¹ Iring na, olarok hamuno nang, nang awak, amuno h'alohuluk hindang nelahobu, thoyihoi tholya, awoitha nang h'Ohobu, omorot hamuno nang. ² Amojo nang Euodia, karik amojo nang Syntyc, egigilo nahothai thoiwona a oboithe ditha Ohobu. ³ Diri bebe amojo nang iye, omotte hindang laming: olwahatha angorwo huna. Igyema honang dithathurohina evanjelio tholo Klementino karik ohoigyemak homok hohoi, howon ofuretho dithatha h'amanini n'esu. ⁴ Omunothik ditha h'Ohobu. Enyoryo koti, omunothik. Ohothing fodok thoteha ayiji nathai. Ayindek Ohobu. ⁵ Hoigigilothik ara namonyo th'asang thahamok. Kombwo ditha asang fodok ihandyethe thamojo karik ⁶ Ojok thoteha efiyo nahoi. ⁷ Karik elik n'Ojok, nethalangyo olofioro, iyohotho de othaja h'egigilitha hathai ditha Kristo Yesu. ⁸ Dingohina arami hune, olarok, asang hawon ara h'adiri, asang h'ethaboloryo, asang fodok h'oyalu, asang fodok halibo, asang fodok hamuno, asang fodok hanyahini ara nayyu, ara owon aning nayyu bebe tholohide hayiji. ara owon aning nabo nafurye, igigilothi th'asang thohune. ⁹ Asang heyeyena ithai, asang hefothu ithai ara ithai itehu donang, ehandyethe. Owon de Ojok l'elik hothai. ¹⁰ Amuno nang bebe d'Ohobu, anyo ethuk ithai ethalengejuhyo abangi nathai donang. Diri ebang ithai nya bebe thonang, ti, awang nya oyihoi lelwahyerek ithai nang. ¹¹ awang nang acama ahani hijan awaharik nang alwahio. Athuk nang eyeyena amuno d'oriihio fodok. ¹² Atek nang ainyong awonan ara ohoicanani, karik dang atek nang ainyong asoman. Thoiyihothik karik d'asang fodok athuk nang eyeyena asang hedima h'endafaitherek ahwan ara nayyu dia h'ahure, angai obarai dia angai omojoi ara awang aning nabo thohoi. ¹³ Ocahi donang dihandyo asang fodok tholonyong lethakolyo nang. ¹⁴ Ti, ehandyo ithai tuhudi dingara honang ethathacanitha hundang. ¹⁵ Itek ithai Ofilipians hijan diculwe h'evanjelio, edehina nya hindang Macedonia awang ekklesia nya nengarak nang disaryo karik difothuna, arahari ithai hamaring. ¹⁶ Juk nanya awonderek nang di Tessalonia, esulak ithai nang alwahio n'asang hawak nang operok holwa. ¹⁷ Ikara hijan nang lodithifeyo esoritha. Kombwo, nang lodithifeyo ahayocong nethaboloryo ahujon nathai. ¹⁸ Athuk nang efothuna asang fodok, karik awon nang h'asang olwarai. Athuhi nang ethafuthahina. Efothu nang asang tho Epafroditos thothai. Isong huna asang hangwo kudaar, aning nesarahini ethamunoyo Ojok. ¹⁹ Ithafuthak de Ojok hindang asang hewak ithai iring ebarithi h'ohobye tholo Kristo Yesu. ²⁰ Th'orii lya, ahujon thoiwona d'Ojok karik Omonye lohothai mak. Amen. ²¹ Ithamandahina ohoiruhoni do Kristo Yesu. Ithamdayo ithai olarok hoisuka honang. ²² Ohoiruhok dini fodok ithamandaye ithai, kereki ahang no Cesare. ²³ Alwahio n'Ohobu Yesu Kristo thoiwona h'ohoile lothai.