¹ Oning jayona ko karuhok to Judea fad jimitan lifotu manyu misiok tenya lo Lobanga. ² Kololo Petero Jerusalem, iciak karuhok kuna liliraru itifiaha inyi ³ ojo, “ilo isi kolo cio kuna lida iliraru idaha manyu ko icieng”. ⁴ Iciak Petero rihohino icieng sangite fad iya na litiihinore. ⁵ “Angon orumu nan Jopa alo kilifa oto kalalura nan kitirija nan. Adeu nan lobo tohi na lori iya cuka nahitok olotuno to kai ididiluno to kiyoha kunenge ongon olotu kof inyia langon nan. ⁶ Ade nan katwa arumu tyangi kulo kejuha ongon fad, kuna lowar katwa lo kifi, sangite kuna lokudita ko kweny fad. ⁷ Nan ko ninguno ogoro na lojo, “towoju Petero. Ifade inyia”. ⁸ Anyiahahi nan ajio, “ida Lahitok, oru lobo tohi ibot kode idwa lorute kutuk nei”. ⁹ Oteny ogoro to kai ari ojo, “kelolong lobo tohi ijo ibot na litinyu Lobanga”. ¹⁰ Itiihino ene tohi kakeny uni ko kinyiaharoti dony iya kai ¹¹ Tinyia deu deu cio uni kuna loculuni to Cesaria ko fwonuno owoitati na kaji orumu langonore nan. ¹² Ojo Okorif ojir nan ida aberu kiliharu ko icieng. Kilik nan ko kuno recera ile kifwo kirute kaji lo nu tungani. ¹³ Kirihohi inyi ohoi koditi na lolotunore malaika diho inyi kaji nenge ojo diho inyi, “tocule cio Jopa diho Saimon na lobara Petero. ¹⁴ Iyauno cia inyi diho isi tenya na cia licio isi ko cio kulo kaji nino fad ilwaharu”. ¹⁵ Ojo nan aciak tenya olotu Okorif na Inyu diho icieng iya na afa lolotunore diho ohoi to lohiciahi. ¹⁶ kitiiu nan lafa tenya loteny Lahitok ojo, “ibatisa afa Jon to kifi ati kibatisi cia ite to Okorif na Inyu”. ¹⁷ Kalicio Lobanga icieng na kicwara bito lohiciori ohoi kuna lohiruk kabu Yesu Kristo, ara hati nan ngai na ngatum kitipeha Lobanga?” ¹⁸ Koloning icieng jii oru manyu diho icieng lobo peha ari manyu omaji Lobanga ojo, “inyi jimitan licio Lobanga ko misiok manyu kirwo lo kipal na liyauno warun”. ¹⁹ Dong cio kulafa lisara to kitigema to wei lo Steven ofwori manyu Poenisia, Caipras ko Antiok kititima tenya diho Judeahin ake. ²⁰ Kude hony to kiji kuneicieng, cio kulo Cipras ko Ciren ofwori Antiok iciahi kititima diho Grik manyu rihohino icieng layomit na ijir lo Lahitok Yesu. ²¹ Ongon orumu kana lo Lahito diho icieng oto cio beciek iruk ibeloti diho Lahitok ²² oningoro layomit lona tenya many Jerusalem ko cularoti Barnabas iya Antiok. ²³ Kologoru inyi odeu kitisadeni lo kisa lo Lobanga, okwama inyi bebe manyu itigol taulo kuneicieng ojir itongoti to taulo dede diho Lobanga faritin fad. ²⁴ Ara orumu inyi tungani na ijir na lifut ko Okorif na Inyu ko kiruk oto cio beciek ofwonu diho Lobanga. ²⁵ Oto Barnabas ko loro iya Tarsas taharu Saul. ²⁶ Ojo orumu inyi iyauno inyi iya Antiok. Dong to kari fad itongo Barnabas ko Saul ko kanisa manyu itiyeni cio kuna iborengi bebe. Ara ene Antiok icaharihin kilolongo karuhok ojo Kristiani. ²⁷ To kuna faritin ofwonu kude kamocak to Jerusalem iya Antiok. ²⁸ Oto lobito to kiji neicieng na lobara Agabus owoju oteny kimoca to okorif ojo olotuno kinga na hitok na lokeru kof lo Roma fad. (itiihino ene to obolore lo Kalaudio) ²⁹ Iciak karuhok tolobito iya na litweru inyi kicwara daha diho recera kuna longoni ko lo Judea. ³⁰ Itii icieng ene ocularitati lwaha neicieng to kac kulo Barnabas ko Saul.