¹ Ngorwo tona kikoi bito icwarata kenite kuningi iyo rei kuningi ojir kileng ngida lobo iruk tenya to manya na ijir lo ngorwani nenge ² kolodeu nyujon ko rima lo ngorwani nenge ³ kecio dwarujon ningi ara lo ngota lo oleng iya kikada lo kweci kode kiciefita sangite kulo dab iya tongosi, aboli ko kyelani kuna igoli wel. ⁴ Ilany kuna, ingohi tara lo katwa, dwarujon na lida ohuliete lo Okorif na irie obuho manyu na lara lo wel to ketemoni lo Lobanga. ⁵ Tonyio inyi, ene kikoi ene lofihare ngorwo kuna inyuji afa berien kigeno neicieng iyo Lobanga odwarujore icieng. Icio afa icieng kenite kuneicieng iyo rei kuneicieng. ⁶ Iya Sara lafa loningo Abram many ilolongo inyi ojo lahitok. Ira ite tee kunenge kalitiyo ite tohi na ijir ida icio kikoi iyo bangun. ⁷ Iya na manyu ojir ite rei itongo to ningoro ko ngorwo kuningi itehita icieng to rima iyen jimitan ara icieng kaletok kuna lida ogoli manyu iya kalunyok ara Lobito ko ite lo kicwara lo warun lo kisa ojir lobo tohi ida itik kilifa ningi. ⁸ Lo lohicungi ojir ite fad itongo to yomo ara Lobito kiji ningi, itira cio kabayak to taulo ko kimaruno iya recera itongoti ilwaha kenite ko riejun. ⁹ Kedum rohojun to rohojun kode moro to moro ati to kigatati kuna ijiri tonyio kilolonguni ite iyo ene manya ojir irumu kigata lo Lobanga. ¹⁰ Tonyio igero ojo, “Tungani na limaru warun, na lowak deuno faritin kuna ijiri, ojir oric ngadief nenge iyo tenyi tenyi kuna irohori ko kutuk nenge iyo tenyi tenyi kulo kitinononga. ¹¹ Ingohi ibelo to rohojun itii jiran ingohi totak kisiliban okodomo inyi ¹² Tonyio ongon konyeha kulo Lahitok iyo kabirak manyu oloha kiyoha kunenge iyo kilifa neicieng ati omutok komom lo Lahitok iyo cio kuna litiyo rohojun”. ¹³ Ngai lotahita jore ko isi kaligeria isi kitiyo na ijir? ¹⁴ Kileng ngirumu isi kidak to kitiyo na ijir ingon isi ko gum. Kebang tohi na lobang cio kerienya. ¹⁵ Ati to taulo kuningi, itingadahiti Kristo ara kabu. Tik tik ikukumahino lo kinyahahino tenya cio pili kuna litifia lofere lo kigeno na lingonore ite. Ati inyiahahiti to riejun ko rima ¹⁶ iric nyujon lo taulo ojir kuna lotenya kuna irohori to ite, ko to manya ningi na ijir iyo Kristo, odahahi riri to na gulia neicieng. ¹⁷ Ojir ilany kalara wahun lo Lobanga jimitan ojir irumu kidak to kitiyo ara na ijir ilany kitiyo na irohoi. ¹⁸ Tonyio owei afa Kristo kakeny Lobito rief, kabirani to kapalak ojir iyaunore ite iyo Lobanga. Ifadari inyi iyo ken ati itiwaruni inyi iyo Okorif ¹⁹ to na okorif manyu olo inyi ititim tenya lo Lobanga iyo okorifi kuna longoni mabus. ²⁰ Kulafa loberu ningo berien kalitila Lobanga to dihan to faritin kulo Noa na likukumarihin tigol. To katwa nenge cio kude kuting ara mietauni keken olwahuni to kifi. ²¹ Manyu itotoro kuno kifi kibatisa na manyu lohilwahu ite jijia na lida ara kilala lo cora to kenite ati kitisadeni lo taulo kuna inyuji to ngati lo Lobanga. Kilwahu ite to kibuhuno lo Yesu Kristo, ²² na lirwok kai manyu ongon kana iteten lo Lobanga na longon malaikahin, kalanyunok ko kagolok fad iyo lanyuno ko obolore nenge.