¹ Awangi arami hakko hegerorik nang dothai, olarok, ahanerok, omiru karik asang hehandye hawon, ara asang hune hafuni ifuhon. ² Anyo, itek ithai thahwandek thahathai tuhudik hijan ofaning l’Ohobu de loindu iring ohoholani th’aharie. ³ Ara ohothing hajo, “Oyiji asang fodok, aang amonyori,” thiya kwak ahani etharohoja namonyong fodok eriafu isong! Oindu de ofaning le induna kwak iring adihari n’othomone, karik aangi de ohothing hofuni iburaru. ⁴ Ti, ithai, olarok, ahanerok, aang ithai th’omudwe karik aang ithai ofaning le oindu itumuna iring ohoholani. ⁵ Ithai fodok ohothing h’afangan. Ikara ohothai h’aharie, dia ewon ara h’omudwe ⁶ Inyong na, ohothai thaang hojothoro iring ohothing homok; ohothai thomijye, aang ebotho. ⁷ Th’aharie ira ohothing iferi; th’aharie ibothoi. ⁸ Ti, ewon ara h’ofaning; aang era ibotho. Ohothai thoiyofoi eruhon karik amuno iring anyahwo hothomurut karik iring eyihina n’ethalwahuna, iring alohuluk. ⁹ Kabong nya Ojok onyimu ohothai dithathacanarik engere nayong, ti, diwonan h’ethalwahuna tholo Ohobu Lohothai Yesu Kristo, ¹⁰ loye thohothai demanyarik honyong ara aboithe dia ara ohoiswok dia ara ohoyak ara inyong laindu. ¹¹ Inyong na, ithakolyethek ara ithai ilwaha ahwandek, iring nehandyerek ithai ne. ¹² Imojo ohoi ithai, olarok karik ahanerok, obangatha tuhudik ohothing hoigyema hothai, ohothing hoithaithak, anyahini ithai amanya n’Elakristiani. ¹³ Isukathik hosong th’abangi karik th’amuno thanabolo th’egyema than’ehandyo isong. Isukathik th’elik thon’othaja. ¹⁴ Ikokolok ohoi dothai, olarok karik ahanerok hahoi, thoimimingye ofathak, thoithakolye obangak, tholwahye ohorathak, thongongok ethathacana n’elathulo. ¹⁵ Omijethek tuhudik, omonyong arofuna, ti ehandyo nayyu dihwandek hothai karik d’ohothing fodok thoiwona ara ohosulak lothai. ¹⁶ Isukathik juui ara homuno. ¹⁷ Omojothik d’oriihio fodok, ¹⁸ ijaratha d’omiru fodok humo, ihum. Arami hune hawak Ojok thothai dimanya hothai dith’asuduhe ho Kristo Yesu. ¹⁹ Hoikohyethek Ohoile Lodwa, ²⁰ hoilauna ocamitha honyahi inyong dothai. ²¹ othemyethek asang fodok athemyo: indefatha asang hayyu ²² idehina hamonyong ²³ Ojok lesarak ohothai elik n’ahwandek, thoisarak ithai adwaran thoyihothik fodok, endafaitho esuka nathai – ohoile, othaji h’ahwan – tholamarai th’epal fodok, ²⁴ inyong lelongo ithai lya, ihandyo de, aca owon h’eladiri. ²⁵ Omojothik dang thohoi, olarok, ahanerok. ²⁶ Ithamandahina ohoiruhok th’emanda thanalibo, thanadwa. ²⁷ Emimingak nang ithai, th’akolon thon’Ohobu, thoihenie amanini na d’ohoiruhok bukulung. ²⁸ Ayiji karik alibori n’Ohobu lohothai Yesu Kristo thoiwona hothai.