¹ Lia namá nʉ́ŋɨ́ awí, Dolêŋkwě ná Zionꞌíŋ Pʉ́gó'ŋ írí keera, kí kwa líriŋa píri na weyyéŋá oŋŋal na oŋŋaliŋ (144,000) asá kééŋ kona na dééŋ Báa'ŋ kona ka̱ɨ́ŋ ná kɨ́eŋ a̱rɨ́ŋá–le rímmeŋ káwe. ² Namá jaawíl arka kelámi inná koroŋa suŋŋâ'ŋ kola na inná da̱ɨ́lꞌíŋ kola keréŋéli. ³ Yeeŋ kʉttɨ na sálláŋa oŋŋal na sábáŋáta̱bʉŋakurráŋakwǎ'ŋ ta̱bʉ́ŋ ka̱ɨ́ŋ nás kona kɨwwóŋá kaweŋi. Dʉó á kéŋába ásáŋ kila kona tagaa ɨw bá délliŋ kila kwa líriŋa píri na weyyéŋá oŋŋal na oŋŋal(144,000) ka̱ɨ́ŋ nás kalŋɨ̂ŋɨ asá sʉʉrʉ́ kʉpʉŋʉl. ⁴ Kin kila kwa gé alá kɨ́eŋ sǔrŋá kí yáaŋa rúbbá á káweba ilâíŋ ná yeeŋ sóbéŋá ge. Yeeŋ Dolêŋkwě–sí tawrá in kawíe inná kurúŋá'ŋ kwǎ waarkwǎ. ⁵ Kɨ́eŋ ʉtoŋa–lé pɨé ás bʉ́lɨ́ŋɨ́ba. Yeeŋ lóomwa̱rɨkwǎ ge. ⁶ Ila namá meleg keer a̱gɨla ná írí arda pia, ná Belétullê Lʉʉt kéŋá ásáŋ kila kwa ǎl sʉʉrʉ'ŋ írí ka̱ɨŋ na ba̱rʉ na órré bi órré na belé na kwa bi kwa–sí tawrá jáwí. ⁷ Namá kí ʉrʉ́ in kwǎ," Wʉ́o–sí ba̱gɨ́ŋka̱lɨ báa na galaŋas báwli, illâíŋ ná dééŋ jansa'ŋ tin êl. Na yee ba̱gɨ báa ǎl jaawil na sʉʉrʉ na roo na koróŋkʉ́ŋɨ́–sí tewa." ⁸ Meleg keer, a̱wkʉŋo namá ka̱rɨ lʉ́o ná in beléŋá," Póyyâ! Babilon appá–ii ná póyyâ! Yé ǎl bá̱rʉ́ŋá nyét–sí júndí áláŋ dééŋ a̱jɨlɨŋꞌíŋ surma'ŋ kira ka̱bɨ." ⁹ Meleg keer, ɨɨskʉŋo namá yeeŋ–sí ka̱rɨ lʉ́o, ná kí ʉrʉ́ in beléŋá," Abá dʉó illa karâb a̱a̱sɨ na dééŋ jaluŋ–sí ba̱gɨ pii na dééŋ a̱rɨ́–le wala gal dééŋ dóŋá–le ósom kannía, ¹⁰ báŋ dog Wʉ́o'ŋ kilmá'ŋ kira baa, kila kira ka̱kkɨ́reŋa alá Wʉ́o'ŋ kilmá'ŋ tʉkkɨŋꞌíŋ tógóló'ŋ dɨó kiŋíe. Na ye–sí áláŋ melega teyyáŋa na Dolêŋkwě'ŋ ta̱bʉ́ŋ kí utú na daáru jággá kaye. ¹¹ Na dɨ́eŋ jagga'ŋ sʉ́ʉ́l báŋ kúrél ná namaŋ níŋ kee báŋ kee. Ɨ́de kí luul na tóó ʉmel áŋ keba kila kwa–lé ǎl illa karâb a̱a̱sɨ na dééŋ jaluŋ–sí ba̱gɨ kawe wala gal dʉó ɨt–lé alá illa karâb a̱a̱sɨ'ŋ kona'ŋ ósom kaníe." ¹² Na in lóó–le, ta̱gɨŋa'ŋ jɨrmó ǎl Wʉ́o'ŋ káálíntá–sí ba̱gɨ kawe na dɨ́eŋ seejǎ̱ɨ asá Ísa–lé ka̱ɨŋ–sí pʉttó kééli, joiŋ'ŋ–ii ¹³ Namá jaawíl arka kelámi ná in beléŋá," In–sí rímmeŋ jáa: Naa míŋ íne–lé ta̱bʉ́ŋ borapattájáa kila kwa'ŋ–ii ǎl Loŋpii–lé kí seejǎ̱ɨ kʉ́sɨŋɨ." Kʉo in beléŋá." Yeeŋ áláŋ kɨ́eŋ tááríŋá–le ʉmel kawía, ilǎíŋ ná kɨ́eŋ tááríŋá kíeŋ arrá kannía." ¹⁴ Sʉʉrʉ'ŋ taa Namá nʉ́ŋɨ́ awí, ɨ́de namá kútu pattâ a̱gɨla na dʉó alá kútu'ŋ írí ǎ̱wɨŋɨ namá in lóŋá inná Dʉldɨ́ŋkwě, kí siirꞌíŋ taajiŋ ta̱bʉ́ŋ, na kí sikkâŋ dóŋa. ¹⁵ Namá meleg keer Toŋteyyâ'ŋ dɨó kuro, nás yee kí ʉrʉ́ sîw ta̱rɨ́ pieŋi, illa dʉó–sí ǎl kútu'ŋ írí ǎ̱wɨŋɨ," Dɨ́ɨ́ŋ keébu wɨswɨs jáa, ná taa dorol jáa, ilâíŋ ná tin áláŋ taa dorol jáa tánas, ɨdɨ̂ɨ́ŋ ná sʉʉrʉ'ŋ taa nyét kuro." ¹⁶ Na dʉó ǎl kútu'ŋ írí ǎ̱wɨŋɨ namá dééŋ keébu sʉʉrʉ nyétꞌíŋ írí wɨswɨs piá, sʉʉrʉ'ŋ taa namá dorol eŋa. ¹⁷ Lia namá meleg keer jaawíl Toŋteyyâ'ŋ dɨó kuro, yé dog–si keébu sikkâ kéŋá. ¹⁸ Lia meleg keer asá utú'ŋ írí taála kéŋá, namá gôbboŋa'ŋ lóó'ŋ dɨó kuro, namás illa dʉó asá keébu sikkâ kéŋá–sí kí ʉrʉ́ sîw ta̱rɨ́ piá," Dɨ́ɨ́ŋ keébu wɨswɨs jáa ná sʉʉrʉ'ŋ ínaba'ŋ dáári ínaba'ŋ ga̱ndʉla dorol jáa, ilâíŋ ná kééŋ ínaba asitóg ɨŋɨ." ¹⁹ Naa meleg namá dééŋ keébu sʉʉrʉ nyétꞌíŋ írí wɨswɨs piá namá sʉʉrʉ'ŋ ínaba'ŋ dáári ínaba dorol piá, namá Wʉó'ŋ kilmá'ŋ tʉkkɨŋꞌíŋ kiráŋjɨ́to'ŋ dʉ́ló appâ'ŋ dɨó ímíŋi. ²⁰ Namá deemꞌíŋ paál kiráŋjɨ́o'ŋ dʉ́lo ká̱rmɨ́nyʉl, kewa namá kɨráŋjɨ́to'ŋ dʉ́lo kʉrʉl ná sa̱kkɨe ná nii kurrá ka̱ɨ́ŋ inná áláŋ múrtá'ŋ karga–lé paagol na dɨ́eŋ jʉ́rtʉ́tʉ́ ná kɨlʉmítira píriŋa ɨɨs(300)–ii péégéliŋi.