¹ Ifuna thenene ne, ithai ohobarak, anyo, ikoroth ara ithai iwuluho, th’amyehunu thanaindu dothai. ² Athuk ebarithi hathai amuyahi, athuk abongoitho hathai iriribiha. ³ Athuhi ayel karik ebindang neyelehe na ebothan, alodokiya de nasong ithaculok ithai. ⁴ Idorotho, adumetha h’ohoigyemak horomo amandak hathai hedimaitho ithai, hadikoron thoithai. Onyo de ithai iring ahimang. Ethuk ithai akanahina abara nathai n’operok hothocuhit. Oikoitha h’ohoingongothok ewasi diyoha h’Ohobu l’elulung n’ohoremok. ⁵ Ethuk ithai esuka aliboroni nothohop, ara ithai ileng ethamunoyo ahwandek hathai. Ethuk ithai ethafiryo othaja hothai d’ofaning longocerek. ⁶ Ethuk ithai edra fodok adi karik ara ithai ittohok othulo lobis. Aang inyong lo ida ithai. ⁷ Ongongohina, do ti, olarok, lwai d’ainduna n’Ohobu. Idorotho, angai ithilayo ohoromoni ahayocong nanyong nalibo thohop karik angai ongongyo inyong thonyong, lwai inyong efothuna ohusik ohoithemok karik oiholuha. ⁸ Ithai dang, thongongok. Ithakolyethek othaja, anyo, aindek ainduna n’Ohobu. ⁹ Hoiwiwinyathi, olarok, dith’ahwandek hathai tek ithai amani fodok adi. Idorotho, ohokanyani lowetha dihuthuk h’oyihet. ¹⁰ Iduhuna aryemara, olarok, th’ethathaciana karik angongio n’ohocorok, ohothing hacama ditha h’ofure l’Ohobu. ¹¹ Idorotho, iduhu ohoi ohothing hangongu ara ohomunok. Ethuk ithai ethaninguna angongio no Job, karik itek ithai ainyong awahan n’Ohobu, angai owon inyong ara lomiehunu karik lomiehi. ¹² Tholohide h’asang fodok, olarok, hoipithathik th’ahide, th’ahap dia th’eruhohina asing nabo ahithemi ahithemi. Kombwo, “Aa” nahoi, thoiwona ara “Aa.” ara “A a” nahoi, thoiwona ara “A a.” daang ithai ipwaharu ditha h’akanyo. ¹³ Owon loboling dihiji hothai lethathaciana adihari n’amanya? Inyong thomjyoi. Omuno lob? Thoidoloi oyendok h’amuno. ¹⁴ Owon othulo lodiha dihiji hotha? Thoilongoi ohobolok h’Ekklesia, thofunu omojyoi thonyong. Thoboroye inyong th’elethang th’ofure thol’Ohobu. ¹⁵ Ithaijyo de amojo n’eruhon othulo lodiha lya, Ohobu ethadocyo inyong; ara eyau, omehi de inyong Ojok. ¹⁶ Onyahina ahwandek hathai eyatha hathai, ara ithai imojo th’ahwandek thahathai diyyu ithai. Amojo n’othulo lobis, oko bebe digyemarik honyong. ¹⁷ Elija nya othulo iring ohothai. Amojo nya th’akolon hijan ohuju thaang osai;kabong diri ohuju osa d’ahap nya oyingathik aunihoi hoyefathik inde. ¹⁸ Thiya, Elija ikoti amojo. Ahide esarak ohuju. Ara ahap edoyo ahayocong nanyong. ¹⁹ Olarok hundang, ara ongero lobo thothai adi th’arami hadiri, loboling inyahunu inyong, ²⁰ othulo lya thoteha hijan othulo loipahu ohoiyauni th’oyihoi lonyong lepal, olwahu inyong thoye karik epahu inyong th’eyatha halwa.