¹ Ara owon ewuwulahina nabo do Kristo, ara owon ayiji th'amuno nanyong, ara owon asuduhe n'Ohoile, ara owoni amehina karik awahan, ² Isarahina amuno hindang thoifutha th'egigilo ara aboithe, amuno aboithe, ara hathuk asuduha ditha h'Ohoile th'aning aboithe newak arimahina. ³ Hoihandyethe aning nabo th'engaru dia thawang thanegigilo. Kombwo th'ethabuyangyo ahwandek th'egigilo ara nanyyu. ⁴ Indafaithethe ahwandek ikara th'asang th'ehewak ithai hama karik dang th'asang th'ahawak homok. ⁵ Igigilothi thoyihoi tholonya ho Kristo Yesu. ⁶ Owon inyong lo nya diwonit h'Ojok, ti, aang nya inyong igigilo erijaru nayong h' Ojok iring aning nayiha inyong donyong. ⁷ Kombwo, ahohi ahwan nanyong. Eduhu ahwan ara ohoigyema. Oleyo iring arijori n'ohothing. Orimahini inyong dith'arijori n'othulo. ⁸ Ethacuru ahwan nayong dihap eruk arami lwai diye, juk aye n'akruce. ⁹ Inyong nethahuyo inyong Ojok. Esarak inyong ofure tholohide h'ofuretho fodok. ¹⁰ Ihandyo ahanya d'origongo ahungitho th'ofure tholo Yesu, ahungitho h'ohothing hotho Paridiso, hothohop karik hohotholohop h'ahap. ¹¹ Ihandyo ahani d'onyahi ahuthuhye fodok hijan Yesu Kristo Ohobu, abolori n'Ojok Omonye. ¹² Inyong na, ohothing hamuno nang, iring heruhorik ithai juii, ikara ahibu nang awon, juk ahibu nang awang thoihiji hothai, igyemathik ethalwahuna nathai th'abangi karik th'ehihira. ¹³ Ojok legyema ditha hothai lya diruhuna karik digyemarik th'amuno thanyong thanayyu. ¹⁴ Ihandyethe asang fodok kwong elafere. Ihandyethe thoyihoi tholya dawang othulo lomoryo ithai ara odwalak, awang ebothi th'oduri h'Ojok. ¹⁵ Ihandyethe ahani diwulo ithai iring afangan n'ahap dihiji h'oper lathuk etharohoja. ¹⁶ Indefatha ocame l'Ojok l'esu rot, daindu nang ibolori d'ofaning lo Kristo. Th'orii le aindu nang de itehan hijan kabong egyema hindang okar. ¹⁷ Ti, juk abuhoroi nang adi iring esorio nehuma n'egyema nathai n'eruk, amuno nang, nang amuno hothai fodok. ¹⁸ Th'oyihoi tholya omunothi dang fodok, karik ithai dang imuno honang. ¹⁹ Eruk nang do Yesu Lamolo dichihina difahahina Timoteo kuak dozai. Egigilonang ara lanyahu, izakolio inyong de nang za anyahina nang aning nehandio Ojok de esuka nazai. ²⁰ Awang nang awon ho ozulo lobo iring Timoteo lomijo dozai iring nayu. ²¹ Homok hawak nang efahahina dozai hulo hegigilo arami hosong ti. Awang igigiloi bebe aning negigilo Yesu ijan oko bebe. ²² Ti, itek ithai ayiji nanyong, anyo, iring negyemarik oitho d'omonye, inyong dang negyema inyong honang d'evanjelio. ²³ Iring na, asulak nang de inyong operok hulya ne ara oyyu do nang. ²⁴ Ti, ayenyo nang Ohobu d'aindu nang operok hulya ne dang kwak. ²⁵ Ti, ojak donang Epafroditos thoinyahahini dothai. Inyong lo lalalai karik ohoigyemani h'ohoremoni, ohifahe karik ohoigyema l'asang hawak nang. ²⁶ Odiha nya othaji lonyong bebe, karik kwak nya esuka hothai anyo, ethaningu ithai nya hijan odiha. Odiha nya diri. Ayindek aye. ²⁷ Ti, amehinu inyong Ojok, ikara ti inyong hama, karik dang nang, tek nya orasa donang ohohie dihide h'ohohie. ²⁸ Ojak oyyu donang dinyongohina asulahina inyong dothai dara ara ithai hetehu inyong ara ithai imuno karik ahwan hindang de dang eyelehe. ²⁹ Ifothuna Epafroditos d'Ohobu th'amuno fodok. Ithahabuyethe ohothing iring inyong. ³⁰ Anyo, th'arami th'egyema nya thono Kristo oyindek inyong aye. Akworo esu nanyong digyema thonang, karik ethafuthak egyema nera ithai igyema thonang.