¹ Isi ha kito nei togol iyo kisa na longon Kristo Yesu. ² manyu sangite kuna lining isi nan atenya to ketemoni lo sadeni beciek iciorihi diho cio kuna ligenoro kuna lotum manyu kitiyena cio kuna kude. ³ Kidik kohoi kidak iya asegereni lo Kristo Yesu na ijir. ⁴ Oru lobo tungani litiyo ara asegereni olo manyu orutohita iyo tenyi tenyi kulo cio kulo kanghatwa, itiyo inyi lo kitikwama lahitok nenge na lobolorohi inyi. ⁵ Tona kikoi bito kalorutohi tungani iyo angwala lo kitilanyahino ida inyi otum rumuno tahi lo lanyuno kalida ijifita cihicihi kulo kifeita. ⁶ Karungani iyo remo inyi manyu locam daha lo ketemoni na lodoru tona mana. ⁷ Igigilo kuno tenyi tenyi latenya nan tonyio kicio ca Lahitok isi kiniang iyo kuno tenyi tenyi pili. ⁸ Ibuha Yesu na libuhu to kiji lo kaweyak, na lara lotata lo David. Layomit na Ijir nei ene, ⁹ Na larumunore nan kidak many kitori mejo kasasuoni. Ati ida tenya lo Lobanga otora. ¹⁰ Kuno fad adik nan to cio kulo Lobanga kuna lonyumuni ojir manyu icieng orumu lwahuno na longon iyo Kristo Yesu ko deyo na losio tur. ¹¹ Ara ene tenya na locam to kigeno: Kolohiwei ohoi konyi Kiwar manyu mute ohoi konyi. ¹² kolohidik ohoi kilanyu manyu mute ohoi ara Lobito konyi kolohiberu ohoi inyi kiberu manyu mute inyi ohoi. ¹³ kalida ohoi kiruk Iwasihi inyi kiruk tonyio ida inyi otum beruno ken nenge. ¹⁴ Tosodoro kitibuhunita icieng kuno sangite. Tosony icieng to ketemoni lo Lobanga icwara ingohini ngolofa to tenyi tenyi, oru faida nenge manyu ongon kipalaru kaningok. ¹⁵ Itiyo na ijir lo kicwara ken nino iyo Lobanga iya tungani na lokwamati, katiyoni na lida riri iniefa manyu na lotenu tehita tenya lo dede. ¹⁶ Ingohi tenyi tenyi kulo kiyada kuna lida itikwata Lobanga, tonyio cio kuna limaru koditi lo kuna iyaditi ongoniti kingadaru faritin fad to ketemoni lo Lobanga. ¹⁷ Ilienyaru kitiyena neicieng iya sur. Kude kulo kuna cio icieng oho Yimenaus ko Piletus. ¹⁸ kuna logere oleng to kikoi lo dede. Itiyenati cio ojimi lokeru kibuhuno kitiihino ko kipalaroti kiruk lo cio kude. ¹⁹ Oto hati, owoita guri lo Lobanga ogol ting, na limadi tone kigero jimitan, “oyen Lahitok kuna lara kunenge”. Manyu, “cio pili kuna lotulo karana lo Lahitok ojir ongerihini rohojun”. ²⁰ Katwa lo kaji nahitok ongon sangite ida ara kuna likukuma to dab ko rial keken ati ongon manyu kuna logatuni to kete kode oduhuni to lokulufi, ara kude kulo ticitici kuna hitoha kude ara kulo ticitici kuna sidiha. ²¹ Kalitinyu tungani ken nenge iyo ticitici kuna irohori, olotu cia inyi ara lo ticitici kuna igoli, irumu inyi lonyu manyu longon ko faida diho Lahitok manyu ikukumahino kitiyo kuna ijiri. ²² Tongerihi ticitici kulo kipal kulo okilahaje manyu totak biran, kiruk, kimaruno ko kisiliban ara Lobito ko cio kuna lilolongo Lobanga to taulo kuna inyuji. ²³ Keruk rutohino iyo pepeita ko risa lo dataru tonyio iyaunita ngolofa. ²⁴ Manyu ida ngolofa ocam to karwaani lo Lobanga, ati ojir inyi ara kariejani iyo cio fad, otum kitiyena ida ilongo deu deu, ²⁵ tungani na lisinga cio kuna litipeha inyi to riejun to kigeno jimitan ngicio Lobanga icieng kirwo lo kiyauno icieng yenun tenya lo dede. ²⁶ manyu jimitan ngofwonu icieng iyo yenun ojir ofuriti iyo owic lo sitan na lofik icieng ara mabusi kulo kitiyo wahun nenge.