¹ Tona itoric kenite iyo rohojun lo taulo ko kitinononga fad, talerun, okaine ko gulia tenyi tenyi to koditi fad. ² Iya tee idoleha itikodomoti kuna inyuji iyo Okorif ojir ibolore iyo lwahuno ningi ³ iya ene limanyare ite jimitan ojir Lobanga. ⁴ Iya na lifwonunore ite iyo inyi moru na iwar na loberu cio ati na lonyumu Lobanga manyu na lodwaru iyo inyi ⁵ ite manyu iya morutok kuna iwari kingoniti duhohino iyo kaji lo Okorif lo rahun kadwarak kuna inyuji kuna licwara kikumihin kuna inyuji kuna liruk Lobanga ara iyo Yesu Kristo. ⁶ Tonyio ojo igeriti, “Tode afiha nan moru Zaion moru na lonyumuni na inyu lo ogule lo kaji manyu tungani na lofik kigeno iyo inyi ida mute riri inief”. ⁷ Jijia iyo isi na liruk ara ene moru lo wel. Ati iyo cio kuna lida iruk, “Moru na loberu kaduhok Lolotu ara moru lo ogule lo kaji”. ⁸ Mantu, “Moru na licio cio oruruhita Manyu moru na liturorita icieng”. Oruruhita icieng tonyio ida icieng iruk ifak iya na likukumahinorehin to icieng berien. ⁹ Ati ira ite cio kuna lonyumuni, kadwarak kulo okabwe, cio kulo kof na inyu, cio kuna lara kulo Lobanga, ojir ititim imajiti kulo Lobanga na lilolongu ite to katwa lo lokimuyuk iyo wangun nenge na idwaru. ¹⁰ Ida afa ite ira cio berien, ati jijia lira ite cio kulo Lobanga, ida afa ite irumu kibaya, ati jijia lirumu ite kibaya. ¹¹ Morot kuna lamaru, alelia nan iyo ite kuna lira welo ten to kof lo ngerihino wahita kuna iboti kuna litiremo warita kuningi. ¹² Itiwar warun na ijir kiji lo cio kuna lida iruk na kileng ngidoro icieng ite ojo ipali, ojir odeuni ticitici kuningi kuna ijiri itikwati Lobanga far na mute lolotunore inyi ngoto lokiho. ¹³ To Lahitok, icwarata kenite kuningi iyo kalanyunok kuna lofihi kiji lo cio, kode iyo kabu na lara lahitok na lolanyu ¹⁴ kode iyo gavunahin kuna loculu inyi lo kitigema kapalak, manyu lo maja kuna litiyo ara na ijir. ¹⁵ Tonyio itongo ara wahun lo Lobanga jimitan to kitiyo ara na ijir, ojir ite itibuk tenyi tenyi kulo lunya kuna lotenya kadatarok. ¹⁶ Itongoti iya cio kuna lolanyu kenite ati kitiyore na lanyuno lo kenite kuneicieng ara kimuhi lo sangite kuna irohori, itongoti iya karwaak kulo Lobanga. ¹⁷ Itotorti bangun na ibehi iyo cio pili; imarutu orecera lo karuhok, itibang Lobanga itorimati Kabu. ¹⁸ Opihin, icwarata kenite iyo kalanyunok kuningi to rima fad, ida ara iyo kuna ijiri libuha to ite keken ati manyu iyo kuna ingereha. ¹⁹ Tonyio ojir kalodik tungani kidak na lida ocam tonyi tonyio ibuhunita inyi Lobanga. ²⁰ Ati nyio litongo ara lo kwama kalidik isi kidak na licori isi to kipal? Ati kalirumu isi kidak to kitiyo ara naijir, idik hati, ara lo kwama diho Lobanga. ²¹ Kilolonguni ite iyo koditi lona warun tonyio orumu afa Kristo kidak tote, lo kicwara ite kitotorita lo jimitan ojir ite ijit omot nenge. ²² “Ida inyi itii lobo kipal manyu oru lobo kitinononga lolotu to kutuk nenge”. ²³ Kalomor icieng inyi to mori mori beciek ida inyi ilenu: Kileng lorumu inyi kidak ida inyi litibang cio; ilany icio inyi ken nenge iyo inyi na longoto tenya ara na ibehi. ²⁴ Loting inyi to ken nenge kipali pali kuniyang iyo kete lo jimitan ojir ohoi kiwei iyo kipal manyu kiwari iyo biran, to korongan kunenge kitifuriori ite. ²⁵ Tonyio liri afa ite iya kera ati jijia liitu ite iyo katibalani ko kaririani lo warita kuningi.