¹ Anyo, athuhi ohothai ethabisahina th’eruhon, ewon h’elik n’ahwandek karik n’ahap h’Ojok thol’Ohobu lohothai Yesu Kristo. ² Tholonyong, iwon ohoi h’eruhon nerumahinerek ohoi alwahio newetha ohoi diya, karik ohoi dang ithadara diyihi d’abolori n’Ojok. ³ Ikara ne hamaring, ti, ithadara ohoi dang ditha ethathacianitha hahoi. Itek ohoi hijan iyanu ethathaciana afwan ahithemi. ⁴ Iyanu afwan ahithemi othulo, karik othulo eyanu eyihina, ⁵ karik aang eyihina iyanu ajwuon n’ahu, anyo, athuhi nanya na abuhohina amuno n’Ojok ditha h’othaja hohothai thol’Ohoile lodwa, lonya athuhi esarahina dohothai. ⁶ Aca, hoilik ohoi nya, d’omiru hocohi, aye Kristo th’ohothing thahaang otek Ojok. ⁷ Diri, oko de d’othulo lobo diye th’othulo tholobis, juk kodien owak othulo lobo aye th’othulo tholoyyu. ⁸ Ti, iruhok Ojok amuno nanyong olefeng dohothai, anyo, orii lonya ewonderek ara ohoiyak, aye Kristo thohothai. ⁹ Th’orii le ikoti, iring athuhi ohothai ethabisyo th’ahotho thananyong, ithalwahu de ohothai th’engere n’Ojok. ¹⁰ Aca, ara hoiwon ohothai nya ara omerok, emora ohothai nya h’Ojok th’aye thon’Olonyi, koti, diholu hemora, oindu de ohothai ithalwahuna th’esu thananyong. ¹¹ Ikara ahani ija, ti, emuno dang ditha h’Ojok thol’Ohobu lohothai Yesu Kristo, lathuk ohothai esarahina emora na. ¹² Inyong na, iring ojingak eyau di hap thol’othulo aboithe, th’oyihoi tholya dang ojingak eyau. Karik ireretharu eyau d’ohothing fodok , anyo, eyauni ohothing fodok. ¹³ Aca, lwai d’oyalu, owon nya eyau dihap, ti, aang othulo lefiye d’eyau, ara awang oyalu. ¹⁴ Ti, indafaitho aye ahap, hara th’Adan lwai do Musa, juk tholodihide h’ohothing hokabong nya hoiyau iring amesio n’Adam, loihyelaru le, lonya oloinduna lo. ¹⁵ Ti, aang esorio ojahitha eyau. Aca, ara oye ohothing holwa th’eyau thon’othulo aboithe, angai de aang ocohi tuhudik alwahio n’Ojok karik esorio n’othulo aboithe, Yesu Kristo, dilwahuna ohothing olwarai! ¹⁶ Iring na, awang esorio ojahitha aning naindu th’eyau n’othulo aboithe. Akanyo n’oyalu othifunu epal karik eyanu edara neyau, ti, athifunu esorio epalitha halwa karik eyanu ethabisio. ¹⁷ Aca, ara indafaitho aye ahap th’epal thon’othulo aboithe, angai de ofuni ohothing hoifothu alwahio nabolo karik esorio n’abisan indafaitho amanya ditha othulo aboithe, Yesu Kristo. ¹⁸ Inyong na, iring eyanu epal aboithe edara n’ohothing fodok hoipal, iyanu de dang ehandio aboithe n’abisan naindu th’ethabisio d’amanya n’ohothing bukulung. ¹⁹ Aca, iring nawonderek nya ohothing holwa ara ohoiyak th’amesio thon’othulo aboithe, ofuni de dang ohothing holwa iwonan ara ohobisak th’eruhuna thon’othulo aboithe. ²⁰ Ti, oindu oyalu difonio epal. Arahari, amaji nabolororik eyau, ithalangyo abolori nalwahio. ²¹ Ofuhi arami hune ahani, dara, iring indafaitho eyau ahap ditha h’aye, indafaitho de dang alwahio ahap thal’abisan d’amanya mak tholo Yesu Kristo, Ohobu lohothai.