¹ Kʉ́ŋɨ́kwǎ a̱w Lia namái jarri'ŋ kurú kaníe ná in lóŋá inná ba̱rɨ, namáis in aáŋé,"Wǎ̱rɨg–si jawla ná Wʉ́o'ŋ Toŋteyyâ na gôbboŋa'ŋ lóó jarri na kila kwa ǎl ɨ́de kʉ̌meli–sí jɨɨ́lo. ² Maraŋ Toŋteyyâ'ŋ matarpaalkwaŋ–sí paál –si jándi a jarriba, illâíŋ ná ye–sí kila wʉ́owa̱rɨkwǎ–sí kaníe. Yeeŋ báŋ illa deem teyyâ–sí kí kólda weyyéŋá oŋŋal na a̱w ká̱rmínyol. ³ Na ká áláŋ kúíŋ kʉ́ŋɨ́kwǎ a̱w–sí taála aní, na yeeŋ bá síŋ kí soga líri na píriŋa a̱w na weyyéŋá osondííg(1,260) súrreŋ káwa, namás delêlꞌíŋ jʉrɨŋa kiníe." ⁴ Na kila kʉ́ŋɨ́kwǎ a̱w in kalŋa inná za̱ɨtʉ̂nꞌíŋ kurúŋá a̱w na másárája'ŋ maradába a̱w kila alá sʉʉrʉ'ŋ Loŋpii'ŋ ta̱bʉ́ŋ kééréli. ⁵ Na abá dʉó ʉʉ ɨt pii áláŋ yeeŋa–sí áwreŋ piá, bá utú kɨ́eŋ ʉtoŋa–lé kúrél ná kɨ́eŋ gáarima–sí aam, Na abá dʉó ʉʉ ɨt pii áláŋ yeeŋa–sí áwreŋ piá, báŋ kí in dorá kawe. ⁶ Yeeŋ kʉros kaɨŋ ásáŋ jaawil–sí kʉrrɨ́tɨ́a, áláŋ kuy á riíŋba illa tin–lé asá yeeŋ súrreŋ kawe. Yeeŋ koroŋa'ŋ írís kʉrro ka̱ɨŋ ásáŋ koroŋa–sí kewa ka̱ɨŋeli na áláŋ sʉʉrʉ–sí jʉ́ʉ́r bi jʉ́ʉ́rꞌíŋ órré kaldol,kérrég bi kérrég asá yeeŋa–sí surma–ii. ⁷ Na bás yeeŋa dɨ́eŋ jɨbé kágíe, illa karâb a̱a̱sɨ alá dʉ́rʉ́m kúrél bá síŋ dɨ́eŋ írí deer já̱gɨ námás kʉrróŋ piá ná puu. ⁸ Na kɨ́eŋ kʉʉla báŋ deem appâ'ŋ oró ʉŋɨe kila alá kí jǐim Sodom na Ma̱sɨr ka̱rɨ́a, lóó asá dɨ́eŋ Loŋpii–sí ká̱ldá̱bʉ–lé ka̱ldʉl. ⁹ Na kí soga ɨɨs na soogꞌíŋ sabba kin daaraŋa'ŋ da̱ó dɨ̌i, kwa na órréŋá na beléŋá na bɨ́rʉ́ŋá báŋ kɨ́eŋ kʉʉla–sí ka̱lʉe na bá síŋ kaaríŋía áláŋ túrbá kaye. ¹⁰ Na sʉʉrʉ'ŋ kwa–sí báŋ dɨ́eŋ wǎyꞌíŋ írí kilmaŋa sɨmmó ɨŋɨ, ná sǔbu káwal nás sǔrŋá–sí dola áddeŋ káwal.Ɨdɨ̂ɨ́ŋ ná kin domoŋkwǎ a̱w sʉʉrʉ'ŋ kwa–sís miine suŋŋâ kéle. ¹¹ Maraŋ lia asá soga ɨɨs na soogꞌíŋ sabba bɨtʉl namá jaiŋꞌíŋ kʉo alá Wʉ́o–lé ʉ́ndʉla kila kʉ́ŋɨ́kwǎ a̱wꞌíŋ kʉʉla–lé ká̱rɨ́e, namá kí kɨ́eŋ tarŋa wǎ̱rɨg kááré, kila kwa ǎl yeeŋ–sí ka̱gɨle–sí namá Ka̱lɨ suŋŋâ tɨ̌o. ¹² Yeeŋ namá jaawíl keéŋé, na kɨ́eŋ gáarima ná yeeŋ–sí ka̱lʉeŋi. ¹³ Na ila tin–lé namá sʉʉrʉ́ŋjɨrtɨ́ŋóla ka̱kkɨ́re kéŋá, namá illa deemꞌíŋ sáárá weyye'ŋ tog rúriŋa. Illa sʉʉrʉ́ŋjɨ́rtɨ́ŋóla–lé namá kwa líriŋa saabe(7,000) kʉ́sɨŋɨ. Na kila kwa'ŋ agába–sí namá ka̱lɨ tɨ̌o namás jaawiꞌíŋ Wʉ́o–sí galaŋa káwlíe. ¹⁴ Ra̱sɨ́e a̱wkʉŋo betos, ra̱sɨ́e ɨɨskʉŋo naa dakki ʉ́ndʉl. ¹⁵ Meleg ambayá saabekʉŋo–sí pʉo Lia meleg saabekʉŋo namá dééŋ ambayá pʉo, namá jaawíl ʉrʉ́ŋá sîwŋa ka̱ɨ́ŋ ná in beléŋiŋi," Da̱ldɨŋꞌíŋ kʉrɨŋ dáíŋ Loŋpii na dééŋ jáásodʉŋo'ŋ kʉrɨŋ eŋa, na yé namaŋ níŋ kee báŋ kee ná tɨél." ¹⁶ Na sábáŋáta̱bʉŋakurráŋakwǎ weyyéŋá a̱w na oŋŋal ǎl wʉ́o'ŋ ta̱bʉ́ŋ kɨ́eŋ kʉttɨŋa'ŋ írí kayé namá ka̱pʉŋʉl ná kɨ́eŋ ta̱bʉŋa sʉ́ʉ́ ka̱bɨ́e ná Wʉ́o–sí ba̱gɨ káwe, ¹⁷ ná in ká̱mɨŋɨ," Kɨ́ jɨ–sí gis assó kámiŋ, Wʉ́o Loŋpii Ka̱kkɨ́rekʉŋo. Dʉó alá kee na alá kérrég kéŋá, ilâíŋ nás jɨ́ kɨ́ɨ́ŋ kʉrro suŋŋâ jáwil na juŋas ná jéél. ¹⁸ Bá̱rʉ́ŋá–sí kilmaŋa tokké ɨŋɨ, maraŋ dɨ́ɨ́ŋ kilmá'ŋ tʉkkɨŋ dog–si tána, na tin áláŋ kɨ́ɨ́ŋ tááríkwǎ domoŋkwǎ na ta̱gɨŋa na kila kwa ǎl kɨ́ɨ́ŋ kona ba̱gɨ́ka̱lɨ kawe, míŋ dokkéŋa namaŋ appáŋa–sí dʉléŋá. Na tin áláŋ kila kwa–sí káásol ǎl sʉʉrʉ–sí ká̱á̱sʉl dog–si tána." ¹⁹ Lia Wʉ́o'ŋ Toŋteyyâ jaawíl namás pa̱a̱lɨ́ŋɨ́, namá dééŋ saárta'ŋ sa̱ndʉ̂g dééŋ Toŋteyyâ'ŋ dɨó lóŋála. Ɨ́de namá kuyíŋjúlmólaŋa na wiísꞌíŋ kola rimitîti na da̱ɨ́lꞌíŋ kola rimitîti na sʉʉrʉ́ŋjɨ́ŋóla na urány suŋŋâ ka̱ɨ́ŋ.