¹ Ká, bɨŋa dáíŋ Nɨw pobeꞌŋ alá Kansʉrɨya Ma̱sɨg–lé Sanʉnduri. ² Ká ɨlégí áláŋ sí Loŋpii bɨtɨ́ré niná ǎl ba̱gɨŋ Wʉ́oꞌŋ kwa–lé ná banyí gís janyi ɨt ǎl yé dee–lé koiŋi, ɨdɨ̂ɨŋ ná Yé kwa suŋŋá–lé janyíŋi namaŋ dúi–lé . ³ Peresel–sí na Awela–sis doŋá baní kúíŋ âmpara táárikwa asá Jáásodʉŋo–sí táárí káwe. ⁴ Yeeŋ kɨ́eŋ kuíŋa waí–les kásáreŋés dúíŋ ʉʉꞌŋ Ká aŋ nás yeeŋ–sí assó assó kámiŋ, maraŋ Jaraꞌŋ Ma̱sɨg nyéttiŋ yeeŋ–sís assó assó kámiŋa . ⁵ Peresla ná Akoloꞌŋ tóŋ gîs kila Ma̱sɨ̂gꞌ íŋ kwa–sís doŋá baní ná dúíŋ kondo Epántós–sís dóŋa baní ǎl Asíyaꞌŋ kwaŋ dɨó nyét Jáásodʉŋo wara seetɨ̌o. ⁶ Moo–sí gîs doŋá baní aisá Bɨŋa–sí táárí tokké la piá. ⁷ Kúíŋ alá Andoroníkás ná Jʉníyas–sí gîs doŋá baní alá kíe arra Tumná káŋa. Ná kʉréemaŋaꞌŋ tasa–lé kwa nyét –sí kalŋa, Ná yeeŋ Jáásodʉŋoꞌŋ ka̱rɨjʉlokwǎ dúíŋ waar a̱ɨŋ. ⁸ Âmpiliyat–sís doŋá baní Dʉó ǎl ye–sí Loŋpii–lé wóel. ⁹ Urbana–sí doŋá dáíŋ âmpara táárídʉŋo Jáásodʉŋo–é, ná dog Sɨtakos–sís doŋá baní. ¹⁰ Appílos–sís doŋá baní Dʉó ǎl dééŋ jonŋi dééŋ arra kuro Jáásodʉŋo–lé. Kila kwa–sí gîs doŋá baní alá Irsobulusꞌíŋ toŋ ka̱ɨŋ. ¹¹ Dúíŋ aála Hɨradus–sí gîs baní ná Jáásodʉŋoꞌŋ ka̱rɨjʉlokwa–sí ǎl Nirkosꞌíŋ toŋꞌiŋ kwa gé Loŋpii–lé. ¹² Tirpolana ná Tirplas–sí doŋá baní kwa asá Loŋpii–sí táárí tokké káwe ná dog gîs Pirisis kondo–sís doŋá baní Dʉó asá Loŋpii–sí táárí tokké saw piá. ¹³ Robos–sís doŋá baní dʉó ǎl Loŋpii jáŋó áláŋ dellíŋ dééŋi ná dáíŋ Íya–sís doŋá baní, dééŋ Íya ká dog ais in kera niná dúíŋ Íya. ¹⁴ Asínatakas ná Pilegon ná Harminos ná Patarobas ná Hermas doŋá baní ná Jáásodʉŋoꞌŋ ka̱rɨjʉlokwa ǎl kíeŋ ka̱ɨŋ. ¹⁵ Pílólogas ná Julías ná Nirsas ná Dééŋ Nɨw–sís ná Olympas–sís doŋá na baní ná Wʉ́oꞌŋ kwa nyét ǎl kíeŋ arra ka̱ɨŋ. ¹⁶ Sǔrŋa–sí kí kilmaꞌŋ Tʉyyɨꞌŋ doŋá baní Jáásodʉŋoꞌŋ Ma̱sɨ̂g kwa nyét bɨŋa doŋá kanía . ^{17 18} Ká bɨŋa gí ɨgɨ́tɨ kúíŋ bǎrŋan ásáŋ kila kwa–sí nɨŋɨ benel alá kwa–sí ʉndɨ ná kaŋgáríŋa, ná kwa–sí kʉganá seejǎ̱ɨ–lé kúreli námái Bɨŋa–sí kʉndíe nás kila ǎ̱wsa–sí konsa berel ása bɨwɨ. dɨ́e–le ka̱rɨ́ŋa belo. 18 Ɨdɨ̂ɨŋ ná kwa kila tááríŋa kinníŋ káwe dééŋ Loŋpii–sí táárí ás káweba . Maraŋ bá kɨ́eŋ kɨdoŋaꞌŋ oro káwe ná kí jirsiŋo sɨmmó kwa pattaŋa–sí ta̱bʉŋa kámíe. ¹⁹ Dʉó bi dʉó dɨ́eŋ ba̱gɨ́ŋ kelámí ná Ká bat gí dɨ́eŋ írí kilma saa sɨmmô, Maraŋ ká bɨŋa gí wóel áláŋ a̱rɨ tullé ere riya beeŋ ná ɨttɨŋ kʉdɨŋa pattaŋa beeŋ . ²⁰ Ná áápiŋ Wʉ́o baŋkɨ́eŋ dǔu árit appâ koní ná dáíŋ Loŋpii Jáásodʉŋoꞌŋ tʉllɨ́ŋ ná kíeŋ báŋi ²¹ Ná Timos dúíŋ ǎmpara dog gí bɨŋa doŋá inní , Kúíŋ ála Josos ná Lokás ná Sosopara dog gí Bɨŋa doŋá kannía. ²² Ká Tertos asá Pául–sí domoŋ rim–lé káw riti Loŋpii–lé gí doŋá kanní . ²³ Dúíŋ jɨtɨredʉŋo Gayas dʉó alá Ma̱sɨ̂g kwa nyét dééŋ toŋ kɨ́sɨŋa dog gí doŋá íní. ²⁴ Ná Erestas dʉó deemꞌ íŋ gʉbʉl tɨ̌a̱yel ná Jartas dog gí doŋá kaniya. ²⁵ Yé taga gí jundí ná dɨ́eŋ seejɨ̌a̱–lé puttó berel kí kila belé tulléꞌŋ dorá ǎl ká Jáásodʉŋoꞌŋ írsiŋ ná kí tawar jawíŋ dorá asá waar kí ayeŋa suŋŋá jʉlɨŋa . ²⁶ Ná babára nás ila bʉtʉ see kwaŋ–sí tawar káwíye kí domoŋkwaŋ rimmeŋ dorá ná kí Wʉ́o lʉʉtꞌiŋ nurguꞌŋ dorá kundíe ná Ba̱rʉ́ŋa nyét kɨwɨ áláŋ kwa nyét see kiel ná ba̱gɨ káwa. ²⁷ Â̱w ila Wʉ́o dellíŋ ǎl dééŋ díttin riya–ii galaŋa kí Jáásodʉŋoꞌŋ dorá kééŋ gé namaŋ nîŋ kee Eeye