¹ Kɨ́ ila seejɨ̌a̱–lé ka̱kkɨ́re kaaŋ in loŋ áláŋ ila kwa–sí ála seejɨ̌a̱–lé nyóŋke gé áláŋ sí kányíŋti ná kɨ́eŋ nyʉ́kɨ́ŋá–sí kɨrrmel ná áláŋ dellíŋ áiiba áláŋ káíŋ kilmaŋa–sí áiiba. ² Namaŋ ǎ̱w ná kwa nyét káíŋ ámpára seejɨ̌a̱kwa–sí kilmaŋa sɨmmó káa ná dɨ́e–lé tullé–ii áláŋ yeeŋ–sí seejɨ̌a̱–lé ka̱kkɨ́re piá ³ Ɨdɨ̂ɨŋ ná Jáásodʉŋo dog dééŋ suur–sí kilma sɨmmó á piába, Namaŋ innálŋ Domoboreŋa toya–lé in rimmeŋ ɨŋɨ, ŋanyíŋa ai lá jɨɨ ká̱nyɨ́ŋol bá dúíŋ irí poya. ⁴ Ɨdɨ̂ɨŋ ná a̱rɨ bi a̱rɨ alá Wʉ́oꞌŋ Toya–lé rimmeŋ bá in rimmeŋ ássíŋ yeeŋ gʉʉd pááli ná jɨrrmoŋ dorá ná kí kuro'ŋ janyíŋi ilâiŋ dorá Wʉ́oꞌŋ domoboreŋa toyya iní ai lá ja̱ɨgo iní. ⁵ Kaí aláŋ Wʉ́o in jɨrrmo ná kuroꞌŋ janyi áláŋ suur asi tôg baiŋ in dalá ála Jáásodʉŋoꞌŋ mitili–sí ka̱rɨ́ bʉlʉ́ . ⁶ Ná ásáŋ Bɨ́ kí kilma ná ʉto tog dáíŋ Loŋpii Jáásodʉŋoꞌŋ Wʉ́o–sí muje baa . ⁷ Jáásodʉŋo Yahʉ́da ná Járaꞌŋ ja̱ɨgo, Ná na sǔrŋas bɨtɨrɨŋtɨ niná aisába Bɨŋa–sí Jáásodʉŋo dɨre ásáŋ Wʉ́o–sí galaŋa béla . ⁸ Ɨdɨ̂ɨŋ nás ká Bɨŋa–sí in kámiŋ Jáásodʉŋo kwaŋ táárí dʉŋo ǎl kande ásáŋ in pááli Wʉ́o ǎl seejɨ̌a̱–ii ásáŋ bá in jabɨ jasíŋa ǎl alá kɨ́eŋ Wʉoŋa–sí kanniyeǎl seeŋa ge . ⁹ Na ásáŋ mat Jara Wʉ́o–si dééŋ urmaŋ ʉʉꞌŋ mujé káwe, Niná alá Wʉoꞌŋ toyya–lé rimmeŋ eŋa ká aisíŋ muje kaa jaraꞌŋ dɨó ká aisíŋ la̱lɨlaŋa nás kɨ́ɨ́ŋkona–sí mujé áa . ¹⁰ Na dog in beléŋ Bɨ́ jara kí Wʉ́oꞌŋ kwaŋ kilmaŋa gí arra sɨmmó ɨŋɨ. ¹¹ Ná dog in beléŋ bɨ́ jara nyét Loŋpii–sís mujé báa ná lɨlaŋa gîs báa áilaŋ kilmaŋa arra sɨmmó ɨŋɨ. ¹² Ná dog Izaiya in beléŋ Jesaꞌŋ atine áláŋ loŋóla ná Yé áláŋ ná jaraꞌŋ Kuri eeŋ, ná Jara áláŋ dɨ́eŋ ja̱gó dééŋ írí aye. ¹³ Aii síŋ Wʉ́o asá ja̱gó dee–lé tǎ̱yal bɨŋa–sí kí kilmaꞌŋ sɨmmɨŋ suŋŋá ná áápeŋ piis piá dɨ́eŋ seejǎ̱ɨ ʉʉꞌŋ asá dee–lé baiŋ ná ásáŋ kí kʉo Teyyáŋa kuro Ja̱go síríjiŋ beeŋ ¹⁴ Kúíŋ bǎrŋa! "Ká kí dúíŋ dorol suur–sis dɨeŋ ere in ɨ̂ge Kɨ́eŋ korola asá kí tulléŋa piis beŋa kɨ́wɨ́–sí nyét báiŋ Bɨ́ kuro ɨt sí baiŋ ásáŋ sǔrŋa–sí gʉʉd bawlí. ¹⁵ Maraŋ Ká in domoŋ–lé ila a̱rɨꞌŋ ʉʉŋ suŋŋá wa̱rɨ̂g eŋa ai álaŋ bɨ́ŋa ʉ́gó,Ká ila tʉllɨ́ŋ ʉʉꞌŋ eŋa ná wa̱rɨ̂g tereb eŋa ila ká Wʉ́o íní . ¹⁶ Alá Jáásodʉŋo táárídʉŋo jawe áláŋ Jara dʉŋo táárí aa Ká táárí in kaw in pǎ̱gɨ asá kwa–sí belé tullé risiŋ ila alá Wʉ́o–lé áláŋ mat Jara ila gobbo asá Wʉ́o tɨnel ila asá kʉo Teyyá ɨrel. ¹⁷ Naná Jáásodʉŋo–lé síbbe aiŋi ásáŋ dúíŋ Wʉ́oꞌŋ táárí–lé doŋgóré ɨndélíŋ. ¹⁸ Ká á níba áláŋ a̱rɨ tog dog irsiŋo iláiŋ paál ǎl dúíŋ Jáásodʉŋo kí dúíŋ dorá piá ila alá jundí áláŋ Jara ná Wʉ́o–sí ba̱gɨ káwe. ¹⁹ Jáásodʉŋo in ʉʉ kí beléŋa ná tááríŋa ná kí ósoma kuroꞌŋ ná ʉ́tóŋa pirjeŋa ná Wʉ́oꞌŋ kʉoꞌŋ dorá piá. Main Jʉrʉsalm namaŋ in joo ná ila ruôŋ jaago Ká Jáásodʉŋoꞌŋ belé tullé–lé tawar tárásíŋ–sí aa ²⁰ Namá yé–ii ná ká dúíŋ ǎréle in áa ásáŋ kwa–sí belé tullé kawli lóó ɨt asá kwa Jáásodʉŋo ás ka̱lɨŋba áláŋ dʉó keerꞌ íŋ ebédeꞌŋ írí á kʉtʉ́móba. ²¹ Maraŋ niná ǎl Wʉ́oꞌŋ domoboreŋa toya–lé rimmeŋ eŋa kwa ása dééŋꞌ íŋ á aaŋeba áláŋ ka̱gɨ́la na kwa alá kelámmíeba áláŋ dééŋ arra kʉrʉl. ²² Namá iníŋi ná asíŋa suŋŋá otóyŋo áláŋ dɨ́e–lé êl. ²³ Maraŋ naa asá Ká in Á̱kʉroŋa kúíŋ tááríŋa ila nyéttiŋ ágé ná main kí Ayéŋa suŋŋá wóeli áláŋ dɨ́e–lé oo. ²⁴ Ká in sí áríti áláŋ innaŋ asá kí dɨ́eŋ A̱kʉroꞌŋ dɨó andel áláŋ Sipanía oo Ká in si a̱ɨgel áláŋ gí bɨŋa a̱gɨl ná aisíŋ Bɨ́ bányíŋi ná kila oo iláiŋ aisíŋ dɨ́eŋ rápɨŋɨ kí tin ittírig kilma sɨmmó piá. ²⁵ Maraŋ ká ná Jʉrʉsalm aní ásáŋ Wʉ́oꞌŋ kwa alá hila ka̱ɨŋ janyíŋi él. ²⁶ Ɨdɨ̂ɨŋ ná Ma̱sɨg kwa alá Masadónia ná Akáya ka̱ɨŋ bat–sí surrmá–ii áláŋ kwa pugurana Wʉ́oꞌŋ kwaŋ dɨó–sí kányíŋa ǎl Jʉrʉsalm ka̱ɨŋ Yeeŋ–sí kilma sɨmmó kéŋá áláŋ ila ʉʉ–sí káwe . ²⁷ Ná kí see'ŋ see ila dɨ́eŋ táala á ásáŋ kwa–sí kányíŋial, iláiŋ abá Jara kéle kíeŋ Wʉ́oꞌŋ kʉoꞌŋ bora patta–sí arra sarɨga ge, Ná bá in loŋ dog ásáŋ Wʉ́oꞌŋ kwa–sí kí lótá kányíŋíal ²⁸ Abás in táárí–sí áge ná kwa–sí in suŋgóŋa nyét dóŋa aá ila asá yeeŋ–sí ka̱rʉl, alá dorá ná Sipániya ánní áláŋ dɨ́e–lé ányó nái ka̱gɨl . ²⁹ Ná abá dɨ́e–lé yɨyo baŋ Jáásodʉŋoꞌŋ bora patta komolmol kʉ̂mbo . ³⁰ Bârŋa ká ɨgɨ́tɨ́ŋɨ kí dáíŋ Loŋpii Jáásodʉŋoꞌŋ dorá ná joniŋi dorá iláiŋ ai lá kʉo Teyyaŋa innía ásáŋ dui–lé ba̱nyɨŋɨ dáíŋ Loŋpii–sí kʉ̌ʉm ná Ká–si gîs bʉ̌ʉm . ³¹ Bʉ̌ʉm gís áláŋ gí Jʉdɨyaꞌŋ seejɨ̌a̱ wa̱rɨ̂g kwa–lé eréŋa á bʉ́lalba ásáŋ Wʉ́oꞌŋ kwa ila alá Jʉrʉsalm ka̱ɨŋ dúíŋ Wʉ́oꞌŋ táárí–si kɨ́nal . ³² Ná áláŋ Ká mat kí Wʉ́oꞌŋ áre dɨ́e–lé kí kilmaꞌŋ sɨmmɨ̂ŋ oo nái kí Bɨŋa á̱á̱pɨŋ kuro arra ereŋol. ³³ Aláŋ á̱á̱pɨŋɨ Wʉ́o kíe kwa nyét baŋ. Eeyá