¹ Thongai ofuni ethethena karik elafere dihiji hothai? Ofuni th’awahan nathai eribo dihiji h’asuduhe nathai? ² Iwak ithai kodien, ithai ikoti aang hoiwon h’aning nabo. Ittohyo ithai, ithai ikoti iwak kodien, ara ithai aang icohi arimahina. Iribo ithai, ara ithai ithethena. Aang aning nabo thothai, anyo, aang ithai ifiyo. ³ Ifiyo ithai, ithai aang hoifothu, anyo, ithathalik ithai efiyo; iwak ithai ifunerek igyemarik asang hewak ithai. ⁴ Ithai heyau h’obusuha h’ahathing hamok! Aang ithai itek hijan elamorot h’ahap, inyong elamerok h’Ojok? Inyong nara, lowak elamorot h’ahap, owak eduhuna ahwan ara omerohothononi l’Ojok. ⁵ Dia thanathai igigilo igigilo ithai hijan ojyo amanini Nadwa ija, “Ohoile lathuk inyong esarahina thomahyai ditha hohothai, ohain bebe?” ⁶ Ti, isarak Ojok alwahio nabolo, aca, ojyo amanini Nadwa, “Ida Ojok ohoithadarak, esarak alwahio d’oilamuhajak. ⁷ Inyong na, iruhohina d’Ojok. Idaratha Sitan, ongero de thotaoi. ⁸ Ifuna indehai d’Ojok. Oindu de indehai dothai. Ilalayethek ahas, ithai ohoiyak, ithai ithaliboryo othaja, ithai ohothing hoigigilo operok arehai. ⁹ Otharihathik, oyoothik karik ikorotho! Ahenda nathai thoiloithoi ara Athariha karik amuno nathai ara ayoo. ¹⁰ Ithabuyangyethek ahwandek dihithemi h’Ohobu. Ithahuyo de itha. ¹¹ Hoicamathik arami hamonyori tholobo tholothai, olarok. Locama arami hamonyong tholai d’oyalu dia okanyo olai imonyoroi karik akanyo oyalu. Ara ikanyo iye oyalu, ikara iye ohoihandani l’oyalu, iye ohokanyani. ¹² Aboithe ti, inyong ohoisarani l’oyalu karik ohokanyani. Inyong aboithe locohi ethalwahuna karik ethorohojo. Iye ngai, iye lekanyo othulo loindek dohoi lya? ¹³ Ithaningyethek thenene ne, ihai hoijyo, “Ahanana dia moithe ifwo ohoi de di bore, ohoi isuka dia oyinga, ara ohoi ithanyangyo, ohoi irimak ebarithi. ¹⁴ Ngai otek ainyong de ofuk moithe karik ainyong de esu nathai? Aca, ijahitha ithai iring eriri nara naleyo arii tiibai ahani alitho. ¹⁵ Kombwo, ira ithai ijyaran, “Ara owak Ohobu, esuka de ehandyo aning na dia nya. ¹⁶ Ti, ahani ne, ithai hodi ithadara, hibu ithai induhyo asuhena dithaleyo ainyong iwak ithai egyema. Ethadara ne fodok amonyori. ¹⁷ Inyong na, aca, othulo loyinik ehandyo aning nayyu, aang hoihandyo, owon donyong ara eyau.