¹ Aang holwa hothai irahi ifuna ara ohotyenak, olarok hundang, aca, itek ithai hijan ohoi hoityenio huly ofuni de ikanyo thanako. ² Aca, eboso ohoi fodok ditha oyihothik olwarai. Ara aang othulo iboso ditha ocamitha, inyong lo othulo lobis. Ocohi donyong dipahuna ahwan nanyong fodok. ³ Thenene ne, ara esarak ebilathi hattik dihuthuhye h’akusani diringyerek isong diruhi arami hahothai, ocohi dang ohothai endafaitho ahwandek hasong ara Aboithe. ⁴ Idoro dang arokoni, juk halathi angai, ara ahomwa nako newak isong, okuraru isong oyiret lotti bebe d’amaji nawak ohosulani. ⁵ Th’oyihoi tholya, ongadiep oyirik lotti l’ahwan, ti, ithaithak asang hahittwak. Idoro dang owulyewulye h’ahimang hottik, edweye oduyaru lohittok. ⁶ Ongadiep dang ahimang, ahap n’amonyori nedwehini dithatha h’okeri h’ahwan nahothai. Itharohojyo ongadiep ahwan fodok. Idwehi ongadiep oyihoi lesu karik inyong dang th’ahwan ahimang nawulo th’ahimang. ⁷ Aca, opecen l’ecang n’afara, ahweny, ecang naryetha, ecang nathath’ahari nahittok, iwuwulunu karik athuk othulo ewuwuluna. ⁸ Ti, aang othulo locohi ewuwuluna ongadiep ara loyyu. Inyong lo amonyori naang oyiri, ifut h’ohiyani lethayeyo. ⁹ Ara ohothai hemamajyo Ohobu karik Omonye, karik thonyong dang ohothai ifyethak ohothing, honya athuhi ayeuna d;arijori n’Ojok. ¹⁰ Th’ahuthuk Aboithe ne ofuni aboroya karik afyethahina. Olarok hundang, asang hune thaang hofuhi. ¹¹ Obuhyo ologugudut ahari thohuthuk honyong, hayil re, dia hadwa? ¹² Ohiyani lohittok l’ahayo, olarok hundang, idadoyo re ahayo h’olif? Dia ithadoyo olemon lohittok lo, abiyongo? Aang dang ahari hedwadwalanga iloitho ara hayil. ¹³ Ngai thoth’ohothai lelofioro atek tuhudik? Lya thoithaithak esu nayyu th’egyemathik thahanyong ditha elamuha n’slofioro. ¹⁴ Ti, ara iwon ithai h’ahayini nadwa therekeleng karik awaha nabolori dithaji, hoithadarathik, ithai idwala d’eladiri. ¹⁵ Ikara elofioro ne naindu dihap thohide. Kombwo, inyong na nothohop, ikara n’ohoile, n’amonyori. ¹⁶ Aca, amaji nawonderek ohayine karik awahan n’abolori, dia owon engolohocia karik egyemathik amonyorok. ¹⁷ Ti, d’elofioro n’othohide, ainyong ahithemi, alibori thila thila, amuno n’elik n’ahap, ayiji, esuka dee, awonan h’amehina karik ahayo hayyu, aangan n’ekekelyo ohothing karik eladiri noth’ohaji. ¹⁸ Ahayocong n’abisan idula ditha h’ohothing hoduho elik n’ahap.