Karâb a̱a̱sɨ díígkʉŋo ¹ Namá karâb a̱a̱sɨ a̱gɨla ná roó kúréliŋi, kí kolpa weyye na ta̱bʉŋa saabe, na taaja wyye kééŋ kolpa'ŋ írí na ta̱bʉ bi ta̱bʉ nás jányíŋo'ŋ kona kéŋá. ² Na illa karâb a̱a̱sɨ ǎl ká a̱gɨla in lóŋá inná jáárá, na kééŋ taraŋa ná in lʉ́ŋɨŋɨ inná bóóbô'ŋ, na dééŋ ʉto ná in lóŋá inná mʉʉrʉ́'ŋ. Málál namá illa karâb a̱a̱sɨ–sí kééŋ kʉrro na dééŋ kʉttɨ na jâ̱ɨ'ŋ taála suŋŋâ íní. ³ Illa karâb a̱a̱sɨ'ŋ ta̱bʉŋa'ŋ dɨó díg báŋ in jwa ása wǎyꞌíŋ díá kéŋá, maraŋ dééŋ wǎyꞌíŋ díá júndí, sʉʉrʉ nyét–sí namás ma̱y eŋa namá illa karâb a̱a̱sɨ–sí ka̱rɨ kʉ́le. ⁴ Yeeŋ namá illa málál–sí ba̱gɨ káwe, illâíŋ ná yé illa karâb a̱a̱sɨ–sí jǎ̱ɨ'ŋ taála íní. Na yeeŋ dog illa karâb a̱a̱sɨ–sí ba̱gɨ káwe ná in ká̱mɨŋɨ́," Kɨé ná in lóŋ inná in karâb a̱a̱sɨ? Na kɨé ásáŋ taga dééŋ konsa deer já̱gɨ?" ⁵ Illa karâb a̱a̱sɨ–sí ʉto illa kaníe áláŋ dʉŋgʉrɨŋꞌíŋ ʉʉŋa kwǎ na ŋanyiŋa ŋanyíŋó, namás kɨɨne ásáŋ dééŋ taála kí kôlda weyyéŋá oŋŋal na a̱w táárí piá. ⁶ Namá dééŋ ʉto pa̱a̱lɨ́ áláŋ Wʉ́o–sí ŋanyiŋa ŋanyíŋó, áláŋ kééŋ kona na dééŋ jaiŋꞌíŋ lóó a̱w dog–sí ŋanyíŋó,in lóó namá kila kwa gé ǎl jaawíl ka̱ɨŋ. ⁷ Namás kɨɨne ásáŋ ta̱gɨŋa'ŋ konsa deer já̱gɨ na áláŋ yeeŋ–sí ka̱lɨ íní. Namá órré na kwa bi kwa na belé bi belé na ba̱rʉ bi ba̱rʉ'ŋ írí taála kaníe. ⁸ Kwa ǎl nyét ǎl sʉʉrʉ'ŋ írí ka̱ɨŋ áláŋ yee ba̱gɨ káwa. Kin namá kila kwa gé ǎl kɨ́eŋ kona jaiŋꞌíŋ dombore–lé rímmeŋ á ɨŋɨba waar ǎl da̱ldɨŋ–sí á keweba. Illa jaiŋ'ŋ dombore Dolêŋkwě'ŋ–ii ǎl daábeŋ káwe. ⁹ Dʉó ɨt nás kɨ́ló kee, bá ǎ̱w nás kelamí! ¹⁰ Dʉó ɨt ná in lóŋ áláŋ ʉpʉ́dellem–ii, báŋ ʉpʉ́dellem–ii. Dʉó ɨt–sí ná in lóŋ áláŋ kí saar kawe, báŋ kí saar kawe, In lóó–le ta̱gɨŋa ǎ̱w nás jɨrmó na seejǎ̱ɨ ka̱ɨ. ¹¹ Lia namá karâb a̱a̱sɨ keer a̱gɨla ná sʉʉrʉ'ŋ dɨó kúrél nás kolpa a̱w in kéŋá inná dolêŋkwě na in risíŋá inná málál. ¹² Yé namá karâb a̱a̱sɨ díígkʉŋo'ŋ taálaŋa nyét–sí dééŋ della'ŋ táárí piá, namá sʉʉrʉ na kééŋ jôŋkwǎ–sí júndí. ¹³ In karâb a̱a̱sɨ a̱wkʉŋo namá ósoma pirjeŋa piá, namaŋ júndí ná utú jaawíl bʉʉŋo ná sʉʉrʉ́ kwa'ŋ ta̱bʉ́ŋ êl. ¹⁴ Namá sʉʉrʉ'ŋ jôŋkwǎ–sí kí ósoma pirjeŋa júúleŋ piá kila asá kɨɨne áláŋ karâb a̱a̱sɨ dííŋkʉŋo'ŋ dair–lé piá. Namá núrgú íní áláŋ illa karâb a̱a̱sɨ'ŋ jaluŋ káwa illa alá kí saar áwreŋ káwe na ká̱ɨ́ŋ–si ná kee. ¹⁵ Karâb a̱a̱sɨ a̱wkʉŋo–sí namás kɨɨne áláŋ karâb a̱a̱sɨ díígkʉŋo'ŋ jaluŋ–sí kʉo jíŋí, áláŋ jaluŋ risíŋó na áláŋ júndí ná kila kwa nyét kúsal alá kawríŋíe áláŋ illa jaluŋ–sí ba̱gɨ káwal. ¹⁶ Na dog kwa nyét–sí jɨ́gé, dokkéŋa na appáŋa na kawája na pa̱ga̱rɨŋa na baja na koya áláŋ kona súruŋa wala gal a̱rɨ́ŋá–le ósom kaníe. ¹⁷ Na dʉó á keba áláŋ a̱rɨ julu wala gal áláŋ julu'ŋ jáwí abá illa ósom ás keba, kila asá karâb a̱a̱sɨ'ŋ kona gé wala gal diigiŋ alá kééŋ kona'ŋ lóó kɨɨréliŋi. ¹⁸ In lóó rɨɨŋ kóel: ǎ̱w dʉó asá arrájarâŋ kee náis illakarâb a̱a̱sɨ'ŋ diigiŋꞌíŋ arrá rááŋ, ilâíŋ ná yé dʉó'ŋ diigiŋ–ii na dééŋ diigiŋ píriŋa osondííg na weyyéŋá osondííg na osondííŋ(666)–ii