodo ca isi jija ida ideu wangun lo kolong. Deu deu olotu idis ko kimuhoro konyeha kunenge ida otum deya owak tungani na ngorik inyi. ¹² Kolodeu kalanyunoni tohi na litiihino, ko kiruk tonyio ipany inyi tenya lo kitiyena to Lahitok. ¹³ To Papos irwok Paul ko kalihitak kunenge babur iya Perga kof lo Pampilia, faji na longerihinore Jon icieng ibelorore iya Jerusalem. ¹⁴ To Perga oringe icieng iya Antiok lo Pisidia, to sabit orute icieng lotubare ofwo itongohinoti ¹⁵ Kolokeru kikena to book lo cik ko kimociti, ocule kalanyunok kulo lotubare tenya diho icieng ojo, “recera, kolongon lobo tenya lo kisinga diho ite to kuno cio itoteny”. ¹⁶ Kolowoju Paul, iwat icieng to kana oto ojo, “cio kulo Israel ko ite misiok kuna liwora Lobanga, kining nan! ¹⁷ onyumu afa Lobanga lo cio kulo Israel monyeri kuniyang, oto icio icieng bara to manya neicieng kof lo Ejipt, to golun nenge na hitok olotu inyi odumu icieng to na kof, ¹⁸ idony inyi tau to kikwalaru neicieng karihin keek ongon to kuny, ¹⁹ olotu ifuhe misiok mietare to kof lo Kanaan icio kof diho cio kunenge ara neicieng. ²⁰ Iyaru manya neicieng na kof karihin mia ongon ko keek miet. To kifwongi olotu Lobanga icio icieng kangotok kulo tenya many ogorunore karihin kulo Samuel kamocani. ²¹ Oto icieng ofwonu ilifa kabu olotu icio icio icieng Saul kito lo Kis lo imanit lo Benjamin na lolotu olanyu icieng to karihin keek ongon. ²² Tokifwongi, olotu odume Saul ofik David ara kabu neicieng. Oteny inyi saden to inyi ojo, “larumu nan David kito lo Jese tungani na lijifita tau nei; itii cia inyi sangite pili kuna lawak nan inyi itii”. ²³ To kiji lo lotataha kulo ene tungani liyauno Lobanga diho Israel kalwahani Yesu iya idi afa locihare inyi, ²⁴ Orihe Yesu ida olotu ititima Jon kirwo ko kibatisa diho cio kulo Israel fad. ²⁵ Langun afa lokeruno Jon tic nenge, ojo inyi diho cio, “ifik re ite ijo nan ngai? Ida ara nan inyi. ida hati olotuno inyi to omot nei, ida kileng nan acam to laha kofi kulo kamuha kunenge”. ²⁶ Recera, lotataha kulo Abraham ko ite misiok kuna libang Lobanga, ara diho ohoi oculuni ene layomit lo lwaharu. ²⁷ Ida afa cio kulo Jerusalem ko kalanyunok kuneicieng oheru Yesu ati to ngotohino wei diho inyi, itufut icieng tenyi tenyi kulo kamocak kuna likenati to sabit fad. ²⁸ Kileng lida icieng orumu tenya ken nenge na ngotumohinore inyi wei, isusu icieng Pilato ojo ojir ifade inyi. ²⁹ Kolokeru icieng kitiyo tenyi tenyi fad iya lafa ligerorihin to inyi, iticuluni ken nenge to kai lo kete ko kitigetihino katwa lo kwecere. ³⁰ Ati itibuhu Lobanga inyi to kiji lo kaweyak ³¹ manyu to faritin kuna iborengi, itibotu inyi ken odeu cio kulafa lilihu ko inyi to Galilea iya Jerusalem. Icieng jija lara sadeni diho cio kuniyang. ³² Kititima ohoi diho ite layomit na ijir, tohi lafa locik Lobanga diho fafaicio kuniyang ³³ litifut inyi diho ohoi tee kuneicieng to kitibuhuno Yesu. Iya na ligerore iyo Zabur lo are ojo, “isi kito nei, enefar lara Nan Apa nino” ³⁴ Tenya na lititima ojo itibuhu Lobanga inyi to kiji lo kaweyak ida ken nenge omura igero ojo, “ahicio ca nan isi gum na inyu na locihi diho David. ³⁵ manyu igero lobo faji ojo, ida ca isi icio tungani nino Na inyu oyen muraru. ³⁶ Tonyio kolokeru afa David tic diho Lobanga to kofiangiti nenge, olotu afa owei onuhahini inyi ko monyeri kunenge manyu omuraru ken nenge. ³⁷ Ati na litibuhu Lobanga to kiji lo kaweyak ida afa inyi odeu muraru. ³⁸ Tona recera awak nan ite iyen jimitan to Yesu ititimi launo lo kipalipali diho ite. ³⁹ Ara diho inyi, cio pili kuna liruk odumari kipalipali kuneicieng fad kun lida cik lo Moses otum dumaru. ^{40 41} Itigeny, kecio tohi na loteny kamocak itiihino kenite kuningi na lojo, 41 “Itode ite kangalak ipanyata irii tur tonyio aloro nan kitiyo lobotohi to fsritin kuningi na lida ite iruk kileng ngohirihohi lobo tungani ite”. ⁴² Kolofworo Paul ko Barnabas to lotubare otan cio icieng ojo ojir ofwonu osod kititima ene tenya to lotubare nu sabit. ⁴³ Langun lisara cio to otubare, ijif Judaiahin becek ko cio kuna libelo diho dini lo Judaiahin Paul ko Barnabas. Osod icieng tenya ko icieng ko tana icieng lo sodoro iyo kisa lo Lobanga. ⁴⁴ To sabit na lijifita ofwonu cio to kang fad otubunoti ningo tenya lo Lobanga. ⁴⁵ Kolodeu Judeahin ilulung, oto okaine inief icieng noo iciahi kitimoro tenya lo Paul. ⁴⁶ Oto Paul ko Barnabas orihohi icieng tarany ojo, “kijo ohoi ojir kitem kititimahino ite tenya lo Lobanga. Kaliberu ite ideu jimitan ida ite icami to rumuno warun na losio tur, kibelo dong jija ohoi diho misiok. ⁴⁷ Tonyio ara ene tohi na locik Lobanga diho ohoi ojo, “Lahifik nan ite ara wangun diho misiok ojir ite iyaru Many lohicungi lo kof”. ⁴⁸ Koloning misiok jii oto okwamati noo ko rimati tenya lo Lobanga manyu cio fad kunafa lonyumuni ara kulo warun na losio tur iruhiti. ⁴⁹ Isarihi tenya lo Lahitok a kof fad. ⁵⁰ Ati isusu Judeahin ngorwo kuna lobang Lobanga kuna loyeniti to kiji lo cio ko kabolorok kulo na kang. Isusu icieng cio ojo ojir itigemi Paul ko Barnabas lo kifuharu icieng tona kof. ⁵¹ Icieng ko tenga fur lo kejuha kuneicieng to beruno ticitici kuneicieng ko fworoti iya Ikonium. ⁵² Orumu kajifitak lifut ko kwama ko Okorif na Inyu.