¹ Di cuhit, aang ohoi ingongu. Eboco ohoi anyimuna esuka hamaring di Athens. ² Ara ohoi ifahak Timoteo, olai lohothai legyema hohothai d’Ojok di tyenio Arami Angejuho ho Kristo. Isulak ohoi inyong d’ithakolyo ithai karik d’ilwahyo eruhon nathai, tek lobo thothai anyaha adi holu th’arami thah’ethathacana ne. ³ Itek ithai tuhudik th’ahwandek thahathai ijaran ethathacanitha hune owoni ara awahan n’Ojok dohothai. ⁴ Nanya hoisukarik ohoi hothai na, enyahi ohoi ithai berien hijan ofuni de ohothai ithathacanio, karik iring itek ithai, arami hua gwo hawoni hune. ⁵ Arami hune isarak nang asulahina Timoteo dothai, anyo, aang nang angongu eririyo. Efahak nang Timoteo ditihyo angai oyaa eruhon nathai. Diri, ikara hijan athuk ithai Sitan athemyo dia athuk esarahina aning nabo thaanga th’egyemathik hahothai. ⁶ Iring ahana ne, anyahu Timoteo thothai thiya, dohoi dini, iyanu inyong lo asayo hayyu h’eruhon karik amuno nathai. Onyahi ohoi hijan igigilo ithai thohoi thanayyu karik iwak ithai atihyo ohoi iring newaharik ohoi ithai atihyo. ⁷ Ahana ne, olarok, ahanerok athuk eruhon nathai ethamunoyo ohoi dihide h’ethathacana karik angongio nahoi. Aca eruhon nathai nyana ithakolyo ohoi. ⁸ anyo isuka ohoi diri ne, ara ohoi iwetha ara hoko disuka hohoi disuduhe h’Ohobu. ⁹ ahani ne, ocohi d’ohoi difurahina Ojok ahinywarang thothai. Ifurak ohoi inyong ahinywarang th’amuno thana iwon ohoi honyong dihithemi honyong thoithai. ¹⁰ Th’afaning karik th’aharie ifiyo ohoi inyong, th’othaja thohohoi bukulung d’itehu ohoi ithai th’ahwandek karik disarahina aning nawahi d’eruhon nathai. ¹¹ Ojok karik Omonye lohothai thahwan karik Ohobu l’ohothai Yesu, thoihuhumye oyihoi difunerek ohoi dothai. ¹² Ohobu thesarak amuno nathai ahwandek karik d’ohothing thoboloro karik abolo ikoti iring nabolororik amuno nahoi dothai. ¹³ Th’oyihoi tholya ithakolyo de inyong ithai karik ara ithai de ibis karik idwa dihithemi h’Ojok karik Omonye lohothai ara Ohobu lohothai Yesu laindu h’ohothing fodok howoni ara honyong.