¹ Lia namá meleg ka̱kkɨ́re keer a̱gɨla ná jaawíl bʉʉŋeliŋi, ná kí kútu nɨɨŋo na bɨdɨgɨ̂r dééŋ ta̱bʉ́ŋ, na dééŋ wa̱jɨ ná in líŋá inná dʉlé, na kééŋ tarŋa ná in lʉ́ŋɨŋɨ inná utú'ŋ tobáŋá. ² Na yé dééŋ dóŋas murul ittî kéŋá nás pa̱a̱lɨ́ŋá. Na dééŋ taar súru–sí ná roo'ŋ írí jáá na dééŋ goro–sí ná sʉʉrʉ'ŋ írí jáá, ³ Namá kí ʉrʉ́ ʉrʉ́ sîw taan inná mʉʉrʉ́'ŋ gɨɨr. ǎlbá yé ʉrʉ́ taan, da̱ɨ́lá saabe namá kí kɨ́eŋ kola rɨsɨŋʉl. ⁴ Na ǎlbá da̱ɨ́lá saabe rɨsɨŋʉl, ká namá wǒeliŋi álâŋ rímmeŋ áa, maraŋ namá jaawíl arka kelámi ná beléŋá," Ʉ́tóŋá alá kila da̱ɨ́lá saabe aáŋé–sí ósom–si jaldó, na rímmeŋ a jáaba. ⁵ Na illa melega alá ká a̱gɨla ná roo'ŋ írí na sʉʉrʉ'ŋ írí kɨɨréliŋi namá dééŋ dóŋá súru–sí jaawíl írí já̱gɨ. ⁶ Meleŋ namá kíe álpeŋ piá ǎl namaŋ níŋ kee báŋ kee, dʉó alá jaawíl–si tewa na ótáŋá nyét alá dééŋ dɨó ka̱ɨŋ, na yé namá in kwǎ," Ɨ́de taartʉʉnɨ́ áŋ keba, ⁷ maraŋ kila soga–lé abá meleg saabekʉŋo kóel áláŋ dééŋ ambayǎ–sí tawrá jáwí." ⁸ Lia illa arka alá jaawíl kelámi namáis ka–sí asi keer risiŋo ná in beléŋá,"Joo ná illa murul asá pa̱a̱lɨ́ŋ illa melegꞌíŋ dóŋa jabúŋ alá roo'ŋ írí na sʉʉrʉ'ŋ írí kɨɨrél." ⁹ Naa ká namá meleg–lé ɨ́o namá ɨ́ɨ́ŋó áíláŋ illa murul ittî íní.Námáis in kwǎ,"Jabúŋ ná jâm. Yé dɨ́ɨ́ŋ dɨó báŋ puyyá eeŋ, maraŋ dɨ́ɨ́ŋ ʉ́tó báŋ in líkká eeŋ inná naasu'ŋ da̱y." ¹⁰ Ká namá illa murul ittî–sí melegꞌiŋ dóŋa ába ná ámi. Yé dúíŋ ʉtó namá in líkká eŋa inná naasu'ŋ da̱y, albá ámi, yé dúíŋ dɨó namá puyyá eŋa. ¹¹ Namáis in aáŋé," Jɨ́ bá síŋ asi keer kwa na bá̱rʉ́ŋá na beléŋá na ábakuriŋa suŋŋâꞌíŋ súrreŋ jáa