¹ Meleg ooskʉŋo namá dééŋ ambayá pʉo, namá úrí a̱gɨla ná jaawíl kéŋá ná sʉʉrʉ'ŋ írí pólólé.Illa úrí–sí namá gonyâyéŋkwě kaníe ásáŋ dʉ́ló sîwꞌíŋ ʉto pa̱a̱lɨ́ asá dʉ́rʉ́m dúi. ² Illa úrí namás illa dʉrʉmꞌíŋ dʉ́ló sîwꞌíŋ ʉto pa̱a̱lɨ́, illa dʉ́ló sîwꞌíŋ ʉto–lé namá sʉ́ʉ́l inná utûŋebede appâ'ŋ sʉ́ʉ́l kuro. Dʉlé na da̱wlo namá kí illa dʉló sîwꞌíŋ ʉto'ŋ sʉ́ʉ́l dɨkkó ɨŋɨ. ³ Lia illa sʉ́ʉ́l–le namá ka̱ʉŋ kurol ná sʉʉrʉ'ŋ írí éle. Kila ka̱ʉŋ–sí namá kʉrro kaníe inná sʉʉrʉ'ŋ nyééŋá'ŋ kʉrro. ⁴ Kila ka̱ʉŋ–sí namás in aáŋé áláŋ sʉʉrʉ'ŋ dǎy wala gal tánaŋa kɨrróŋa wala gal kurúŋá –í jɨttɨ á pɨ̌alba,maraŋ áláŋ bá délliŋ kila kwa–sí áwreŋ pɨ̌al asá Wʉ́o'ŋ ósom a̱rɨ́ŋá–le á pɨ̌alba, maraŋ áláŋ bá délliŋ kila kwa–sí áwreŋ pɨ̌al asá Wʉ́o'ŋ ósom a̱rɨ́ŋá–le á ka̱ɨŋba. ⁵ Yeeŋ–sí ás kɨɨneba áláŋ kwa–sí puye, maraŋ áláŋ kwa–sí kí kôlda oos jággá jaye. Na dɨ́eŋ jagga bá in lóŋá inná nyééŋꞌíŋ jagga iladɨo abá dʉó–sí ʉʉro. ⁶ Kila soga–lé kwa báŋ wǎy–sí kí kʉ́ŋɨ́ kǒeli maraŋ á síŋ kʉ̌mmalba. Yeeŋ–sí bá síŋ ta̱a̱rɨŋɨ áláŋ kúsal, maraŋ wěy báŋ dɨ́e–lé bíí. ⁷ Ka̱ʉŋꞌíŋ jalŋola in lʉ́ŋɨŋɨ inná murtaŋa asá deerꞌíŋ ásíleŋ káwe. Kɨ́eŋ ta̱bʉŋa–lé a̱rɨ díg–si kiŋíe ná in lóŋá inná siirꞌíŋ taaj, na kɨ́eŋ wa̱jɨŋa ná in lʉ́ŋɨŋɨ inná dʉldɨ'ŋ kwě'ŋ wa̱jɨ. ⁸ Na dɨ́eŋ nyɨ́lɨ́w ná in lóŋá inná yáaŋa'ŋ nyɨ́lɨ́w, na kɨ́eŋ kagi ná in lʉ́ŋɨŋɨ inná mʉʉrʉ́'ŋ kagi. ⁹ Namás ógǒŋderega ka̱ɨŋ ná in lʉ́ŋɨŋɨ inná dáwrá'ŋ ógǒŋdereg na kɨ́eŋ pělega'ŋ kola ná in lʉ́ŋɨŋɨ inná murtaŋa suŋŋâ'ŋ kola na kârroŋa asá deerꞌíŋ na dɨó jáwíŋtía. ¹⁰ Namás ka̱wɨ́ntá na berega ka̱ɨ́ŋ ná in lʉ́ŋɨŋɨ inná nyééŋá'ŋ na kɨ́eŋ ka̱wɨ́ntá–le nás krro nii ka̱ɨ́ŋ áláŋ kwa–sí kí kôlda oos jággá jaye. ¹¹ Na yeeŋ ábadon–si gé, na kí Yunáníŋá'ŋ belé Apollon–si gé alá dééŋ arrá Jɨttɨjáadʉŋo–ii. ¹² Ra̱sɨ́e díígkʉŋo ása beto, ra̱sɨ́eŋa a̱w ása ká̱ɨ́ŋá áláŋ élal lia abás kin ʉ́tóŋá bɨtʉl. ¹³ Lia meleg osondíígkʉŋo namá dééŋ ambayá pʉo, namá Wʉ́o'ŋ ta̱bʉ́ŋ illa siirꞌíŋ gôbboŋa'ŋ lóó–le kila kolpa oŋŋal–lé arka kelámi. ¹⁴ Illa arka namás meleg osondíígkʉŋo asá ambayá kéŋá–sí bás in tin na soog na dúal na ayé appâ Iporata–lé rɨ́gɨ́ŋá." ¹⁵ Kila melega oŋŋal–sí bás in tin na soog na dúal na ayé tá̱gꞌíŋ ásíleŋ káwe. Naa yeeŋ–sí namá kʉlʉl áláŋ kʉldɨŋa'ŋ saárá ɨɨsꞌíŋ tog–sí puye. ¹⁶ Na ka̱lda̱ga'ŋ diigiŋ asá murtaŋa ká̱wɨŋɨ míriŋa píriŋa a̱w kéŋá. Na ká dɨ́eŋ diigiŋ–sí kelámi. ¹⁷ Kila murtaŋa na bôrnaŋa ǎl dúíŋ jalŋiŋola–lé a̱gɨla, innâŋ lʉ́ŋɨŋɨ: Kila bôrnaŋa ógǒŋderega kiŋíe ná kɨ́eŋ jaluŋa pukká inná utú na ʉyo na daáru'ŋ jaluŋ ka̱ɨ́ŋ. ¹⁸ Kí kin jʉ́ʉ́rá ɨɨsꞌíŋ dorá,utú na sʉ́ʉ́l na daáru, ǎl kin murtaŋa'ŋ ʉtoŋa–lé kúréliŋi namá kʉldɨŋa sáárá ɨɨsꞌíŋ tog kʉ́sɨŋɨ. ¹⁹ Kila murtaŋa'ŋ kʉrro bá kɨ́eŋ ʉtoŋa na ka̱wɨ́ntá–le ka̱ɨŋ.Kɨ́eŋ ka̱wɨ́ntá bá in lʉ́ŋɨŋɨ inná wágasa. Kila ka̱wɨ́ntá namás ta̱bʉŋa kila ka̱ɨ́ŋ áláŋ kwa–sí taga áwreŋ pɨ̌al. ²⁰ Kʉldɨŋa'ŋ agába, alá kí kin jʉ́ʉ́rá á kʉ́sɨŋɨba, ka̱ɨ́ŋɨŋɨs ná kɨ́eŋ koŋa'ŋ tááríŋá–le tʉ́ʉ́beŋ á kɨŋɨba, walá ányádɨɨŋa'ŋ ba̱gɨjáa walá kʉnʉ́so'ŋ ba̱gɨjáa–lé á kááréba kila alá kí siir na poddo na nihâs na dɨ́tó na kurú kewe. Kin kʉnʉ́so walá taga lóó á la̱weba walá ʉʉ kel á aameba walá á ɨloŋeba. ²¹ Yeeŋ kɨ́eŋ waíŋá na sanyíta na a̱jɨlɨŋ na ka̱mɨŋa–lé tʉ́ʉ́beŋ á kɨŋɨba.