¹ Ati toyen ene: jimitan ofwonu faritin kuna irohori iyo lohicungi. ² Itongo mute cio ara kamarunok kulo kenite kuneicieng, kamarunok kulo robia, katidarak, katikajak kulo cio kuna kude, kamorok, oberuni ko ningo katomonok kuneicieng, ida okwamati lobo tohi keken, oberuni nyujon, ³ oru kimaruno, ida olaati kaletok, kaguliak, ida oriciti kenite, ingereha ida imaruni jiran, ⁴ kalabak, kanuritak, kapufak, kamarunok kulo kwama ida imaruni Lobanga ⁵ ongon ko dini ati oberuni golun nenge. Tokoraru oleng iyo cio kuna lori iya kuna. ⁶ Icieng cio kuna lolaba rutoro kajihit ofwo olanyuni taulo kulo ngorwo kuna igoroho kuna locuna kipalipali kuna litilangita wahita kuna irohori. ⁷ kuna lotahita yenun ati ida otumiti kiniang tenya lo dede. ⁸ Iya na afa litipehare Jannes ko Jambres Moses, itipeha manyu kuno cio tenya lo dede ara icieng cio kuna lobahasa kweci kuna loberuni kalara to tenya lo kiruk. ⁹ Ati ida cia icieng osodoro tek tek tonyio oboto mute na dataru neicieng iya lo kunu afa cio are litipeha Moses. ¹⁰ Ati iyen isi kitiyena nei fad, koditi lo warun nei, wahun nei, kiruk, kidonyo lo tau, kimaruno, diha, ¹¹ kitigema, kidak, iyen isi koditi lo sangite kuna litiihino diho nan to Antiok, Ikonium ko Listra, kidak na ladik nan. Ati kilwahu Lobanga nan iyo icieng fad. ¹² Dede tungani na lowak warun lo Lobanga iyo Kristo Yesu orumu kitigema, ¹³ Osodoro mute cio karohojak ko kafudak iyo tic neicieng lo rohojun, kitinononga cio, ko cio manyu itinononga icieng. ¹⁴ Ati tosi, tosodoro iyo tohi na liyen isi manyu iniang otoc tonyio iyen isi cio kuna lohitiyen isi kuna tenyi tenyi, ¹⁵ Manyu koditi na liyenare isi kigeriti kuna inyuji many to okisidi kuna lohicio isi igeny to lwaharu na lolotu to kiruk iyo Kristo Yesu. ¹⁶ Kigeriti fad igeri to golun lo Okorif lo Lobanga manyu itiyo ara lo kitiyena, kirienga, kitibira ko kisinga iyo warun lo biran. ¹⁷ ojir tungani lo Lobanga ifut ko sangite fad kulo ticitici kuna ijiri.