¹ Ainyong d bai ejyo? Eyeng esukai dithe h;eyau, dobolo alwahio? ² Thaang hoiwona de ti ahani. Ohothai heye ditha heyau, angai ikoti erasa ditha heyau, angai ecohi amanya ditha heyau? ³ Aang ithai itek hijan iring abuhohini nya Batisimo d’ohothing Olwarai ditha ho Kristo Yesu, abuhohini nya dosong Batisimo ditha h’aye nanyong. ⁴ Amuhahini nya diyan ohothai honyong tholo Batisimo dith’aye. Ofuhi arami hune ahani, dowon iring nanya ithabuhunerek Kristo Yesu, th’abolori thon’Omonye, inyong na, edaha de dang ditha h’elajok n’esu. ⁵ Inyong na, ara ethu ohothai emorihunu dith’aye nanyong, nehielaru n’aye nanyong, emorihunu de dang ditha h’ebuhuna nanyong. ⁶ Itek ohoi arami hune, hijan othulo lohothai ohoboloni lobehohini honyong di kruce, dithorohojye ahwan n’eyau adi. Ofuk ahani daang ikoti eyeng awonan ara ongacani h’eyau. ⁷ Lathuk aye, awon inyong lo ara ohobisani l’eyau. ⁸ Ti, ara ethuk ohothai aye ho Kristo, eruk hijan emanya de amaji Aboithe ditha honyong. ⁹ Etek hijan nya, ethabuhuni Kristo thoye, aang hoye ikoti, aang imyong aye indafaitho. ¹⁰ anyo, d’arami hajori aye inyong ditha h’eyau, aye inyong gelere th’ohothing fodok. Ti, esu nya inyong, amanya dith’Ojok. ¹¹ Th’oyihoi tholya Aboithe, otihatha dang th’ahwandek thahathai hijan, eye ithai ditha h’eyau, ti, ara hesu d’Ojok ditha ho Kristo Yesu. ¹² Iring ahani ne, hoihorihini eyau thoindafithe ithai dith’ahwan nathai ahayani, diruhu ithai asnag hamonyong hawak inyong. ¹³ Hoithafothohina okangir h’ahwandek hathai d’eyau, dowoni ara attitto harimahinerek aangan n’abisan. Ti, ithafothohina ahwandek hathai d’Ojok iring ohothing hoiyanai thoye disu, ara ithai ithafothok okangir h’ahwandek hathai d’Ojok, iring attitto hegyemarik dirimahinerek abisan. ¹⁴ Hoihorihina eyau thoindafaithe ithai, anyo, aang ithai thoth’oyalu, ti, dith’alwahio. ¹⁵ Ara ainyong hathi? Ewon di yauna, ti, anyo, ewon tholohop h’oyalu dia dith’alwahio? Inyong thaang hoiwona do ti ahani. ¹⁶ Aang ithai itek hijan ara ithafothok ithai ahwandek hathai ara ongacani, iwon ithai de ara ongacani d’othulo leruk ithai arami hanyong? Arai won ithai ara ongacani h’eyau, iyaru ithai de diye. Ara ithai ongacani hoithairyo arami, iyaru ithai de dibisan. ¹⁷ Ti, humo d’Ojok! Anyo, iwon ithai nya ara ongacani h’eyau karik ethuk ithai ethairyo karik eruhon thoth’othaji opecen l’etyenio nanya isarahini dothai. ¹⁸ Athuhi ahohina ithai adi th’eyau, karik ethuk ithai awonan ara ongacani h’abisan. ¹⁹ Acama nang iring othulo, anyo, th’elihan than’elathulo nahoi, iring nanyahinerek okangir h’ahwandek hathai ara ongacani d’ebothan karik thaangan thon’oyalu nabolo disarahina dang okangir h’ahwandek hathai ara ongacani d’abisan difunerek ara hodwa. ²⁰ Anyo, nanya iwonderek ithai ara ongacani h’eyau na, ilama ithai nya th’abisan. ²¹ Th’omiru hule, ainyong nayyu nya irimak ithai th’asamg hethajwuyo ithai ahosi thenene ne? Aning naindu th’asang hua, inyong aye. ²² Ti, nathuhorik ithai ahohina th’eyau ne, ara ithai iwon ara ongacani d’Ojok, ewon ithai h’aning nayyu difunerek ara hodwa. Aning nayyu thiya esu na amanya mak. ²³ Adumetha h’eyau isong aye. Ti, esorio n’Ojok inyong amanya mak ditha ho Kristo Yesu, Ohobu lohothai.