¹ To ketemoni lo Lobanga ko lo Kristo Yesu na mute longoto tenya lo kawarak ko kaweyak ko to kodomo lo boto nenge ko okabwe nenge, ahicio nan isi ene ciha. ² Ititima tenya lo Lobanga, towoita katwa otoc iyo faritin kuna ijiri ko faritin kuna irohori, icwara cio iniang otoc itibira, irienga manyu itigolo taulo to kidonyo to tau nahitok ko kisinga to genyun. ³ Tonyio olotuno tik na mute lida cio odihare tenya na ibehi. Ati lo kitiyo iya na lowahare icieng, itubuni mute katiyenak irit icieng lo rihohino icieng tohi na loifa kiyoha kuneicieng ningo. ⁴ Ibele mute icieng kiyoha kuneicieng iyo tenya lo dede ibeloroti ningo odohohin. ⁵ Ati isi toting kwe nino kai iyo tenyi tenyi fad, todik kidak itiyo tic lo katitimani lo tenya lo Lobanga itiyo ticitici kunino fad. ⁶ Tonyio lohifworoti nan kifadaru iya kicorita na lijuhohini kai lo ciali lo kicoriti. Logoru faritin kunei kulo ngerihino ene kof. ⁷ Larem nan rem na ijir, lakeru nan angwala lo kitilanya, laric nan kiruk. ⁸ Jija ongon tahi lo biran na likumahini to nan na lohicio cia lahitok kangotoni lo tenya na ibehi nan ake ati diho cio pili kuna ligeria lotuno nenge. ⁹ Totem to golun nino fad lotuno diho nan deu deu ¹⁰ Tonyio Demas to kimaruno nenge ene kof lohingohi nan olo iya Tesolonika. Lolo manyu Kresens iya Galatia ko Tito lolo iya Dalmatia. ¹¹ Lotong Luka lohingon ko nan ene. Torumu Mark ilihu konyi tonyio obolo lwaha nenge iyo nan to tic nei. ¹² Lacule nan Tisikas iya Epeso. ¹³ Kalilotuno, toyoruno kyela lafa langohi nan diho Karpus idi troas ko buhi kunei bebe nenge kuna lara kiyenehin. ¹⁴ Alexanda kadongoni lo mwala kitii diho nan tic na irohoi, odum mute Lobanga inyi tona tic nenge. ¹⁵ Ojir manyu isi iric ken diho inyi tonyio itipeha inyi tenya niyang bebe. ¹⁶ Iyo kifura nei ketemoni oru afa lobo tungani lohiwoitahino nan ati kingerihi cio fad nan. Keco lahitok ikenahi ene tenya kweci kuneicieng. ¹⁷ Ati owoita Lahitok ko nan manyu kicio nan golun ojir ara diho nan ititimi tenya ifut ojir Misiok fad oning. Manyu kilwahuni nan to kutuk lo ngatuny. ¹⁸ Kilwahu cia Lahitok nan iyo jorena kuna irohori manyu kiyauno ci nan ara na ijir iyo okabwe nenge lo kai. Ingohi kwatun ko Deyo ongon diho inyi karihin ko karihin Amen. ¹⁹ Tofonyohi Priscila ko Akuila ko cio kulo kolo Onesiporas. ²⁰ Otong Erastus Korint manyu angohi nan Trapimos omwai Miletus. ²¹ Totem goruno ene orihe furat. Kifonyo Eusbulus isi, ko Pudens, Lino, Kalaudia ko recera fad. ²² Ingohi Lahitok tongon ko Okorif nino. Kisa kingon kosi.