¹ Olarok, ahanerok hahoi, ithai th’ahwandek thahathai, itek ithai hijan aang afwan nahoi ditihyo ithai okar. ² Itek ithai hijan nyana ehandye ohoi ara namonyong di Filippi. Amorye ohoi kabong ohoi idwong ditha ho Tessalonika. Karik juk nya obolo edara efothuna ohoi, esarak ohoi Ojok lohoi akolon dinyahina ithai Arami Angejuho Hayyu hafuni thonyong; ³ oililyet lohoi dothai ikara l’amonyori dia lehongorik ohoi ithai. ⁴ Kombwo, icamaitho ohoi juui iring nawaharik ohoi Ojok thocamai. Aca, inyong okanyo hijan isiru ohoi dindafaitho Arami Angejuho Hayyu. Aang ohoi iwak ethamunoyo n’ohothing; iwak ohoi ethamunoyo Ojok, lothemyo, atek ainyong iwak ohoi. ⁵ itek ithai tuhudik hijan aang ohoi ifunu dothai dilulubutha dia dicama ocamitha hoimuhok engaru – Ojok inyong ohotihani lohoi! ⁶ Kabong ohoi ithemyo awahan arimahina efufura thothai dia th’ohothing homok, ⁷ Juk dwo ira ohoi, iring ohoifahak ho Kristo, iwahan efiyo thothai. Ti, oyyu nya esuka nahoi hothai, iring nendafaitherek ahathingi akalifinok hanyong. ⁸ Aca, thamuno thanahoi ithai, engara ohothai ikara ti Arami Angejuho Hayyu h’Ojok hama, karik dang omanyitha karik oisukaitha hohoi hoyyu. ⁹ Itek ithai tuhudik, olarol, ahanerok hahoi, angai igyema ohoi ara ohoi imorwa! Igyema ohoi ohariee karik ofaniing, daang ohoi ithathacanio ithai ara ohoi hetyenio ithai Arama Angejuho Hayyu hafuni th’Ojok. ¹⁰ Ithai ara ohotihak karik dang Ojok atehu hijan omanyit lohoi lonya ihandak ohoi ithai oheruhok lo, oyyu, obis, aang amonyori thiya. ¹¹ Itek ithai hijan ehandyo ohoi dothai abok abok iring nehandyerek omonye d’oduring honyong. ¹² Ethakolok ohoi ithai, ethamunoyo ohoi ithai, karik ohoi ithai imimingak thoisukai esuka nethamunoyo Ojok loilongo ithai di ngara ohobye karik ahujon nanyong. ¹³ Owon dang ahu nabo nesarak ohoi afurahina Ojok ahinwarang juui. Ara ohoi heyahak ithai ocame l’Ojok, iyahak ohoi ithai ikara iring ocame th’ohothing ti, iyahak ohoi ithai ara ocame l’Ojok, lowon diri ara l’Ojok. Aca Ojok legyema dith’ohothing hoiruk lya. ¹⁴ Olarok, ahanerok hahoi, asang hafuk dothat, isong hafuk d’ekklesiahio h’Ojok di Judea, d’ohothing hothiya howon ara ho Kristo Yesu. Ithathacana ithai ethathacana naindu th’ohothing hothai hoithathacanio Ojudei ¹⁵ hotoho Ohobu Yesu Kristo, ohocorok karik ethathacanie ohoi. Angai ithalongojo isong Ojok! Angai ilamerok isong d’ohothing fodok! ¹⁶ Athemye dang ethawejo ohoi etyenio ahothing haang owoni ara Ojudei arami hara iyahahina isong eyahahina. Th’oyihoi tholya, ethathubahini eyatha hathuk isong eyauna. Ahani ne, athuk engere n’Ojok ainduna di hap dihide hosong. ¹⁷ Iring d’ohoi, olarok, ahanerok, ethuk ohothai apeha thahwandek d’omiru tiibai ija ti, ikara di thaja, alama omiru, iwon ohoi hawahan ditehuna ithai ikoti ¹⁸ aca iwak ohoi anyahara dothai diya. Nang th’ahwan, athemyo nang operok olwarai, aang Sitan idehi ohoi. ¹⁹ Aca, diri ithai – ithai ikalak homok – howon ara eyihina nahoi, amuno nahoi karik ainyong isarak ohoi ethadara ara ohoi iwon ara oingerejak dihithemi h’Ohobu Yesu ara laindu. ²⁰ Diri ithai ethadara karik amuno nahoi.