¹ Ila Dʉó–sí bɨtɨ́re ǎl seejɨ̌a̱–lé nyóŋké–ii, Ná kɨ́eŋ beléŋa suur á íríŋíyalba . ² Dʉó díg gíŋ seejɨ̌a̱ jundí na a̱rɨ bi a̱rɨ aam, Maraŋ dʉó keer ǎl dééŋ seejɨ̌a̱ nyóŋke–ii bá dellíŋ daiŋa aam. ³ Dʉó ǎl a̱rɨ bi a̱rɨ amm nʉŋɨ as jábba ná dʉó ǎl a̱rɨ bi a̱rɨ–sí á amba dog nʉŋɨ as jábba. Na dʉó ǎl a̱rɨ bi a̱rɨ–sí aam ila dʉó as betba ǎl a̱rɨ bi a̱rɨ–sí á âmba ɨdɨ̂ɨŋ nás yé–si Wʉ́o dɨna. ⁴ Jɨ́ kii jaŋ namaŋ–sí dʉó keerꞌíŋ tááríŋá dʉoŋ–sí jandel, dééŋ sɨɨtɨ ásáŋ arrí ila táárídʉoŋ a̱rɨ tullé–ii ná pii wala jɨɨtɨ? Ná Loŋpiiꞌŋ táárídʉoŋ bâŋ táárí tullé piá ilâiŋ nás Loŋpii ye–sí nyítti áláŋ táárí tullé piá. ⁵ Dʉó díg sog dig–sí bára–lé suŋŋá tagɨ̂t dɨyal ná Dʉó keer ná sog bi sog arrá dɨyal, Dʉó bi dʉó bá ǎ̱w nás dééŋ ta̱bʉꞌŋ jurú tarasíŋ jɨgé. ⁶ Dʉó ila ǎl soog dig–sí suŋŋá ta̱gɨ̂t dɨyal Jɨ́ bá Loŋpiiꞌŋ dɨyal, Ná ila dʉó ǎl na̱mɨ́e bá dog Loŋpiiꞌŋ ʉʉꞌŋ aam iliâŋ nás yé Wʉ́o–sí assó beléŋ. Ná ila Dʉó ǎl na̱mɨ́eꞌŋ jisira pii bá Loŋpiiꞌŋ ʉʉꞌŋ pii, Ná Yé dog–sí Wʉ́o–sí assó beléŋ. ⁷ Iláŋ ná Dʉó á keba ná dééŋ suurꞌíŋ ʉʉꞌŋ kee wala dʉó ákeba ǎl dééŋ suurꞌ íŋ wa̱itél . ⁸ Abá kaŋi ila bás Loŋpii–sí nás kaŋi ná abá kusa bás Loŋpii–sí nás kusa . ⁹ Namá in loŋ abá sálláŋa wala kusa bás Loŋpiiꞌŋ kaaŋ inní Jáásodʉoŋ naŋ–sí sálla eŋa áláŋ sálláŋa ná waitolaŋ Loŋpii arra. ¹⁰ Naná Jɨ́ ǎl dellíŋ da̱ɨŋa jaam kaaŋi nás dɨ́eŋ bára–sí jandel? ɨdɨ̂ɨŋ kwa nyét Wʉ́oꞌŋ kʉtɨ́ŋ jansá kerel . ¹¹ Ɨdɨ̂ɨŋ ná Wʉ́oꞌŋ in rimmeŋ eŋa , "Loŋpii in beléŋ ká kí seeꞌŋ see inná ǎl ká sallá kaaŋ dʉó bi dʉó bá gísíŋ kí kurŋá ta̱bʉŋ ooŋ ná dʉó bi dʉó bâŋ see tɨ̌ɨ ǎl ká Loŋpii kaaŋ. ¹² Ila dáíŋ dɨó dʉó bi dʉó básáŋ Wʉ́o kilalótáꞌŋ aldí piá ǎl yé dééŋ jaiŋ–lé piá. ¹³ Ná â̱w nás sǔrŋá–sí ás jandelba, Maraŋ bá ǎ̱w ná a̱rɨ tog bir as káríbá áláŋ á undíba ná Jáásodʉoŋiꞌŋ ka̱rɨ́ jʉlódʉoŋ keer–sí á kundíba áláŋ ka̱tɨ́eŋa piá ¹⁴ Ká káloŋ–sí naŋ–si Loŋpii Jáásodʉŋo–lé in ká̱bɨ́tɨ a̱rɨ ála á keba ná kí dééŋ dorol rúbba–ii maraŋ bá dʉó dig a̱rɨ dig–sí in tɨ̌yal ǎl rubba dee–lé bá rubba–ii . ¹⁵ Bá dɨ́eŋ bára–sí ila a̱rɨ ǎl jɨ́ jaam ye–sí kilmá sondorôŋ piá lia ǎl a̱rɨ ǎl jɨ́ jaw joiŋi–lé ála aiiba . ila na̱mɨe ǎl jɨ́ á junbíba áláŋ ila dʉó–sí jɨttɨ piá ǎl Jáásodʉŋo–lé kee. ná Jáásodʉŋo dééŋ ʉʉŋ waí ¹⁶ Á jundíba a̱rɨ alá Jɨ́ dɨ́ɨ́ŋ ta̱bʉꞌŋ jawríti ásáŋ kona jɨttɨŋ kannía. ¹⁷ Ɨdɨ̂ɨŋ ná Wʉ́oꞌŋ kuriŋ jâm ná jabaŋ aiiba, maraŋ ʉ́tóŋa kiláŋ alá ta̱gɨ́ gé niná wa̱rɨ̂g ná áápeŋ ná kilmáꞌŋ sɨmmɨ́ŋ alá kʉo teyyáŋa iníya . ¹⁸ Iliáŋ abás dʉó Jáásodʉŋo kí in dorá táárí pii bá Wʉ́o–sí kilma sɨmmó pii naŋ–sí kwa yé–si kɨ́néli. ¹⁹ Ná â̱w ná kí kuro a̱rɨ ɨt–sí áa aisa Wʉ́o–lé péégel ná kása dáíŋ dɨó dʉó bi dʉó nyittí nás dééŋ seejɨ̌a̱ kakkɨré pii. ²⁰ Na̱mɨeꞌŋ ʉʉŋ Wʉ́oꞌŋ táárí–si jɨttɨ á jaaba.Lótá nyét teyyé gé maraŋ koroŋi áláŋ dɨ́eŋ na̱mɨe ʉʉ'ŋ dʉó–sí jundí ná ka̱tɨeŋa–lé poy. ²¹ A̱rɨ tullé áláŋ jaa bá ila–ii áláŋ Mɨmon ná koróꞌŋ jáam–lé tuga jawŋi, wala a̱rɨꞌŋ keerꞌ íŋ jalé ǎl seejɨ̌a̱ dʉŋo keer–sí jundí áláŋ ka̱tɨ́eŋa–lé poy . ²² Naná puttâ–ii jɨ̌a̱ a̱rɨ bi a̱rɨ ǎl jɨ́ seejel dɨ́ɨ́ŋ tasa kí Wʉ́oꞌŋ. Dʉó asá bora patta káwe dʉó ɨt asá in á tímelba ǎl janɨyáni alá ila ɨrɨ pii alá yé seetɨ̌yal alá see. ²³ Maraŋ ábas dʉó a̱rɨ gíla pii alá yé aam Wʉ́o baŋ yé ja̱nɨ írí jábɨ ila a̱rɨꞌŋ ǎl yé aam ɨdɨ̂ɨŋ ná dééŋ táárí kí seejɨ̌a̱ ás tɨyelba ná a̱rɨ bi a̱rɨ nás kí seejɨ̌a̱ á tɨyélba bá ka̱tɨ́eŋa–lé