¹ Dicuhi, olarok hundang, omunothik d'Ohobu. Awang hosiru donang digerohina dothai koti arami hune, olarok. Ithasukayo ithai de asang hune ara hoibuha. ² Omijethe tuhudi ongohe. Omijethe tuhudi ohoigyemak omonyorok. Omijetheohe tuhudi engongotho n'ahwandek caa. ³ Anyo ohothai abosio. Ohothai isong ohomojo h'Ojok th'Ohoile thol'Ojok. Ohothai hoithadara tho Kristo Yesu, karik awang th'ohothai awahan asang hothohop. ⁴ Juk ahani ne, nang th'ahwan era nang iwahan asang hothohop. Ara igigilo othulo lobo hijan owak inyong asang hothohop, era nang iwaha okalak inyong. ⁵ Abosye nang nya operok tises diholu h'athamana hindang, Ara othulo lo Israele, l'amukok no Benjemino, Ohebrei l'ohebrei, dirijaru h'oyalu, l'Ofarisi. ⁶ Iring d'ayulon, ethagyemyo nang ekklesia; iring abisan th'oyano, kabong nang epal. ⁷ Ti, asang nya hayyu donang, thono hindang alithoi th'arami thoho Kristo. ⁸ D'arami hadiri, eheryo nang asang ara halitho th'abolori bebe than'ateha thono Kristo Yesu Ohobu hindang. Tholonyong, alitho asang fodok donang. Eduhu nang asang hune fodok ara aharanya dirimahinerek Kristo ⁹ karik arimahini nang ditha honyong. Awang nang awon habisan nawon ara hindang th'oyano. Kombwo awon nang habisan th'eruhon do Kristo, abisan th'Ojok naindu th'eruk. ¹⁰ Thenene ne, awak nang atehan inyong karik akolon nanyong nebuhuna karik ethathacanitha hanyong. ¹¹ Awak nang eloyitho ara arijori n'aye nanyong. Thoyiho tholobo atek nang de ainyong ebuhuna th'ohoyak. ¹² Awang hobis dijaran athuk nang efothuna asang hune dia hijan awon nang ara othulo lathuba tuhudi. Ti, enginyo nang d'athenu ainyong othenunerek nang Kristo Yesu. ¹³ Olarok, awang nang egigilo hijan athuk nang th'ahwan thohindang athenuna inyong. Ti, owon aning aboithe: Akworo nang ainyong nadiholu karik ainyong nadihithemi nethakolyo. ¹⁴ Eringak nang ahwan adihithemi d'arimak nang aning nawak nang nabolo d'elongo n'Ojok ditha ho Kristo Yesu. ¹⁵ Ohothai fodok habi hulya, hegigilothi thoyihoi tholo; karik ara igigilo ithai thoyihoi tholo ikela th'aning thanabo, ithaithak Ojok de dang dothai. ¹⁶ Ti, aning nedwong ohothai diya, hendefatha th'akolon. ¹⁷ Othifoithethe nang, olarok. Omijethe tuhudi ohothing hodaha odahitha howon ditha hohothai. Odaha holwa - ¹⁸ ohotto hathuk nang ithai anyahini, karik anyahi nang ithai toki th'ehiyo - iring omerok h'akruce no Kristo. ¹⁹ Aning nawak isong etharohoja. Ojok losong ahohe nasong, karik ethadara nasong ajwon n'ahosi hasong. Igigiloi th'asang thohothohop ti. ²⁰ Ti, ohothai ohothing h'abore no Paradiso, amaji nethilaunerek ohoithalwahani, Hobu, Yesu Kristo. ²¹ Iloicyo de ahwandek hahothai hotholohop ditha ahwandek hathuhi ehuhumahina iring ahwan nanyong nabolo, nehuhumunu th'akolon thananyong, nesarak asang fodok tholohop honyong.