¹ Iya na lorumunore Kristo kidak to ken, itotek manyu ite na koditi bito tonyio tungani na lorumu kidak to ken lokeru kifadaru kipal. ² Tona ida inyi orihe owar warun nenge ene kof lo kitiyo wahun lo ken na irohoi ati wahun lo Lobanga owar inyi. ³ Tonyio likeru afa ite karihin kitiyo ticitici kuna litiyo cio kulo kof iya kwerun lo konyeha, wahun na irohoi, ruma, karamahin kulo ticitici kuna lida ocam ko kiwora lopidingahin. ⁴ Ipany cio jijia kolodeuni jimitan ida ite irihe imora ko icieng iyo kuno ticitici inyi licio icieng kitikaja ko moro ite. ⁵ Ati ititim mute ite icieng kuna ticitici kuneicieng to ketemoni lo Lobanga na mute lolotu ngoto tenya iyo cio pili kawarak ko kaweyak. ⁶ Inyi na tenya licio ititimi layomit na ijir kileng iyo kaweyak ojir ongotohini tenya iyo cio to koditi lo ken ati itiwar to koditi lo Lobanga iyo Okorif. ⁷ Lonyiha lohicungi lo sangite fad. Tona itongoti owati kweci manyu irica kenite ojir ilifare. ⁸ Bebe nenge imararoti bebe tonyio imuk kimaruno kipali pali beciek. ⁹ Ifotunitati kenite kangite kuningi oru ngungunita. ¹⁰ Ojir Lobito Lobito itiyore kicwara na licio Lobanga inyi lo kirwaa kaletok itiyore kisa na licio Lobanga iyo kikohin fad. ¹¹ Kolotenya lobo ojir itiyo mejo otenya tenya lo Lobanga token. Kalirwaa lobo ojir irwaa to golun na licio Lobanga ojir iyo sangite fad omaji Lobanga ara iyo Yesu Kristo. Ingohi deyo ko golun tongon iyo inyi karihin ko karihin. Amen. ¹² Recera kepany to temi temi kuna imeji kuna lirumunore ite kidak ori mejo lobotohi lilunya ite longon kitiihino iyo ite. ¹³ Itokwamati jimitan ingon ite ngara kidak ko Kristo ojir mute kwama ningi ifut kalitibotuni inyi. ¹⁴ Kolomoroti ite to karana lo Kristo ingoni ite ko gum noo tonyio kingon okorif lo gum ko Lobanga ko ite. ¹⁵ Kalirumu kidak keco ara to kifada lo tungani kode to koko kode iya lobo koditi lo kapalani kode iya karutohitani iyo tenyi tenyi kuna lida ara kuningi. ¹⁶ Ojo hony kalirumu isi kidak to rahun Kristoni keco riri kinief ati tomaja Lobanga jimitan libur isi karana lo Yesu Kristo. ¹⁷ Tonyio logoru tik lo ngoto lo tenya manyu iciaha to katwa lo kaji lo Lobanga manyu kaliciak tohoi ori hati mute aja to cio kuna loberu kiruk layomit na ijir lo Lobanga? ¹⁸ Manyu, “Kologol iyo cio kuna ibiri lwahuno, nyio dong litiihino iyo cio kuna lida iruk Lobanga ko kapalak?” ¹⁹ Dong kuna lorumu kidak to wahun lo Lobanga, ingohi iciori kenite kuneicieng kac kulo kaduhoni neicieng manyu osodoroti kitiyo ticitici kuna ijiri.