¹ Olarok hundang, hoimattahina d’eruhom d’Ohobu lohothai Yesu Kristo, Ohobu l’abolori, ahibu ithai iwon herehon d’ohothing homok. ² Ara ijinga othulo lobo loiyofo ayeli karik abongoitho aliborok d’oputet lothai, ara dang ohoicanani lebot abongoitho ajinga diya. ³ Ara imijyo iye d’othulo lolibo abongotho, ara iye ijyo, “Owoni dini d’amaji nayuu,” ti, ara ijyo d’ohoicanani lo, “Owethai d’amaji nya,” Dia “Owoni diker h’okara lafethahinerek nang ahejeha lo,” ⁴ Ikara ithai diri hodikanyo ahwandek hathai? Kabong ithai diri iwon ara ohokanyak th’egigilitha thoh’omonyoroni? ⁵ Ithaningyethek, olarok hundang, kabong diri Ojok honyimu ohoicanak h’ahap thobarai dith’eruhon karik thoiwona ara ohoruthak h’ohobye lonya isarahini arakang d’ohothing hamuno inyong? ⁶ Ti, kabong ithai ithalongojyo othaja h’ohoicanak? Aangara ohobarak horeyo ithai ahosi hulya? Ikara isong hoififihoitho ithai di lokiko hulya? ⁷ Aang isong hulo omoryo ofure Loyyu lathuhorik ithai elongotik ⁸ Ara ti, egotterek ithai oyalu l’ohobye, iring nawonderek inyong ditha h’Amanini Nadwa, “Omunoi othulo loindek dohoi, iring nemunorik iye ahwan nahoi,” ehandyo iye ara nayyu. ⁹ Ti, ara iyyu ihai d’ohthing homok, ara ithai imonyong d’ohothing homok, eyau ithai. Ara oyalu elongo ithai ara ohitharohojak h’oyalu. ¹⁰ Aca, ara ithairyo ithai oyalu bukulung, ara ithai iryafu th’oyihoi Aboithe, iwon ithai ara ohoitharohojak h’oyalu fodok. ¹¹ Aca, othulo lajyo, “Hoiyau h’afure n’othulo lobo.” karik ajyo, “Hoittoho,” Ara aang ithai iyau h’angorwo h’ohothing homok, ahibu ithai ittohoi, iwon ithai ara ohoitharohojak h’oyalu bukulung. ¹² Ocamathik ara ithai ihandyo iring ohothing hofuni ikanyo th’awahan thanasong. ¹³ Aca, oindu akanya kwong amehina n’ohothing hang ithaithak amehina. Otelu amehina akanyo. ¹⁴ Ainyong ayiji erimak, olarok hundang, ara ojyo othulo lobo owon inyong h’eruhon, ti, aang owon hegyemathik? Ocohi d’eruhon dithalwahuna inyong? ¹⁵ Ara ithathalik olai dia ahani eyoyofo, aang anyari n’ofaning. ¹⁶ Ara ojyo lobo thothai dosong, “Ifwatha ditha elik n’ahap, ithanohyethek ahwandel ara ithai ifong.” Ara aang ithai isarak isong asang hawak ahwan, ainyong ayiji ne? ¹⁷ Th’oyihoi Aboithe, eruhon hamaring, kwong egyemathik, aye. ¹⁸ Ocohi do lobo othulo ajaran, “Iwon ithai heruhon karik ithai iwon hegyemathik,” Ithaithahina nang eruhon kwong egyemathik, nang de ethaithak ithai eruhon hindang thegyemathik thohundang. ¹⁹ Iruk ithai hijan owon Ojok Aboithe; Ethenu ithai. Ti, juk ohoilehio omonyorok, iruhi ahani ahibi isong ihihira. ²⁰ Iwak iye atehan, othulo lonanga, hijan eruhon kwong egyemathik aang ohwadu aning naboling? ²¹ Aang Abraham owon ara omonye lohothai th’adohohina thananyong olonyi Isako dimunu dihumarik? ²² Engengelu ithai, egyema eruhon th’egyemathik thahanyong. Karik th’egyemathik thahanyong athuba eruhon nanyong. ²³ Athenunu asuduhe n’amaninihio hadwa najyo, “Eruhu Abraham Ojok, eherahini donyong ara abisan.”karik elongoi inyong omotte l’Ojok. ²⁴ Itek ithai hijan ojyori othulo othulo thegyemathik, ikara theruhon ti. ²⁵ Th’oyihoi tholya Aboithe dang, otehi nya Rahab ara amwak thegyemathik thahefothunerek inyong ohoifahak, aconyok isong adi ht’oyihoi tholobo? ²⁶ Aca, iring ahwan ara napeharu th’ohoile aye, inyong dang nara eruhon ara napeharu th’egyemathik, aye.