¹ Olarok, ahanerok, eyeyena ithai thohoi angai kodien isuka ithai d’ithamunoyerek Ojok, aca, ahani ne kodien ira ithai imanya. Iring na imojo ohoi, ara ohoi imimingak ithai, ehandio nayyu nathai thoboloro. ² Aca, itek ithai osaritha honya inyahi ohoi dothai hulo th’akolon thon’Ohobu Yesu. ³ owak Ojok hijan idwa ithai, ara ithai ilama bebe th’eleru. ⁴ Obusuha fodok thoteha tuhudik anagai isuka isong h’angorwo hasong ara nayyu. ⁵ ikara th’ayulon iring ohothing haang otek Ojok. ⁶ Th’arami thohune, aang othulo lobo ihandyo ara namonyo d’olai lonyong Okristiani dia ethatumyo inyong. Enyahi ohoi ithai nyana arami hune, ohoi ikokolok ithai hijan oindu de Ohobu ibahyo isong hoihandyo ahani hulya. ⁷ Aang Ojok ilongu ohoi di manya mak, ti, didwaran karik di libori. ⁸ Iring ahana ne, othulo leda etyenio ne, aang hoida othulo, ida Ojok lesarakk ithai Ohoile lonyong Lodwa. ⁹ Inyong naang ayiji d’igerohina dothai arami hamuno n’olarok heruk hulya, aca, athuk Ojok etyenio ithai amuno ahwandek ¹⁰ ara ithai diri imuno olarok h’ahanerok fodok hawoni di Macedonia. Inyong na, imojo ohoi ithai, olarok karik ahanerok hahoi, ehandio nathai nayyu toboloro. ¹¹ Owonatha ara ohothing howak esuka nayyu: amijo tuhudik d’egyema nathai, karik amijo dindafaitho ahwandek hathai, iring nadwo ethuk ohoi ithai anyahinerek dwona. ¹² Ahani ne, obangi karik amunoi ithai de ohothing haang hoiruk. karik aang ithai de iyangarik eririyo alwaha th’othulo loboling. ¹³ Olarok karik ahanerok hahoi, iwak ohoi atehan tuhudik arami hadiri h’ohoyak, tek ithai othaja adihari, iring h’ohothing haang eyihina. ¹⁴ Iruk ohoi hijan aye Yesu, ebuhu ikoti. Ohoi ikoti iruk hijan inyaharu de Ojok Yesu h’ohothing haye ahibu isong iruk donyong. ¹⁵ Arami hetyenio ohoi ithai hune, etyenio n’Ohobu ne: ohothai hohomijo hulya, ofaning loindunerek Ohobu, aang de efwo ahithemi n’ohothing hathuk aye. ¹⁶ Owon de orii l’acama th’akolon – omurut l’Arkanjelo, amoo n’Ojok karik Ohobu thahwan, ofuni de dihap thohide. Ohothing hoye ahibu isong iruk do Kristo de icak ebuhuna, ¹⁷ ara ohothai hoimijo th’orii le asuduha amaji aboithe hosong didikolo dirwanga h’Ohobu. Th’omiru hule, efwo ohothai isuka amaji aboithe h’Ohobu ara amanya mak. ¹⁸ Ahana ne, imamajyethek, ara ithai ithakolyo ahwandek th’arami thohune.