Yáa na málál ¹ Namá ósom appâ jaawíl lóŋóla: yáa–sí nás dʉlé kiŋíe na dʉ́al kééŋ tarŋa'ŋ ʉrgʉ́m, na dééŋ ta̱bʉ́ŋ namá úríŋá weyye na a̱wꞌíŋ taaj kéŋá. ² Na yé kóól kéŋá ná kí da̱a̱rɨŋꞌíŋ wa̱y ʉrʉ́ ladda na miine–lé kéŋá áláŋ dééŋ kwě–sí kɨrɨ. ³ Namá ósam keer jaawíl lóŋóla: málál pukkâ appâ, ta̱bʉŋ saabe na kolpa weyye, na kééŋ ta̱bʉŋa–lé ná taaja ka̱ɨ́ŋ. ⁴ Málálꞌíŋ da̱wɨ namá úríŋá'ŋ sáárá ɨɨꞌíŋ tog–sí kʉ́ʉ́ŋo ná jaawíl rááŋa ná kíeŋa sʉʉrʉ–sí tewa. málál namá illa yáa'ŋ ta̱bʉ́ŋ keera asá dakki piá áláŋ dééŋ kwě kɨrɨ, ásáŋ dééŋ kwě amí iladɨo abás ka̱a̱rɨŋɨ. ⁵ Namá kwědee kɨrɨ, dʉó alá dúi áláŋ bá̱rʉ́ŋá nyét–sí kí dáwrá'ŋ táatá̱sʉ tǐɨ, maraŋ dééŋ kwědee–sí namás kábé nás Wʉ́o na dééŋ kʉttɨ–lé keéŋé. ⁶ Yáa namá bíí ná jutá nyǎŋa, híllâ asá Wʉ́o yee lóó ásileŋ piá, illa lóó–le áláŋ kí soga líri na píriŋa a̱w na weyyéŋá osondííg(1,260) dééŋ oro káwal. ⁷ Jaawíl–si deer jáwla Naa namás jaawíl deer jáwla. Makial na dééŋ melega namá illa málál–sí kɨ́ɨ́rʉl. Illa málál na kééŋ melega namá yeeŋ–sí ɨ́ɨ́rʉl. ⁸ Maraŋ málál–sí namá ka̱lɨ kaníe, naa ɨ́de jaawíl walá lóó á kéŋába áláŋ déé–le ool. ⁹ Illa málál appâ–sí, illa namá tóórígꞌíŋ nʉ́ʉ́m–ii ǎl Ányádɨɨŋáŋta̱bʉ wala gal Sitan ka̱rɨa, da̱ldɨŋ nyétꞌíŋ júúleŋjáadʉŋo, namá kí kééŋ melegaŋ sʉʉrʉ́ kamíŋíe. ¹⁰ Namá jaawíl ʉrʉ́ sîw kelámi ná in beláŋá," Naa jopóŋó na kʉrro na dáíŋ Wʉ́o'ŋ kʉrɨŋ na dééŋ Jáásodʉŋo'ŋ taála éle. Ilâíŋ ná káíŋ bârŋa'ŋ Da̱lɨ́medʉŋo–sí dǔu kamíŋíe, ǎl kí luul na tóó dáíŋ Wʉ́o'ŋ ta̱bʉ́ŋ káíŋ bârŋa'ŋ írí da̱lɨ́me pii. ¹¹ Na kí dolêŋkwě'ŋ kewa na kí dɨ́eŋ jɨbé'ŋ ʉʉ, káíŋ bârŋa namás málálꞌíŋ írí kóos kéle. Ilâíŋ ná yeeŋ kɨ́eŋ kuíŋá–sí saa suŋá á kǒeliŋiba annaŋ dog in líŋá ása wǎy–le keerítíeŋi. ¹² Na naa, jaawila na bɨ́ ǎl dɨ́eŋ dɨó baiŋ kilmaŋa gî sɨmmó ɨŋɨ! Maraŋ ra̱sɨ́e kaísâŋ bɨŋa poí, sʉʉrʉ na roo, ilâíŋ ná Ányádɨɨŋáta̱bʉ dɨ́e–lé bʉʉŋo! Ye–sí kí kilmá'ŋ tʉkkɨŋ suŋŋâs pis káwe, ɨdɨ̂ɨ́ŋ nás yé loŋ ye–sí ása tin ittî saí!" ¹³ Ǎlbás málál ɨwo ǎl sʉʉrʉ́ kamíŋíe, namá illa yáa ǎl kwědee kɨrɨ–sí táltíleŋ piá. ¹⁴ Maraŋ yáa–sí namá dʉʉl appâ'ŋ pělega a̱w kaníe áláŋ kíeŋ arda piá ná nʉ́ʉ́m–sí jaal ná jutá jee, illa lóó–le áláŋ kí ayé na ayéŋá a̱w na ayé'ŋ sabba dééŋ oro káwal. ¹⁵ Nʉ́ʉ́m namá yáa'ŋ ka̱rɨ́ŋ kí ʉto koro in ímíŋi inná roo, áláŋ yee kí kʉtʉrgʉ́ bǎw. ¹⁶ Maraŋ sʉʉrʉ namás yáa–sí nyiíŋi. Sʉʉrʉ namá dééŋ ʉto pa̱a̱lɨ́ namá kila koro–sí báa alá málál kí ʉto ímíŋi. ¹⁷ Lia málál–sí namá illa yáa'ŋ írí kilmá tokké eŋa, namá nyaŋá ásáŋ kééŋ dogólá'ŋ agába'ŋ írí deer já̱gɨ, kila kwa ǎl Wʉ́o'ŋ káálíntá–sí ba̱gɨ káwe na ǎl dɨ́eŋ jɨbé Ísa'ŋꞌíŋ–si pʉttó kéyé. ¹⁸ Málál namá roóŋsalga–lé ŋáányꞌíŋ írí keera.